A ku na munhu la nga ni xifaniso xa Yesu. A nga si tshama a tekiwa xifaniso. Hambiswiritano, u kumeka eka swifaniso swa vadirowi vo tala va khale ni va manguva lawa.

Entiyisweni, vadirowi va swifaniso a va swi tivi leswaku Yesu a languteka njhani? Kambe a va dirowa swifaniso swa Yesu hi ku ya hi mindhavuko, vukhongeri ni ndlela leyi lava a va swi xava a va swi lavisa xiswona. Nilokoswiritano, swifaniso swa vona swi nga ha khumba ndlela leyi vanhu va n’wi langutaka ha yona Yesu ni leswi a swi dyondzisa.

Vadirowi van’wana va dirowa Yesu tanihi hi munhu la tsaneke la nga ni misisi yo leha a tlhela a va ni swilepfana. Kasi eka swifaniso swin’wana Yesu u languteka ku fana na ntsumi kumbe tanihi hi munhu loyi a nga riki na mhaka na vanhu. Xana swifaniso swo tano swi n’wi hlamusela kahle Yesu? Hi nga swi tiva njhani sweswo? Ndlela yin’wana i ku kambisisa marito yo karhi ya le Bibeleni lama nga ta hi pfuna hi tiva ndlela leyi Yesu a nga ha va a languteka ha yona. Naswona ma nga tlhela ma hi pfuna leswaku hi va ni langutelo lerinene ha Yesu.

Swi nga ha endlaka Yesu a vule marito wolawo hi nkarhi lowu a khuvuriweke ha wona. (Vaheveru 10:5; Matewu 3:13-17) Xana miri wolowo a wu languteka njhani? Loko Yesu a nga si velekiwa, ntsumi Gabriyele yi byele Mariya yi ku: “U ta tika embelekweni wa wena, u ta veleka n’wana wa jaha, . . . N’wana wa Xikwembu.” (Luka 1:31, 35) Kutani Yesu a a ri munhu la hetisekeke hilaha Adamu a a ri ha kona loko a vumbiwa. (Luka 3:38; 1 Vakorinto 15:45) Kumbexana Yesu a a ri wanuna la vumbekeke kahle naswona a fana ni mana wakwe wa Muyuda ku nga Mariya.

Ku hambana ni Varhoma, Yesu a a ri ni malepfu tanihi leswi a swi tolovelekile eka Vayuda. Malepfu wolawo a ma endla leswaku a xiximeka naswona a nga ri ni malepfu yo leha lama nga khathaleriwiki. A swi kanakanisi leswaku misisi ya Yesu ni malepfu yakwe a swi tsemetiwa kahle. Phela a ku ri Vanaziri ntsena vo tanihi Samsoni lava a va nga fanelanga va tsemeta misisi ya vona.—Tinhlayo 6:5; Vaavanyisi 13:5.

Yesu u hete malembe yo tala a tirha tanihi hi muvatli naswona a tirha hi matimba tanihi leswi a nga ri na yona michini leyi pfunaka vavatli va manguva lawa. (Marka 6:3) Hikwalaho a swi kanakanisi leswaku a a ri wanuna la tiyeke. Eku sunguleni ka vutirheli byakwe Yesu u ‘hlongole hinkwavo lava a va ri ni tinyimpfu ni tihomu etempeleni, a chulula timali ta nsimbi ta vacincisi va mali, a wisetela matafula ya vona.’ (Yohane 2:14-17) I wanuna la tiyeke ni wa matimba la nga endlaka sweswo. Yesu u tirhise miri lowu Xikwembu xi n’wi lunghiseleleke wona leswaku a endla ntirho lowu xi n’wi nyikeke wona, u te: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) A swi lava matimba leswaku Yesu a kota ku famba etikweni hinkwaro ra Palestina hi milenge leswaku a chumayela mahungu lamanene.

A swi kanakanisi leswaku ndlela leyi Yesu a a languteka ha yona ni ndlela leyinene leyi a vulavula ha yona, yi endle leswaku xirhambo lexi xi va lexi tsakisaka eka vanhu “lava tirhaka hi matimba ni lava tikeriwaka.” (Matewu 11:28-30) Leswi Yesu a ri munhu  wo olova a tlhela a va ni musa, a swi fambisana kahle ni xitshembiso xakwe xo phyuphyisa lava lavaka ku dyondza eka yena. Hambi ku ri vana lavatsongo a va lava ku va na Yesu, hikuva Bibele yi vule leswaku ‘u angarhe vana.’—Marka 10:13-16.

Hambi leswi Yesu a veke ni gome hi nkarhi wa rifu rakwe kambe a a tshama a tsakile. Hi xikombiso, u endle leswaku vanhu va tsaka enkhubyeni wa vukati eKana hi ku hundzula mati ma va vhinyo leyinene. (Yohane 2:1-11) Mikarhi yin’wana loko a rhamberiwe eswakudyeni, Yesu u dyondzise tidyondzo ta nkoka leti nga rivalekiki.— Matewu 9:9-13; Yohane 12:1-8.

Xa nkoka swinene, ntirho wa Yesu wo chumayela wu pfune vanhu vo tala vava ni ntshembo lowu tsakisaka wa vutomi lebyi nga heriki. (Yohane 11:25, 26; 17:3) Loko vadyondzisiwa vakwe va 70 va tise xiviko xa ntirho wa vona wo chumayela, ‘hi ntsako’ Yesu u te: “Tsakisisani hileswaku mavito ya n’wina ma tsariwile etilweni.”— Luka 10:20, 21.

Varhangeri va vukhongeri va le nkarhini wa Yesu a va endla swilo leswaku va ta voniwa hi vanhu naswona a va rhandza swikhundlha. (Tinhlayo 15:38-40; Matewu 23:5-7) Ku hambana na vona, Yesu u byele vadyondzisiwa vakwe leswaku va nga ‘tikiseli’ van’wana. (Luka 22:25, 26) Entiyisweni u va lemukise a ku: “Tivoneleni vatsari lava rhandzaka ku famba-famba va ambale tinguvu to leha ni ku lava ku xewetiwa etindhawini ta ku xavisela.”—Marka 12:38.

Ku hambana ni varhangeri volavo, Yesu a tihlanganisa ni ntshungu naswona a nga tilaveli ndhuma. (Yohane 7:10, 11) Loko a ri na vaapostola vakwe vo tshembeka va 11, a a nga tiendli a languteka a ri wo hlawuleka. Leswi ntshungu lowu a wu lava ku dlaya Yesu a wu nga ta n’wi tiva, Yudasi u n’wi ntswontswile tanihi ‘xikombiso lexi a twananeke ha xona’ ni tshungu wolowo.—Marka 14:44, 45.

Hambileswi hi nga riki na vuxokoxoko hinkwabyo ha Yesu, kambe swi le rivaleni leswaku Yesu a a nga languteki ha yona ndlela leyi vadirowi va swifaniso va n’wi dirowaka ha yona. Hambiswiritano, xa nkoka ku tlula ndlela leyi a languteka ha yona, i ndlela leyi hi n’wi tekaka ha yona namuntlha.

Hi siku leri a vuleke marito wolawo, Yesu u dlayiwile. (Yohane 14:19) U nyikele hi vutomi byakwe leswaku byi “va nkutsulo wa lavo tala.” (Matewu 20:28) Xikwembu xi pfuxe Yesu “a ri wa moya” hi siku ra vunharhu kutani “xi n’wi endla a voniwa” hi vadyondzisiwa van’wana vakwe. (1 Petro 3:18; Mintirho 10:40) Xana Yesu a languteka njhani loko vadyondzisiwa vakwe va n’wi vona endzhaku ko pfuxiwa eku feni? Swi le rivaleni leswaku a hambanile swinene ni ndlela leyi a languteka ha yona a nga si fa hikuva hambi ku ri vadyondzisiwa vakwe a va nga n’wi tivi. Mariya wa Magadala u n’wi fanise ni murindzi kasi vadyondzisiwa vambirhi lava a va ya eEmawusi a va n’wi teka tanihi munhu wumbe.—Luka 24:13-18; Yohane 20:1, 14, 15.

I yini leswi namuntlha swi faneleke swi ta emianakanyweni ya hina loko hi ehleketa hi Yesu? Malembe yo tlula 60 endzhaku ka rifu ra Yesu, muapostola Yohane u kombiwe swivono swa Yesu. Yohane a nga vonanga munhu la vambiweke exihambanweni. Kambe, u vone “Hosi ya tihosi ni Mufumi wa vafumi,” Hosi ya Mfumo wa Xikwembu leyi ku nga ri khale yi nga ta herisa valala hinkwavo va Xikwembu, lava katsaka vanhu vo homboloka ni madimona kutani yi tisela vanhu lavanene mikateko ya hilaha ku nga heriki.—Nhlavutelo 19:16; 21:3, 4.