MAYANA LUNGHELO LERI RO TSAKISA SWONGHASI! Muvumbi wa hina u hi tshembise ku hi nyika vutomi lebyi nga heriki, kwala misaveni. Hambiswiritano, vo tala swa va tikela ku tshemba mhaka leyi. Va ri: ‘Hinkwerhu hi ta fa.’ ‘I swa ntumbuluko ku va hi hanya kutani hi fa.’ Van’wana va pfumela leswaku ku hanya hilaha ku nga heriki, swa koteka kambe ku nga ri laha misaveni. Va vula leswaku vutomi lebyi nga heriki u ta byi kuma etilweni endzhaku ka loko u file. U anakanya yini?

U nga se hlamula, ha yini u nga kambisisi tinhlamulo leti humaka eBibeleni ta swivutiso leswinharhu: Xana ndlela leyi munhu a vumbiweke ha yona yi swi kombisa njhani leswaku a a vumberiwe ku hanya nkarhi wo tanihi kwihi? A ku ri xihi xikongomelo xa Xikwembu xa le ku sunguleni hi misava ni vanhu? Hikwalaho ka yini vanhu va fa?

Eka swivumbiwa hinkwaswo leswi Xikwembu xi swi vumbeke laha misaveni, vanhu hi vona vo hlawuleka. Njhani? Bibele yi kombisa leswaku i vanhu ntsena lava nga vumbiwa hi xifaniso xa Xikwembu ni ku ‘fana na xona.’ (Genesa 1:26, 27) Sweswo swi vula yini? Swi vula leswaku vanhu va vumbiwe va ri ni vuswikoti ni timfanelo to fana ni ta Xikwembu, to tanihi rirhandzu ni ku kombisa vululami.

Ku engetela kwalaho, vanhu va vumbiwe va ri ni vuswikoti byo anakanya, ku tiva leswo biha ku katsa ni ku navela ku tiva Xikwembu. Hi yona mhaka, hi kotaka ku tlangela ku saseka ka misava ni matilo ni swin’wana swa ntumbuluko swo tanihi mitirho ya mavoko, vuyimbeleri ni swiphato. Ku tlula hinkwaswo, vanhu va ni vuswikoti byo hlawuleka byo gandzela Muvumbi. Swilo leswi hinkwaswo, swi kombisa ku hambana lokukulu loku nga kona eka vanhu ni swivumbiwa leswin’wana leswi nga kona laha misaveni.

Hikwalaho, anakanya hi mhaka leyi: Xana Xikwembu a xi ta va xi nyike vanhu timfanelo leti to hlamarisa ku katsa ni vuswikoti byo ti tirhisa loko a xi lave leswaku va hanya swa xinkarhana? Ntiyiso wa mhaka hileswaku, Xikwembu xi nyike vanhu timfanelo ni vuswikoti byo hlamarisa, leswaku va ta tiphina laha misaveni hilaha ku nga heriki.

Hambiswiritano, van’wana va vula leswaku Xikwembu a xi nga vumbanga vanhu leswaku va ta hanya laha misaveni hilaha ku nga heriki. Va vula leswaku misava a yi vumberiwe ku va kona swa xinkarhana, leswaku vanhu va ta tshama kona va kamberiwa loko swi va fanela ku hanya etilweni hilaha ku nga heriki ni Xikwembu. Kambe, loko sweswo a ku ri ntiyiso, a  swi nga ta vula swona leswaku Xikwembu hi xona xi vangaka vubihi hinkwabyo lebyi nga tata misava? Sweswo a swi ta va swi hambane swinene ni leswi Xikwembu xi nga xiswona. Loko Bibele yi vulavula hi Xikwembu, yi ri: “Hikuva tindlela takwe hinkwato i vululami. Xikwembu xa vutshembeki, lexi nga riki na vuhomboloki; xi ni vululami naswona xi hava xisandzu.”—Deteronoma 32:4.

Bibele yi xi veka erivaleni xikongomelo xa xikwembu hi misava loko yi vula marito lawa: “Loko ku ri matilo, i matilo ya Yehovha, kambe misava u yi nyike vana va vanhu.” (Pisalema 115:16) I ntiyiso leswaku Xikwembu xi vumbe misava, leswaku yi saseka, yi va kaya ra vanhu ra hilaha ku nga heriki ni ku yi tata hi swilo hinkwaswo leswi hi swi lavaka leswaku hi tiphina hi vutomi lebyi nga ni xikongomelo ni lebyi nga heriki.—Genesa 2:8, 9.

“Loko ku ri matilo, i matilo ya Yehovha, kambe misava u yi nyike vana va vanhu.”—Pisalema 115:16

Bibele yi xi veka erivaleni xikongomelo xa Xikwembu hi vanhu. Xi lerise leswaku vatekani vo sungula va ‘tata misava, va fuma swivumbiwa hinkwaswo leswi famba-fambaka ehenhla ka misava.’ (Genesa 1:28) Mayana lunghelo leri a va ri na rona, ro khathalela ni ku ndlandlamuxa kaya ra vona ra Paradeyisi! Swi le rivaleni leswaku Adamu na Evha ni vanhu lava a va ta tswariwa hi ku famba ka nkarhi, a va ta hanya hilaha ku nga heriki laha misaveni ku nga ri etilweni.

Ha yini hi fa? Bibele yi kombisa leswaku hi ku famba ka nkarhi, ntsumi yin’wana ya Xikwembu leyi vitaniwaka Sathana Diyavulosi, yi ringete ku onha xikongomelo xa Xikwembu aEdeni. Njhani?

Sathana u wonge vatswari va hina vo sungula, Adamu na Evha leswaku na vona va nga xi yingisi Xikwembu. Loko Sathana a va byele leswaku Xikwembu xi va tsona swilo leswinene ku nga mfanelo yo tihlawulela eka leswinene ni leswo biha, va hlawule ku n’wi yingisa ku ri na ku yingisa Xikwembu. Vuyelo bya kona byi ve byihi? Hi ku famba ka nkarhi, va file hilaha Xikwembu xi va lemukiseke ha kona. Va lahlekeriwe hi lunghelo ra vona ro hanya hilaha ku nga heriki emisaveni leyi nga Paradeyisi.—Genesa 2:17; 3:1-6; 5:5.

Leswi Adamu na Evha va nga xi yingisangiki Xikwembu, swi khumbe vanhu hinkwavo ku ta fikela ninamuntlha. Rito ra Xikwembu ri ri: “Xidyoho xi nghene . . . emisaveni hi munhu un’we [Adamu] ni rifu hikwalaho ka xidyoho, xisweswo rifu ri tlulele vanhu hinkwavo.” (Varhoma 5:12) Ha fa hikwalaho ka leswi hi tluletiweke xidyoho ni rifu hi vatswari va hina vo sungula, ku nga ri hi ndlela yo karhi leyi nga twisisekiki kumbe hikwalaho ka ‘makungu’ ya Xikwembu.

Ku xandzuka loku ku veke kona aEdeni, a ku xi herisanga xikongomelo xa Xikwembu hi vanhu ni misava. Rirhandzu ni vululami bya Xikwembu swi endle leswaku xi lava ndlela yo hi ntshunxa eka xidyoho ni rifu, leswi hi swi kumeke eka vatswari va hina vo sungula. Muapostola Pawulo u te: “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Xikwembu lexi nga ni rirhandzu “xi [nyikele] hi N’wana wa xona la tswariweke a ri swakwe [Yesu Kreste] leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Ku va Yesu a tinyikele hi ku tirhandzela leswaku a hi fela, swi endle leswaku swi koteka ku tlhela hi kuma hinkwaswo leswi lahlekeke hikwalaho ka Adamu. a

Ku nga ri khale xitshembiso xa Xikwembu xa leswaku misava leyi yi ta va Paradeyisi xi ta hetiseka. Vumundzuku lebyi, lebyinene u ta byi kuma loko wo tirhisa xitsundzuxo xa Yesu lexi nge: “Nghenani hi nyangwa leyo khuma; hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.” (Matewu 7:13, 14) Vumundzuku bya wena byi le mavokweni ya wena. U ta endla yini?