Mahungu Ya Ku Tsakisa Ya Ku Tsaliwa Hi Luka 1:1-80

CHAYA

Marito ya ku sungula lama nga tsaleliwa Teyofilo (1-4)
Gabriyele a tivisa ta ku psaliwa ka Yohani Mutsakamisi (5-25)
Gabriyele a tivisa ta ku psaliwa ka Yesu (26-38)
Mariya a ya pfuxela Elizabeti (39-45)
Mariya a dzunisa Yehovha (46-56)
Yohani a psaliwa a tlhela a chuliwa vito (57-66)
Leswi Zakariya a nga swi profeta (67-80)

1 Vanhu va ku tala va zame ku hlengeleta ni ku tsala timhaka leti hinkwerhu hi ti tshembaka,*+ ² leti va nga ti kuma ka lava a va li timboni+ ni vachumayeli va tona ku sukela ku sunguleni.+ ³ Se na mina ni ti kambisisile kahle timhaka leti hinkwatu ku sukela ku sunguleni kutani ni vone swaku swi nga yampsa ni ku tsalela hi ku landzelelana ka tona, wena muchaviseki Teyofilo+ ⁴ leswaku u ta wu twisisa kahle ntiyiso wa timhaka leti u nga djondzisiwa tona.+ ⁵ Hi nkama wa ku fuma ka Heroda*+ hosi ya le Yudiya, a ku ni muprista wamukulu lweyi a a vitaniwa Zakariya, lweyi a a li muprista wa ntlawa wa Abiya.+ Nsati wa yena a ku li Elizabeti ntukulu wa Aroni. ⁶ Havambirhi a va lulamile ka Xikwembu, a va landzela minawu hinkwayu ya Yehovha.* ⁷ Kambe a va nga na n’wana hikusa Elizabeti a a nga psali naswona se a va gugile. ⁸ Nkama Zakariya na a yendla ntirho wa yena wa wuprista phambheni ka Xikwembu hi masiku ya ku tirha ya ntlawa wa yena,+ ⁹ hi ku landza matirhelo* ya wuprista, ku fike nkama wa yena wa ku hisa swinun’hwelisu*+ atempeleni ya Yehovha.*+ ¹⁰ A ku ni vanhu va ku tala lava a va khongela handle nkama a ku hisiwa swinun’hwelisu. ¹¹ Se ntsumi ya Yehovha* yi humelela ka Zakariya, yi nyima ka tlhelo la xinene la altari.* ¹² Se Zakariya a karhateka hi mhaka ya leswi a a swi vona, kutani a sungula ku chava. ¹³ Kambe ntsumi yi ku: “U nga chavi Zakariya, hikusa xikombelo xa wena xi yingisiwile, nsati wa wena Elizabeti a ta ku psalela* n’wana, kutani u ta mu chula vito la Yohani.+ ¹⁴ U ta tsaka swinene u tlhela u tsakisisa naswona va ku tala va ta tsaka hi ku psaliwa ka yena,+ ¹⁵ hikusa a ta hlonipheka ka Yehovha.*+ Kambe a nga fanelanga a phuza vhinyu kumbe mabyala man’wani lama dakwisanaka,+ a ta tala hi moya wa ku kwetsima na a ha li ka khwirhi la mamani wa yena,*+ ¹⁶ a ta pfuna vana va ku tala va Israyele swaku va tlhelela ka Yehovha* Xikwembu xa vona.+ ¹⁷ Xikwembu xi ta rhanga xi rhuma n’wana wa wena na a ni mbilu* ni matimba ya ku fana ni ya Eliya,+ leswaku a ta txintxa timbilu ta vapsali ti fana ni ta vana,+ ni ku pfuna lava kalaka va nga yingisi swaku va yendla swaswinene hi wutlharhi a tlhela a yendla leswaku vanhu va lunghekela ku tirhela Yehovha.”*+ ¹⁸ Kutani Zakariya a byela ntsumi a ku: “Se ni nga swi kholwisa ku yini swoleswo? Hikusa ni gugile na yena nsati wa mina se a gugile.” ¹⁹ Ntsumi yi mu hlamula yi ku: “Hi mina Gabriyele,+ lweyi a nyimaka phambheni ka Xikwembu,+ naswona ni rhumiwe swaku ni ta vulavula na wena ni ku ku byela mahungu lawa ya ku tsakisa. ²⁰ Kambe u ta va mbheveve anze siku leli swilo leswi swi nga ta yendleka hi lona, hikusa a wu ma kholwanga marito ya mina, lama nga ta hetiseka hi nkama lowu nga vekiwa.” ²¹ Hi nkama wolowo vanhu a va ha tama va mu nyimela, naswona va sungule ku hlamala hileswi a a hlwela ku huma tempeleni. ²² Nkama a nga huma a a nga ha swi koti ku vulavula na vona hikusa se a a li mbheveve. A a vulavula na vona hi ku kombetela hi mavoko, se va swi twisisa swaku a vone singita* atempeleni. ²³ Nkama masiku ya ntirho wa yena ma nga hela, a muke kaya. ²⁴ Na se ku hundze masikunyana, nsati wa yena Elizabeti a kume nyimba naswona a nga humanga kaya ka yena ku ringana 5 wa tiwheti. A a vula a ku: ²⁵ “Hikakunene Yehovha* a ni katekisile. A vone xiyimu xa mina, se a ni susa tingana.”+ ²⁶ Hi wheti ya yena ya wu 6, Xikwembu xi rhume ntsumi Gabriyele+ aGalileya ka doropa leli vitaniwaka Nazareta, ²⁷ yi ya ka ntombhi*+ leyi a yi tshembisane muchadu ni wanuna lweyi a vitaniwaka Yosefa wa ndjangu wa Davhida, vito la ntombhi yoleyo a ku li Mariya.+ ²⁸ Ntsumi yi fike ka Mariya yi ku: “Xowani, wena lweyi a nga katekisiwa, Yehovha* a na wena.” ²⁹ Kambe a karhateke swinene hi mhaka ya leswi a nga swi twa, a za a tivutisa swaku i maxowetela muni lawa. ³⁰ Kutani ntsumi yi ku: “U nga chavi Mariya, hikusa Xikwembu xi ku katekisile. ³¹ Phela u ta kuma nyimba naswona u ta psala n’wana wa djaha;+ kutani u ta mu chula vito la Yesu.+ ³² N’wana lweyi a ta hloniphiwa swinene+ naswona a ta vitaniwa N’wana wa Lweyi A Nga Tlakuka Hintamu+ naswona Yehovha* Xikwembu a ta mu nyika xitshamu xa wuhosi xa papayi wa yena Davhida,+ ³³ a ta va Hosi ya ndjangu wa Yakobe hi masiku ni masiku, Mfumu wa yena wu ta fuma hi masiku ni masiku.”+ ³⁴ Kambe Mariya a vutisa ntsumi a ku: “Se swi ta yendlekisa ku yini swoleswo, hikusa a ni se tshama ni yetlela ni wanuna?”+ ³⁵ Ntsumi yi mu hlamula yi ku: “Moya wa ku kwetsima wu ta va henhla ka wena,+ naswona matimba ya Xikwembu Xa Ku Tlakuka Hintamu ma ta ku funengeta. Hi mhaka leyo, n’wana yelweyo a ta kwetsima+ naswona a ta vitaniwa N’wana wa Xikwembu.+ ³⁶ Elizabeti xaka la wena na yena a ni nyimba ya 6 wa tiwheti naswona a ta psala n’wana wa djaha hambileswi a nga guga naswona vanhu a va vula swaku a nge he psali; ³⁷ hikusa Xikwembu a xi tsandziwi hi nchumu.”+ ³⁸ Kutani Mariya a ku: “Ni mutirheli wa Yehovha!* A swi yendleke hi ku ya hi leswi a nga swi hlaya.” Se ntsumi yi famba. ³⁹ Ka masiku wolawo, Mariya a suke hi ku hantlisa a ya ka tiko la tintshava, ka doropa la Yuda, ⁴⁰ a fika a nghena kaya ka Zakariya, se a xoweta Elizabeti. ⁴¹ Nkama Elizabeti a nga twa rito la Mariya, n’wana lweyi a a li ka khwirhi la yena a tlulatlula. Se Elizabeti a tala hi moya wa ku kwetsima, ⁴² kutani a huwelela a ku: “U katekile xikarhi ka vavasati, naswona Xikwembu a xi mu katekise n’wana lweyi a nga ka khwirhi la wena! ⁴³ No va mani mina ku za ni yendzeliwa hi mamani wa Hosi ya mina? ⁴⁴ Loko ni twe rito la wena nkama u nga ni xoweta, n’wana lweyi a nga ka khwirhi la mina a tlulatlulile hi ku tsaka. ⁴⁵ Naswona wa tsaka lweyi a nga tshemba timhaka leti, hikusa swilo hinkwaswu leswi a nga byeliwa swona hi Yehovha* swi ta hetiseka.” ⁴⁶ Kutani Mariya a ku: “Ni dzunisa Yehovha,*+ ⁴⁷ naswona mbilu ya mina ya tsaka swinene hi mhaka ya Xikwembu Muponisi wa mina,+ ⁴⁸ hikusa xi vone wusiwana la mina mutirheli wa xona.+ Ku sukela swoswi tinxaka hinkwatu ti ta vula swaku ni katekisiwile,+ ⁴⁹ hikusa Xikwembu xa matimba hinkwawu xi ni yendlele swaswinene, vito la xona la kwetsima,+ ⁵⁰ naswona hinkwavu lava xi chavaka+ xi ta va komba timpsalu hi masiku ni masiku. ⁵¹ Hinkwaswu a swi yendle hi voko la yena la matimba; kasi lava titlakusaka* a va hangalasile.+ ⁵² A wise vafumi lava nga ni matimba,+ a tlakusa lava tivekaka hansi;+ ⁵³ lava nga ni ndlala a va phamelile swaswinene va xurha,+ kasi lava ku ganya a va tlhelise va nga na nchumu. ⁵⁴ A pfune mutirheli wa yena Israyele, leswaku a kombisa swaku wa xi khumbuka xitshembiso xa yena xa ku kombisa timpsalu hi masiku ni masiku,+ ⁵⁵ hi ku ya hi leswi a nga swi vula ka Abrahamu ni vana* va yena+ ni le ka vavhovho va hina.” ⁵⁶ Mariya a tshame na yena kolomuyani ka 3 wa tiwheti, a gama a muka. ⁵⁷ Se ku fika nkama wa leswaku Elizabeti a psala, kutani a psala n’wana wa djaha. ⁵⁸ Loko vavhizinyu ni maxaka ya yena va twa swaku Yehovha* a mu katekisile, va tsaka na yena.+ ⁵⁹ Hi siku la wu 8 va tile va ta tsema nsuvu* wa n’wana wa vona,+ naswona a va lava ku mu chula vito la papayi wa yena, Zakariya. ⁶⁰ Kambe mamani wa yena a ku: “Ihim! Vito la yena a ta va Yohani.” ⁶¹ Se va ku: “A ku na munhu lweyi a nga ni vito lelo ka maxaka ya wena.” ⁶² Kutani va vutisa papayi wa n’wana hi ku vulavula na yena na va tirhisa mavoko leswaku a a lava a chuliwa vito lihi. ⁶³ Se a kombela xipulangwani se a tsala a ku: “Vito la yena i Yohani.”+ Se hinkwavu va hlamala. ⁶⁴ Hi nkama wolowo nomo wa yena wu pfuleka ni lirimi la yena li chunseka se a sungula ku vulavula+ ni ku dzunisa Xikwembu. ⁶⁵ Kutani hinkwavu lava tshamaka ka ndhawu yoleyo va sungula ku chava, kutani timhaka leti hinkwatu ti hangalaka ka tiko hinkwalu la Yudiya leli nga ni tintshava. ⁶⁶ Se hinkwavu lava nga swi twa va pimisa hi swona na va tivutisa va ku: “A ta va yini n’wana lweyi?” Hikusa Yehovha* a a mu seketela hikakunene. ⁶⁷ Se papayi wa yena Zakariya a tala hi moya wa ku kwetsima, a profeta a ku: ⁶⁸ “A ku dzunisiwe Yehovha* Xikwembu xa Israyele,+ hikusa a va twele wusiwana vanhu va yena kutani a va ponisa.+ ⁶⁹ A hi nyike muponisi+ lweyi a nga ni matimba lweyi a humaka ka ndjangu wa mutirheli wa yena Davhida,+ ⁷⁰ hi ku ya hi leswi a nga swi vula hi ku tirhisa vaprofeta va yena va ku kwetsima va khale.+ ⁷¹ A vulavule hi ku hi ponisa ka valala va hina ni le ka mavoko ya hinkwavu lava hi nyenyaka.+ ⁷² Naswona a ta hetisisa leswi a nga swi tshembisa vavhovho va hina ni ku tlhela a komba vanhu timpsalu, ni ku khumbuka ntwananu wa yena wa ku kwetsima,+ ⁷³ ku nga leswi a nga swi funga ka vhovho wa hina Abrahamu,+ ⁷⁴ leswaku hi ta mu gandzela na hi nga chavi nchumu loko se a hi ponisile ka mavoko ya valala va hina ⁷⁵ leswaku hi ta tshembeka ka yena hi tlhela hi yendla swa ku lulama wutomi la hina hinkwalu. ⁷⁶ Kambe loko ku li wena n’wananga, u ta vitaniwa muprofeta wa Xikwembu Xa Ku Tlakuka Hintamu, hikusa Yehovha* a ta rhanga a rhuma wena u ya lunghiselela tindlela ta yena,+ ⁷⁷ kuva a djondzisa vanhu va yena leswaku a ta va ponisa hi ku va rivalela swidjoho swa vona,+ ⁷⁸ hi mhaka ya ntwelawusiwana wa Xikwembu xa hina. Hi ta vona ku vonakala loku humaka tilweni ku voninga ku fana ni nhlikanhi, ⁷⁹ ku ta voningela lava tshamaka munyameni ni le ndzhutini wa lifu,+ ni ku hi komba leswi hi nga swi yendlaka leswaku hi va ni ku rhula.” ⁸⁰ Yohani a kulile a tlhela a tiyisiwa hi moya wa ku kwetsima wa Xikwembu; a a tshama mananga anze ku fika siku leli a nga humelela hi lona ka Vayisrayele.