Hi August 2014, Timbhoni ta Yehovha emisaveni hinkwayo ti nyike vanhu xiphephana xo va pfuna leswaku va tirhisa website ya jw.org. Hikwalaho ka sweswo, nhlayo ya vanhu lava ngheneke eka website leyi yi fike kwalomu ka 65 wa timiliyoni, ku nga ku andza loku tlulaka 20 wa tiphesente hi n’hweti yoleyo. Emisaveni hinkwayo, vanhu va kwalomu ka 10 000 va kombele dyondzo ya mahala ya Bibele ya le kaya hi ku tirhisa website leyi—ku nga tiphesente ta 67 ku tlula n’hweti leyi hundzeke! Ntirho lowu wo pfuna vanhu leswaku va tirhisa website leyi, wu vuyerise vanhu etindhawini hinkwato.

Mbhoni yin’wana eCanada, yi xewete Madeline loyi a yi khandziye na yena khexe kutani yi n’wi komba xiphephana xo pfuna vanhu leswaku va tirhisa website, lexi nge, Hi Nga Ti Kuma Kwihi Tinhlamulo Ta Swivutiso Swa Nkoka eVuton’wini? Madeline u vule leswaku a ri erikupakupeni ra yena vusiku lebyi nga hundza, a ri karhi a khongela hi mbilu hinkwayo leswaku Xikwembu xi n’wi pfuna ku kuma tinhlamulo ta swivutiso leswi a ri na swona. U nghene tikereke to hambanahambana leswaku a ta kuma dyondzo ya Bibele kambe a nga yi kumanga. Hi ku famba ka nkarhi, u sungule ku dyondza Bibele ni Timbhoni ta Yehovha.

Rowena, mbhoni ya xisati ya le Philippines, u burisane na wanuna un’wana wa Muchayina loyi a yime emahlweni ka resturente. U n’wi nyike xiphephana kutani a n’wi byela leswaku Timbhoni ta Yehovha ti tsakela ku pfuna vanhu leswaku va vuyeriwa eka dyondzo ya Bibele ya mahala.

Wanuna yoloye u n’wi byele leswaku a nga si tshama a yi vona Bibele. Mbulavurisano lowu va veke na wona wu n’wi khutaze ku ya eka yin’wana ya tinhlengeletano ya Timbhoni ta Yehovha. Endzhaku, u vule leswaku u lava ku tiva leswi engetelekeke hi Bibele naswona u lava ku yi kopa eka website ya hina.

Guillermo, Mbhoni leyi feke tindleve ya le Spain, u hlangane na Jorge loyi na yena a feke tindleve, loyi va ngheneke swin’we xikolo. Jorge u n’wi byele leswaku a hi khale mhani wakwe a ha ku fa kutani sweswo swi n’wi endle a tivutisa swivutiso swo tala. Guillermo u n’wi nyike xiphephana xo pfuneta ku tirhisa website ya jw.org kutani a n’wi hlamusela ndlela leyi a nga kumaka tinhlamulo ta swivutiso swakwe hi ririmi ra mavoko eka yona. Guillermo u tlhele a n’wi rhamba leswaku a ta eminhlanganweni eHolweni ya Mfumo. U yile naswona ku sukela hi siku rero, Jorge a nga si tshama a xwa eminhlanganweni hambileswi a tshamaka ekule hi mpfhuka wa tikhilomitara ta 60 ku ya eholweni.

Mimpatswa yimbirhi ya Timbhoni leyi tshamaka eGreenland leyi tirhiseke mali ya yona, yi fambe tiawara ta tsevu hi xikepe leswaku yi ya endhawini yin’wana leyi ku tshamaka vanhu va 280. Yi fike yi va chumayela, yi va nyika swiphephana yi tlhela yi va komba ni vhidiyo eka jw.org hi Xigreenland. Yi sungule dyondzo ya Bibele ni mpatswa wun’wana lowu yi wu chumayeleke. Sweswi yi dyondza swin’we na wona kambirhi hi vhiki hi ku tirhisa riqingho.

Ntirho lowu a wu nga endliwi ntsena etindhawini ta le Kule ta le N’walungu. Timbhoni ta le Nicaragua ti kunguhate ku ya ekhwatini ra Kharibiya ti ya nyika vanhu lava vulavulaka Ximayangna Swiphephana Kharibiya. Endzhaku ko famba tiawara ta 20 handle ko wisa hi bazi leyi a yi nga ri exiyin’weni lexinene, leyi a yi famba egondzweni leri nga ni magoji, ti tlhele ti famba tiawara ta 11 hi milenge, minkarhi yin’wana a ti famba endzhopeni leswaku ti kota ku fika etindhawini teto. Loko ti fika, ti nyike vanhu va kwalaho swiphephana ti tlhela ti va komba tivhidiyo hi ririmi ra Ximayangna, leswi nga va endla va tsaka.

Estela, mbhoni ya xisati, u nyike wanuna un’wana xiphephana loyi a a hundza hi le dorobeni leritsongo ra khwati ra Amazon le Brazil. Wanuna yoloye u xi tekile xiphephana xexo kambe u xi hoxe exikhwameni xakwe, a swi tikomba a nga xi tsakeli. Loko a ri karhi a tlhelela ekaya hi xikepe, njhini ya xona yi onhakile naswona a a nga ri na wo n’wi pfuna. Loko a ha yimele wa ku n’wi pfuna, u humese xiphephana kutani a xi hlaya. Hi ku tirhisa riqingho rakwe, u nghene eka jw.org, laha a nga hlaya swihloko swo hlayanyana ni ku kopa tivhidiyo. Eka masiku lama landzeleke, wanuna loyi u hlangane ni nuna wa Estela, a n’wi kombela leswaku a byela Estela leswaku wa khensa hileswi a nga n’wi nyika xiphephana. U te: “Swihloko leswi ndzi swi hlayeke loko ndza ha yimele mpfuno enambyeni swi ndzi rhurhisile kukondza ndzi kuma wa ku ndzi pfuna.” U tlhele a ku: “Vana va mina va ti rhandza tivhidiyo ta Kalebe. Ndzi ta hambeta ndzi nghena eka jw.org.”