Mutsari wa Bibele Luka u vule leswi malunghana ni rungula rakwe leri vulavulaka hi vutomi bya Yesu: ‘Ndzi lavisise swilo hinkwaswo ku sukela emasungulweni hi ku kongoma.’—Luka 1:3.

 Van’wana va vula leswaku rungula leri vulavulaka hi vutomi bya Yesu lebyi tsariweke eka Tievhangeli, ku nga tibuku leti tsariweke hi Matewu, Marka, Luka na Yohane, lava hanyeke enkarhini wa yena, ri cinciwile kwalomu ka lembe-xidzana ra vumune.

 Hambiswiritano, xiphemu xa nkoka swinene xa Evhangeli ya Yohane xi kumiwile aEgipta eku sunguleni ka va-1900. Sweswi xi tiviwa tanihi Papyrus Rylands 457 (P⁵²) naswona xi hlayisiwe eLayiburari ya John Rylands le Manchester eNghilandhi. Xi ni marito lama nga eka Yohane 18:31-33, 37, 38 eTibebeleni ta manguva lawa.

 Lexi i xiphemu xa khale ku tlula hinkwaswo eka Matsalwa ya Vukreste ya Xigriki. Swidyondzi swo tala swi pfumela leswaku xi tsariwe kwalomu ka lembe ra 125 C.E., ku nga nkarhi lowu lavaka ku endla kotara ya lembe-xidzana kumbe ku tlula endzhaku ka loko ku tsariwe tsalwa lero sungula. Marito lama nga eka xona ma pfumelelana swinene ni lama nga eka matsalwa lama tsariweke hi voko lama veke kona hi ku famba ka nkarhi.