Mahungu Ya Ku Tsakisa Ya Ku Tsaliwa Hi Matewu 22:1-46
22 Yesu a tlhela a va djondzisa hi ku tirhisa swifaniso a ku:
2 “Mfumu wa matilo wu nga fanisiwa ni hosi leyi nga yendlela n’wana wa yona fexta la muchadu.+
3 Kutani yi rhuma vatirhi va yona ku ya vitana lava nga rhambiwa ka fexta, kambe va yala ku ta.+
4 Yi tlhela yi rhuma vatirhi van’wani yi ku: ‘Byelani lava nga rhambiwa mi ku: “Se ni swekile swakudla, ni dlayile tihomu ni swifuyu swa mina swa ku nona naswona minchumu hinkwayu se yi lunghile. Tanani muchadwini.”’
5 Kambe varhambiwa a va nga na mhaka na swona; va tifambela, mun’wani a ya ka masimu ya yena, mun’wani a ya ka mintirho ya yena ya ku xavisa;+
6 kasi lavan’wani va khoma vatirhi va hosi va va bukutela va gama va va dlaya.
7 “Se hosi yi kwata hintamu, yi rhuma masonchwa ya yona ma ya dlaya vadlayi volavo ni ku hisa doropa la vona.+
8 Kutani yi byela vatirhi va yona yi ku: ‘Phela fexta la muchadu se li lunghile, kambe lava a va rhambiwile a va nga faneleki.+
9 Hi mhaka leyo, fambani ka tindlela tatikulu, mi ya rhamba mun’wani ni mun’wani lweyi mi nga ta mu kuma swaku a ta ka fexta la muchadu.’+
10 Se vatirhi va huma va ya ka tindlela tatikulu, va ya rhamba hinkwavu lava va nga va kuma, va ku yendla swa ku biha ni lava yendlaka swaswinene; kutani yindlo yi tala hi varhambiwa lava nga ta fexteni.
11 “Nkama hosi yi nga nghena swaku yi ta vona lava nga rhambiwa, yi vone munhu lweyi a a nga yambalanga mpahla ya muchadu.
12 Se yi ku: ‘He nduwe, u nghenise ku yini lomu na u nga yambalanga mpahla ya muchadu?’ A miyela a ku tititi.
13 Se hosi yi byela vatirhi va yona yi ku: ‘Mu boheni mavoko ni minenge mi mu txukumeta handle ka munyama. Hi lanu a nga ta ba nkosi a tlhela a karhateka.’*
14 “Hikusa i vanyingi lava nga rhambiwa, kambe i vatsongo lava nga langiwa.”
15 Kutani Vafarisi va suka va ya yendla maplanu* leswaku va ta zama ku mu phasa hi leswi a a ta swi vula.+
16 Kutani va rhuma vadjondzisiwa va vona xikan’we ni vaseketeli va Heroda+ va fika va ku: “Mudjondzisi, ha swi tiva swaku u ni ntiyiso ni leswaku u djondzisa ntiyiso hi Xikwembu, naswona a wu xaveleli munhu hikusa a wu txuvuki leswi munhu a nga xiswona.
17 Se hi byele mavonelo ya wena ka mhaka leyi: Swa pfumeleliwa ku hakela rhesa* ka Khezari kumbe a swi pfumeleliwi?”
18 Kambe Yesu, hi ku tiva maplanu ya vona ya ku biha a ku: “Vakanganyisi ndzin’wina, hi mhaka muni mi ni ringa?
19 Ni kombeni male ya nsimbi leyi tirhisiwaka ku hakela rhesa.” Va mu tisela denari.*
20 A ku: “Xifaniso lexi ni marito lawa i swa mani ke?”
21 Va ku: “I swa Khezari.” Se a ku: “Hi mhaka leyo, tlhelisani swa Khezari ka Khezari, kambe swa Xikwembu ka Xikwembu.”+
22 Nkama va nga twa leswo, va hlamala, va suka va famba va mu siya.
23 Hi siku lolelo, Vasaduki lava kholwaka swaku vafi a va nga ta pfuxiwa,+ va ta ka Yesu va fika va mu vutisa va ku:+
24 “Mudjondzisi, Moxe a te: ‘Loko wanuna a fa na a nga na vana, makwavu wa mufi a fanele a chada ni wansati yelweyo wa ku feliwa hi nuna leswaku a pfuxa ndjangu wa makwavu lweyi a nga fa.’+
25 Se a mhaka hi leyi: A ku ni 7 wa vamakwavu; wa matevula a chadile a gama a fa, se leswi a a nga na vana, makwavu a sale a chada ni nsati wa mufi.
26 Swi yendlekisa swoleswo ni ka makwavu wa mufi wa wumbirhi ni ka wa wunharhu, anze hinkwavu va 7 va hela va ku jii.
27 Hi wugamu, na yena wansati a fa.
28 Se loko vafi va ta pfuxiwa, a ta va nsati wa mani ka lava 7 ke? Hikusa hinkwavu va mu chadile.”
29 Yesu a va hlamula a ku: “Mi lahleke hintamu, hikusa a mi ma tivi Matsalwa hambi matimba ya Xikwembu;+
30 hikusa loko vafi va ta pfuxiwa, vavanuna a va nga ha ta chada naswona vavasati a va nga ha ta chadiwa, kambe va ta fana ni tintsumi ta le tilweni.+
31 Loko swi ta ka ku pfuxiwa ka vafi, a mi lerhanga leswi Xikwembu xi nga mi byela swona nkama xi nga ku:
32 ‘Hi mina Xikwembu xa Abrahamu, xa Izaki ni xa Yakobe’?+ A hi Xikwembu xa lava nga fa, kambe i xa lava hanyaka.”+
33 Nkama vanhu va nga twa leswo, va hlamalisiwa hi madjondzisela ya yena.+
34 Nkama Vafarisi va nga twa swaku Yesu a miyete Vasaduki, va hlengeletana va mu yela.
35 Kutani mun’we ka vona, lweyi a a wu tiva kahle Nawu, a mu ringa a ku:
36 “Mudjondzisi, hi wihi nawu wa lisima ku tlula hinkwayu ka Nawu wa Moxe?”+
37 A ku: “‘U fanele u rhandza Yehovha* Xikwembu xa wena hi mbilu ya wena hinkwayu, hi wutomi la wena hinkwalu ni hi mimpimiso ya wena hinkwayu.’+
38 Lowu hi wona nawu wa lisima ni wa ku sungula ka hinkwayu.
39 Wa wumbirhi wa ku fana na wona wu li: ‘U fanele u rhandza vanhu van’wani ku fana ni leswi u tirhandzisaka swona.’+
40 Minawu hinkwayu ni marito ya Vaprofeta+ swi huma ka minawu leyimbirhi.”
41 Loko Vafarisi va hlengeletanile, Yesu a va vutisa a ku:+
42 “Mi pimisa yini hi Kreste? I n’wana wa mani ke?” Va mu hlamula va ku: “I n’wana wa Davhida.”+
43 A va vutisa a ku: “Se ina ka, hi mhaka muni Davhida hi ku kongomisiwa hi moya wa ku kwetsima+ a mu vitane Hosi, a ku:
44 ‘Yehovha* a byela Hosi ya mina a ku: “Tshama ka voko la mina la xinene anze ni veka valala va wena hansi ka minkondzo ya wena”’?+
45 Kutani loko Davhida a mu vitana Hosi, se i n’wana wa yena hi mhaka muni?”+
46 A ku na munhu lweyi a nga tiya a mu hlamula rito ni lin’we, naswona ku sukela siku lolelo, a ka ha vanga ni munhu lweyi a nga xinyata a tlhela a mu vutisa swin’wani.
Tinhlamunselu ta le hansi
^ Hi Xigriki: “a phorhela matinyu.”
^ Kumbe: “makungu”.
^ Kumbe: “impoxtu; tinemba”.
^ Vona Xiyengetelo B14.
^ Vona Xiyengetelo A5.
^ Vona Xiyengetelo A5.
