Vayingiseri va magidi va yingisele swiviko leswi khutazaka ni ku tlhuvutsiwa ka Matewu 24:45-47 eka nhlangano wa lembe ni lembe wa vu-128 wa Watch Tower Bible and Tract Society of Pennsylvania.

Hi October 6, 2012, vanhu lava lavaka ku ringana 5 000 a va hlengeletane ku ta yingisela nongonoko eHolweni ya Tinhlengeletano ya Timbhoni ta Yehovha eJersey City, New Jersey, le U.S.A. Vanhu van’wana lava tlulaka 10 000 va hlalele nongonoko lowu emiakweni ya hina eBrooklyn, ePatterson ni le Wallkill eNew York swin’we ni le rhavini ra hina eCanada.

Anthony Morris, xirho xa Huvo leyi Fumaka ya Timbhoni ta Yehovha tlhelo mutshama-xitulu wa nongonoko lowu, u vulavule hi minhlangano ya lembe ni lembe leyi hundzeke leyi ngopfu-ngopfu a yi khutaza naswona yi nga rivalekiki. Vayingiseri a va swi tiva leswaku nongonoko wa lembe leri a wu ta va lowu khutazaka swinene. Kambe a va tivutisa va ku: ‘Xana nhlangano lowu wu ta tlhela wu va lowu nga rivalekiki?’

Hiloko vayingiseri va hlalerisiwa tivhidiyo timbirhi leti va kombeke misava hinkwayo.

Ku Akiwa Ka Tiholo Ta Mfumo:

Vhidiyo leyi yi hlamusele ndlela leyi ku akiwa ka Tiholo ta Mfumo ematikweni lama sweleke ku fambeke kahle ha yona. Emalembeni ya 13 lama hundzeke, Mintlawa yo Aka Tiholo ta Mfumo ematikweni yo tano yi ake Tiholo ta Mfumo ta 25 402—leswi vulaka leswaku hi xiringaniso a ku hetiwa Tiholo ta Mfumo leti tlulaka ntlhanu siku ni siku! Tiholo teto ta Mfumo ti akiwe hi mali leyi nyikeriweke hi Timbhoni ta le misaveni hinkwayo. Ku tlula kwalaho, loko ku va ni mhangu ya ntumbuluko, hakanyingi mintlawa leyi, leyi nga ni vutshila yi pfuna lava hlaseriweke hi ku va lunghisela kumbe ku va akela hi vuntshwa Tiholo ta Mfumo ni makaya ya vona.

Mintsombano Yo Hlawuleka:

Hi 2012, Timbhoni ta Yehovha ti khome mintsombano yo hlayanyana yo hlawuleka leyi eka yona ku teke vapfhumba vo huma ematikweni man’wana. Mintsombano leyi yi hambane njhani ni mintsombano ya matiko leyi veke kona emalembeni lama hundzeke?

Vhidiyo yi hlamusele leswaku rhavi leri khomaka ntsombano wolowo ri hlela byetlelo, vutleketli ni swakudya swa ninhlikanhi swa vapfhumba eka vhiki ra ntsombano, ku nga ri tikhampani to rhurhela vapfumba. Hi xiringaniso vapfhumba va 1 500 lava humaka ematikweni man’wana va ye entsombanweni wun’wana ni wun’wana.

Vapfhumba volavo ni Timbhoni ta kwalaho va pfulekeriwe hi minkarhi yo tala yo tivana, ku nga ri entsombanweni ntsena, kambe ni loko va ya valanga tindhawu to tsakisa, loko va dya swakudya niloko va chumayela vanhu va ndhawu. Vhidiyo yi te: “Ku fikela sweswi, emintsombanweni hinkwayo yo hlawuleka, rirhandzu ra vumakwerhu ri ve xiboho lexi hetisekeke xa vun’we.”

Vayingiseri va tsake ni swikunwana loko va byeriwa leswaku Timbhoni ta Yehovha ti ta sungula ku khoma mintsombano yo hlawuleka lembe ni lembe emadorobeni lama hlawuriweke emisaveni hinkwayo!

Tinhla-nkulu tin’wana ta nhlangano lowu wa lembe ni lembe a ti katsa:

Mimbulavurisano Yo Tivana:

Swirho swinharhu swa Komiti ya Rhavi ni vasati va swona, leswi se swi nga ni malembe ya 342 swi ri vatirheli va nkarhi hinkwawo loko ma hlanganisiwa, swi hlamusele ndlela leyi Yehovha Xikwembu a swi leteleke ha yona leswaku swi endla swiavelo swo tala.

Richard Kelsey, xirho xa Komiti ya Rhavi eJarimani, u vule leswaku Xikolo xa Swirho swa Komiti ya Rhavi ni Vasati va Swona xi n’wi dyondzise “ku landzela nkongomiso wa Yehovha minkarhi hinkwayo.” Yehovha i Tatana wa rirhandzu loyi a hi lavelaka leswinene. Makwerhu Kelsey u te: “U lava leswaku hi hanya hilaha ku nga heriki naswona u endla hinkwaswo leswaku a hi khathalela.” Xikolo lexi xi dyondzisa swirho swa Komiti ya Rhavi ku landzela xikombiso xa Yehovha xa rirhandzu.

Loko Linda Johansson a rhambiwe eXikolweni xa Bibele xa Giliyadi xa Watchtower hi 1958, a a ri ni malembe mambirhi ni hafu a khuvuriwile naswona a a ri ni lembe rin’we ntsena a tekiwile. U te: “Ndzi tikume ndzi tshame etlilasini ni vamakwerhu lava wupfeke [ni] lava nga ni ntokoto. Ndzi tibyele ndzi ku . . . , ‘Kahle-kahle a ndzi fanelanga ndzi va laha.’”

Kambe Makwerhu wa xisati Johansson u tiyiserile naswona endzhaku ko thwasa, yena ni nuna wakwe va rhumeriwe eMalawi ku va varhumiwa. Endzhaku ka loko Timbhoni ta Yehovha ti xanisiwe hi tihanyi swinene etikweni rero, u dyondze Bibele ni holobye loyi a kaneteke ntirho wa Timbhoni. Namuntlha, nsati wa holobye yoloye ni n’wana wa vona wa jaha ni wa nhwanyana i Timbhoni leti khuvuriweke.

Tsima Ro Chumayela eNdhawini Ya Mani Na Mani:

Vamathwasana va mune va Xikolo xa Bibele xa Mimpatswa ya Vakreste swin’we ni mulanguteri wa xifundzha wa Timbhoni ta Yehovha eNew York va hlamusele mintokoto leyi va yi kumeke hikwalaho ka leswi va tikarhateke ku fikelela vanhu etindhawini leti nga ni mphensamphensa ta le madorobeni.

Etindhawini leti nga ni mphensamphensa swinene, vatirheli va nkarhi hinkwawo lava nga Timbhoni ta Yehovha va veka matafula ni swigolonyana leswi nga ni minkandziyiso ya Bibele. Vahundzi va ndlela va nga tikumela minkandziyiso, va vutisa swivutiso swa Bibele ni ku kombela dyondzo ya Bibele.

Timbhoni ta le tindhawini tin’wana ta Doroba ra New York ni le Chicago swin’we ni le Los Angeles, va le ku ringeteni ka endlelo leri ro fikelela vanhu. Hi lembe rin’we ntsena, vanhu va kwalomu ka 2 700 lava yeke ematafuleni ni le swigolonyaneni sweswo va kombele dyondzo ya mahala ya Bibele.

Khwaya Ya Vana:

I vanhu va nga ri vangani ntsena eka vayingiseri lava nga rilangiki loko khwaya ya vana lava ringanaka 17 va yimbelele risimu leri nge “Yingisa, Kutani U Katekisiwa” eka buku ya tinsimu leyi nge Yimbelelelani Yehovha (Risimu 120).

Endzhaku ka sweswo, ku ve ni nxaxamelo wa tinkulumo ta tsevu leti nyikeriweke hi swirho swa Huvo leyi Fumaka​—Makwerhu Jackson, Lösch, Pierce, Herd, Lett na Splane​—leti tlhuvutseke nhlamuselo ya marito ya Yesu lama tsariweke eka Matewu 24:45-47. Yesu u te:

“Kahle-kahle i mani hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke? Ra tsaka hlonga rero loko n’wini wa rona a fika a nga ta ri kuma ri endla tano! Ndzi tiyisile ndzi ri eka n’wina, U ta ri veka ehenhla ka hinkwaswo leswi nga swa yena.”

Nxaxamelo lowu wu hlamule swivutiso leswi landzelaka:

Yesu U Ri Veke Rini “Hlonga Ro Tshembeka Ni Ro Tlhariha” Ehenhla Ka Va Yindlu Yakwe?

Kambisisa mongo wa marito ya Yesu eka Matewu ndzima 24. Tindzimana hinkwato leti xaxametiweke laha a ti ta hetiseka enkarhini wa vukona bya Kreste, ku nga “makumu ya mafambiselo ya swilo.”​—Ndzimana 3.

• “Nhlomulo wa masiku wolawo.”​—Ndzimana 29.

• “Xitukulwana lexi.”​—Ndzimana 34.

• “Siku ra kona ni nkarhi wa kona.”​—Ndzimana 36.

• “Siku leri Hosi ya n’wina yi nga ta ta ha rona.”​—Ndzimana 42.

• “N’wana wa munhu u ta ta hi nkarhi lowu mi nga wu ehleketiki.”​—Ndzimana 44.

Kutani swa twala ku vula leswaku “hlonga ro tshembeka ni ro tlhariha” ri fanele ri humelele endzhaku ka loko vukona bya Kreste byi sungurile hi 1914.

Ku engetela kwalaho, Yesu u kombise leswaku “hlonga” leri a ri ta humelela enkarhini lowu a swi ta fanela ku vutisa xivutiso lexi nge: “Kahle-kahle i mani hlonga ro tshembeka ni ro tlhariha?” Vaapostola va Yesu a va ri ni tinyiko to endla masingita ta moya lowo kwetsima, kutani a xi nga ri kona xivangelo xo vutisa xivutiso xexo hi lembe-xidzana ro sungula C.E. (1 Vakorinto 14:12, 24, 25) Hambileswi vaapostola ni Vakreste van’wana va lembe-xidzana ro sungula a va totiwe hi moya lowo kwetsima, a va nga ri “hlonga ro tshembeka ni ro tlhariha” leri Yesu a profeteke ha rona.

Kutani swa twala ku gimeta hileswaku Yesu u veke “hlonga ro tshembeka ni ro tlhariha” ehenhla ka “va yindlu yakwe” hi nkarhi wa vukona byakwe, ku nga “makumu ya mafambiselo ya swilo.”

“Kahle-kahle I Mani Hlonga Ro Tshembeka Ni Ro Tlhariha?”

Yesu a a nga kombeteli eka munhu un’we, kambe eka “hlonga”​—ntlawa lowu tirhaka swin’we tanihi huvo yin’we. Yesu u vule leswaku hlonga (1) ri vekiwa ku langutela “va yindlu” ya n’wini wa rona ni (2) ku nyika va yindlu “swakudya [swa moya] hi nkarhi lowu faneleke.”

Ku sukela hi 1919 ku ya emahlweni, minkarhi hinkwayo a ku ri ni ntlawa lowutsongo wa Vakreste lava totiweke entsindza wa misava hinkwayo wa Timbhoni ta Yehovha. A va langutela ntirho wa hina wa misava hinkwayo wo chumayela ni ku lunghiselela swin’we ni ku phamela swakudya swa moya. Emalembeni ya sweswinyana, ntlawa wolowo wu tiviwa tanihi Huvo leyi Fumaka ya Timbhoni ta Yehovha.

Vumbhoni lebyi byi endla hi gimeta hi ku: “Hlonga ro tshembeka ni ro tlhariha” ri vekiwe ehenhla ka va yindlu ya Yesu hi 1919. Hlonga rolero i ntlawa lowutsongo wa vamakwerhu lava totiweke lava tirhaka entsindza wa misava hinkwayo enkarhini wa vukona bya Kreste, lowu lunghiselelaka ni ku phamela swakudya swa moya. Loko ntlawa lowu wu tirha swin’we tanihi Huvo leyi Fumaka wu va “hlonga ro tshembeka ni ro tlhariha.”

I Vamani “Va Yindlu”?

Yesu u vule leswaku “va yindlu yakwe” a va ta kuma “swakudya swa vona hi nkarhi lowu faneleke.” Valandzeri hinkwavo va ntiyiso va Yesu va phameriwa hi “hlonga ro tshembeka ni ro tlhariha.” Hikwalaho, vadyondzisiwa hinkwavo va Kreste—Vakreste hinkwavo lava totiweke ni swirho swa “tinyimpfu tin’wana”—i “va yindlu yakwe.”​—Yohane 10:16.

Endzhaku ka loko xivulavuri xi hlamusele xiphemu lexi xa vuprofeta bya Yesu, vayingiseri va phokotele nkarhi wo leha. Endzhaku ka nongonoko lowu, vanhu vo hlayanyana va phofule ku tlangela ka vona hileswi Yesu a va tekaka tanihi van’wana “va yindlu yakwe.”

Yesu U Ri Veka Rini Hlonga “Ehenhla Ka Hinkwaswo Leswi Nga Swa Yena”?

Yesu u vule leswaku “loko n’wini wa rona a fika” (leswi hi ku kongoma swi vulaka “ku ta”) u ta veka hlonga “ehenhla ka hinkwaswo leswi nga swa yena.” U fika rini Yesu, N’wini wa rona?

Xiga lexi hundzuluxeriweke xi va “loko a fika” i rito ra Xikrigi erʹkho·mai. Tindzimana 42 na 44 ta ndzima 24 ti hundzuluxela rito erʹkho·mai ri va ‘ku ta.’ Eka tindzimana teto, Yesus u kombetela eka ku ta kakwe tanihi Muavanyisi hi nkarhi wa nhlomulo lowukulu.​—Matewu 24:30; 25:31, 32.

Kutani ni ku vekiwa ka “hlonga” ehenhla ka “leswi nga swa yena,” ku ta va nchumu lowu nga ta endleka enkarhini lowu taka. U ta ri veka enkarhini wa nhlomulo lowukulu.

I Yini “Leswi Nga Swa [Yesu]” ?

Yesu u te: “Ndzi nyikiwe vulawuri hinkwabyo etilweni ni le misaveni.” (Matewu 28:18) Xisweswo, “leswi nga swa yena” a swi katsi swilo swa laha misaveni ntsena. Swi katsa Mfumo wa Mesiya.​—Vafilipiya 2:9-11.

Kutani Yesu u ta katekisa “hlonga ro tshembeka ni ro tlhariha” hi ku pfuxa xirho xin’wana ni xin’wana xa rona evuton’wini bya le tilweni ni ku xi nyika vulawuri ehenhla ka swilo hinkwaswo swa Kreste etilweni ni le misaveni. Hakelo leyi hi yona leyi tshembisiweke Vakreste hinkwavo vo tshembeka lava totiweke.​—Luka 22:28-30; Nhlavutelo 20:6.

Nkulumo yo hetelela ya nxaxamelo a yi ri ni xitiviso xo hlawuleka. Endzhaku ko hlaya marito ya Yesu lama chavelelaka lama nga eka Matewu 28:20, Makwerhu Splane u te: “Hi ni xivangelo xin’wana lexi hi endlaka hi va ni xivindzi. Xivangelo xexo xi kumeka eka ndzimana ya lembe ya 2013. Yi ri yini? Yoxuwa 1:9: ‘Vana ni xivindzi, u tiya. . . . Yehovha Xikwembu xa wena u na wena.’”

Loko Makwerhu Morris a gimeta u vutise a ku: “Ku ta humelela yini lembe leri taka? Nhlangano wa lembe ni lembe wa lembe leri taka, lowu nga ta khomiwa hi October 5, 2013, wu ta haxiwa eTiholweni tin’wana ta Tinhlengeletano eUnited States ni le matikweni man’wana lama vulavulaka Xinghezi.”

Nongonoko lowu wu ta haxiwa hi Xinghezi ntsena. A wu nge tolokiwi hi tindzimi tin’wana.

Endzhaku ka nongonoko wolowo lowu khutazaka ni lowu nga rivalekiki, vayingiseri va yimbele risimu leri nge “Ku Vonakala Ku Ya Ku Voninga” (Risimu 116) ebukwini ya tinsimu leyi nge Yimbelelelani Yehovha. Risimu leri ri ni marito lama vulaka leswi:

“Hosi yi ni hlonga lero tshembeka,

Leri phamelaka swakudya.

Rivoni ra ntiyiso ra voninga,

Ri khumba timbilu ta hina.”