Mfumo wa Xikwembu i hulumendhe ya xiviri leyi simekiweke hi Yehovha Xikwembu. EBibeleni, “mfumo wa Xikwembu” wu tlhela wu vitaniwa “mfumo wa matilo” tanihi leswi wu fumaka wu ri etilweni. (Marka 1:14, 15; Matewu 4:17) Wu ni swilo swo tala leswi wu yelanaka ha swona ni tihulumendhe ta vanhu kambe wu tlakukile swinene eka tona.

•   Mufumi. Xikwembu xi veke Yesu Kreste tanihi Hosi ya Mfumo wolowo naswona xi n’wi nyike vulawuri lebyi tlulaka bya vafumi lava nga vanhu. (Matewu 28:18) Tanihi leswi Yesu a tikombiseke leswaku i Murhangeri lonene ni la tshembekaka, matimba yakwe u ma tirhisa hi ndlela leyinene. (Matewu 4:23; Marka 1:40, 41; 6:31-34; Luka 7:11-17) Xikwembu xi lerise Yesu leswaku a hlawula vanhu eka matiko hinkwawo lava nga ta fuma na yena etilweni tanihi “tihosi emisaveni.”—Nhlavutelo 5:9, 10.

•   Nkarhi. Ku hambana ni tihulumendhe ta vanhu leti nga tlhaveriwiki hi dyambu, Mfumo wa Xikwembu ‘a wu nge lovisiwi.’—Daniyele 2:44.

•   Vafumiwa. Mani na mani la endlaka ku rhandza ka Xikwembu wa amukeleka eMfun’weni wa xona, ku nga khathariseki leswaku i wa rixaka rihi kumbe u huma etikweni rihi.—Mintirho 10:34, 35.

•   Milawu. Milawu ya Mfumo wa Xikwembu a yo yirisa mahanyelo yo biha ntsena. Kambe yi tlhela yi pfuna vanhu lava nga ehansi ka wona leswaku va va ni mahanyelo lamanene. Hi xikombiso, Bibele yi ri: “‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo. Xa vumbirhi, lexi fanaka na xona, xi ri, ‘U fanele u rhandza warikwenu kukota loko u tirhandza.’” (Matewu 22:37-39) Ku rhandza Xikwembu ni warikwenu swi susumetela vanhu lava nga ehansi ka Mfumo wa Xikwembu leswaku va endla swilo leswi nga ta vuyerisa van’wana.

•   Dyondzo. Mfumo wa Xikwembu a wu vekeli lava nga ta va ehansi ka wona milawu leyi tlakukeke ntsena, wu tlhela wu va dyondzisa ndlela yo hanya ha yona.—Esaya 48:17, 18.

•   Xikongomelo. Mfumo wa Xikwembu a wu xanisi lava nga ehansi ka wona leswaku ku vuyeriwa vafumi va wona. Ematshan’weni ya sweswo, wu ta endla ku rhandza ka Xikwembu, ku katsa ni ku hetisisa xitshembiso xa xona xa leswaku lava xi rhandzaka va tshama hi masiku eparadeyisini laha misaveni.—Esaya 35:1, 5, 6; Matewu 6:10; Nhlavutelo 21:1-4.