Van’wana va tivutisa loko Rito ra Xikwembu ri cinciwile. Muprofeta Esaya u vule leswaku rito ra Xikwembu ri ta “tshama hilaha ku nga riki na makumu.” (Esaya 40:8) Hi nga tiyiseka njhani leswaku Rito ra Xikwembu a ri cinciwanga?

Xikwembu xi ni matimba yo hlayisa Rito ra xona ni yo ri sivela leswaku ri nga onhiwi. Emikarhini ya ku tsariwa ka Bibele, loko vakopi va ri karhi va kopa Bibele, a va hlayela rito rin’wana ni rin’wana leri a ri ri kona eBibeleni leswaku va tiyiseka ku a ku engeteriwanga nchumu, ku cinciwa swo karhi kumbe ku susiwa swo karhi. Hambiswiritano, vanhu a va hetisekanga kutani vakopi van’wana va swi endlile swihoxo.

Ku ni tikopi ta magidi ta Matsalwa yo Kwetsima ya le nkarhini lowu hundzeke. Loko kopi yo karhi yi cinciwe katsongo, yi nga ha ringanisiwa ni letin’wana leswaku ku kumiwa ntiyiso lowu a wu ri kona ku sukela eku sunguleni.—Leswaku u kuma leswi engetelekeke vona nhlokomhaka leyi nge, “Has the Bible Been Changed or Tampered With?” eka jw.org.

Hi xikombiso, tikopi ta khale leti vuriwaka Tibukunsongwa ta Lwandle Leri Feke ti kumiwe emabakweni hi Maabedouin ekusuhi ni Lwandle Leri Feke hi 1947. Tikopi leti ta khale ti ni Matsalwa yo Kwetsima lama tsariweke eka malembe yo tlula 2 000 lama hundzeke. Vativi va ringanise matsalwa ya khale ni Matsalwa yo Kwetsima ya sweswi. I yini leswi va swi kumeke?

Vativi lava va kume leswaku mongo wa Rito ra Xikwembu a wu cincanga. * Ku va va kambisise mhaka leyi hi vukheta swi endla leswaku hi swi xiya leswaku Matsalwa yo Kwetsima ma ha khome rungula ra Xikwembu hilaha a ri ri ha kona. A hi kanakani leswaku Xikwembu hi xona xi endleke leswaku Matsalwa yo Kwetsima ma hlayisiwa leswaku na hina hi ta vuyeriwa.

Hikwalaho loko hi hlaya Rito ra Xikwembu hi fanele hi tiyiseka leswaku ra ha ri hilaha a ri ri hakona eku sunguleni. Sweswi, a hi kambisiseni leswi vaprofeta lava Xikwembu xi va tirhiseke va hi dyondzisaka swona hi xona.