ENEW YORK—Hi October 29, 2012, Xidzedze xa Sandy xi vange ku onhaka lokukulu etindhawini to tala leti nga eRibuweni ra le Vuxeni ra United States. Timbhoni ta Yehovha ti le ku tirhisaneni ni valawuri va kwalaho leswaku ti pfuneta ku khathalela vagandzeri-kulobye ni van’wana lava hlaseriweke hi mhangu leyi.

Timbhoni leti lavaka ku ringana 200 000 ti tshama eswifundzheni leswi hlaseriweke hi ku kongoma hi xidzedze. Etindhawini leti hlaseriweke swinene, i Timbhoni timbirhi ntsena leti ku vikiweke leswaku ti vavisekile kambe ku hava leti feke. EGeorgia, timheho ta matimba ti tshove rhavi ra murhi ivi ri wela n’wana ri n’wi vavisa swinene, loyi vatswari vakwe va hlanganyelaka ni Timbhoni ta Yehovha. Loko ku tsariwa xiviko lexi, n’wana yoleyo a a ri exiyin’weni xo tika. Timbhoni ta kwalaho ni van’wana lava tweke hi ta ku vaviseka ka n’wana loyi eka mahungu va ya emahlweni va pfuna ndyangu wolowo.

Xidzedze xi kavanyete fambiselo ro vulavurisana etindhawini to tala. Loko fambiselo ro vulavurisana ri ta va se ri lunghisiwile, ku ta kambisisiwa hi vukheta ku onhaka loku veke kona.

Swiviko swo sungula leswi humaka erhavini ra United States ra Timbhoni ta Yehovha ri kombisa leswaku i munhu un’we ntsena loyi a vavisekeke erhavini kambe ku hava loyi a feke. Xidzedze xi vange ku onhaka loku nga nyawuriki eka miako leyi nga ntsindza wa misava hinkwayo wa Timbhoni ta Yehovha eBrooklyn, le New York. Xiphemu xa le mahlweni ka muako wun’wana xi hungiwe hi mheho ya matimba kambe ku hava munhu loyi a vavisiweke hi swiphetlo swa kona. Ku tsemeke gezi eka miako ya rhavi ePatterson ni le Wallkill, eNew York, naswona miako leyi yi tirhise tijenereta swa xinkarhana; hambiswiritano, miako ya le Warwick ya ha tirhisa tijenerata. Nakambe xidzedze xi kavanyete fambiselo ro vulavurisana emiakweni leyi.

Swiviko swo sungula swi tlhele swi kombisa ni rungula leri landzelaka: miako ya 12 ya vugandzeri leyi tirhisiwaka hi Timbhoni, leyi vitaniwaka Tiholo ta Mfumo, yi onhiwe swinene hi ndhambi kumbe hi timheho ta matimba; tiyindlu ta 219 ta Timbhoni ti mbundzumukile hikwalaho ka xidzedze, ta 169 ti onhakile kasi ta 710 ti onhake katsongo. Timbhoni ta le tindhawini teto ti hlele mintlawa yo hlayanyana leswaku yi phalala vanhu naswona ti le ku pfuneni ka vatirhela-mfumo leswaku ti swi khathalela hi xihatla swilaveko swa vagandzeri-kulobye ni swa vanhu van’wana lava hlaseriweke hi mhangu leyi.

Loko xidzedze lexi xi nga si hlasela, mavandlha ya Timbhoni ta Yehovha ma komberiwe ku hlela ndlela yo rhurhela endhawini leyi hlayisekeke. Timbhoni to tlula 1 100 ti rhurhisiwile emahlweni ko va mhangu leyi yi tlhekeka. Timbhoni ta kwalaho ti pfule makaya ya tona leswaku ti rhurhela vagandzeri-kulobye lava sukeke emakaya ya vona kumbe lava makaya ya vona a ma nga ri na gezi ku ringana nkarhi wo leha.

Vatirhi va ku tirhandzela lava nga Timbhoni va tirha hi ku tiyimisela leswaku va khathalela swilaveko swa vapfumeri-kulobye naswona va ta hambeta va endla tano ntsendze loko ka ha ri ni xilaveko. J. R. Brown, muvulavuleri wa le ntsindza wa misava hinkwayo wa Timbhoni, u te: “Hi karhatekile swinene hi vanhu hinkwavo lava hlaseriweke hi mhangu leyi leyikulu. Ha tsaka leswi hi kotaka ku pfuna van’wana, ngopfu-ngopfu vagandzeri-kulorhi lava xanisekaka hikwalaho ka vuyelo bya xidzedze lexi lexikulu. Hi tshama hi ri karhi hi ehleketa ha vona naswona ha va khongelela.”

Media Contact:

J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000