Mahungu Ya Ku Tsakisa Ya Ku Tsaliwa Hi Matewu 23:1-39
23 Kutani Yesu a vulavula ni xitshungu ku patsa ni vadjondzisiwa va yena a ku:
2 “Vatsali ni Vafarisi va tiveke ka xitshamu xa Moxe.
3 Se yendlani hinkwaswu leswi va mi byelaka swona, kambe mi nga ringiseleni leswi va swi yendlaka, hikusa va vula hi nomo ntsena, kambe a va swi yendli.+
4 Va bohelela mindzhwalu ya ku tika va yi rhwexa vanhu,+ kuve hambi vona a va swi lavi ni ku yi susumeta hi litiho la vona.+
5 Hinkwaswu leswi va swi yendlaka va swi yendlela ku voniwa hi vanhu,+ naswona va kulisa swikaxani* leswi nga ni matsalwa leswaku va tivhikela ka swa ku biha,+ va tlhela va lehisa tiponta ta mpahla ya vona.+
6 Va rhandza ku tshama ka tindhawu leti nga vekeliwa vanhu va ku hlonipheka lomu mafexteni ni ka switshamu swa lisima ka masinagoga,*+
7 ni ku xowetiwa mabazara ni ku vitaniwa Rabi.*
8 Kambe n’wina, mi nga tshuki mi vitaniwa Rabi, hikusa Mudjondzisi wa n’wina+ i mun’we ntsena, naswona n’wina hinkwenu mi vamakwavu.
9 Mi nga tshuki mi vitana munhu wa lani misaveni mi ku i papayi wa n’wina, hikusa Papayi wa n’wina i mun’we ntsena,+ Lweyi a nga tilweni.
10 Naswona mi nga vitaniwi varhangeli, hikusa Murhangeli wa n’wina i mun’we ntsena, ku nga Kreste.
11 Kambe wamukulu ka n’wina a fanele a va mutirhi wa n’wina.+
12 Lweyi a titlakusaka a ta vekiwa hansi,+ kasi lweyi a tivekaka hansi a ta tlakusiwa.+
13 “Yowee n’wina vatsali ni Vafarisi, vakanganyisi ndzin’wina! Hikusa mi pfalela vanhu ku nghena ka Mfumu wa matilo; n’wina a mi ngheni naswona mi pfalela lava lavaka ku nghena.+
14 * ——
15 “Yowee n’wina vatsali ni Vafarisi, vakanganyisi ndzin’wina!+ Hikusa mi tlulela lwandle mi ya ka tindhawu ta le kule leswaku mi ta koka munhu mun’we ntsena kuva a nghena ka wukhongeli la Xiyuda, naswona loko mi mu kumile, mi mu yendla lweyi a faneliwaka hi Gehena* ku tlula n’wina.
16 “Yowee n’wina vakongomisi lava nga fa matihlo!+ Hikusa mi li: ‘Loko munhu a funga hi tempele, a hi swa nchumu; kambe loko a funga hi woru leli nga ka tempele, a boheka ku swi hetisisa.’+
17 N’wina swiphunta ni lava nga fa matihlo! A xaxikulu i yini: I woru kumbe i tempele leyi yendlaka woru li kwetsima?
18 Naswona mi li: ‘Loko munhu a funga hi altari, a hi swa nchumu; kambe loko a funga hi munyikelo lowu nga ka yona, a boheka ku swi hetisisa.’
19 N’wina lava nga fa matihlo! A xaxikulu i yini: I munyikelo kumbe i altari leyi yendlaka swaku munyikelo wu kwetsima?
20 Hi mhaka leyo, lweyi a fungaka hi altari, a funga hi yona ni hi minchumu hinkwayu leyi nga ka yona;
21 naswona lweyi a fungaka hi tempele, a funga hi yona ni hi Lweyi a tshamaka ka yona;+
22 funtshi lweyi a fungaka hi matilo, a funga hi xitshamu xa Xikwembu xa wuhosi ni hi Lweyi a nga tshama ka xona.
23 “Yowee n’wina vatsali ni Vafarisi, vakanganyisi ndzin’wina! Hikusa mi humesa swa wukhume swa minti, swa aneta ni swa kominyo,*+ kambe a mi na mhaka ni leswi nga swa lisima hintamu ka Nawu, ku nga ku lulama,+ timpsalu+ ni ku tshembeka. A swi boha ku yendla swilo leswi, kambe a mi nga fanelanga mi tshika ku yendla leswin’wani.+
24 N’wina vakongomisi lava nga fa matihlo,+ mi sefa nsuna+ kambe mi minta kamela!+
25 “Yowee n’wina vatsali ni Vafarisi, vakanganyisi ndzin’wina! Hikusa mi hlampsa kopo ni paratu+ hi le handle kuve ndzeni swi tale hi makwanga*+ ni chaka.+
26 N’wina Vafarisi lava nga fa matihlo, rhangani hi ku hlampsa ndzeni ka kopo ni ka paratu, se hi kona mi nga ta swi hlampsa hi le handle swaku swi basa.
27 “Yowee n’wina vatsali ni Vafarisi, vakanganyisi ndzin’wina!+ Hikusa mi fana ni masirha lama nga pendiwa hi pendi la ku basa,+ lawa ma vonekaka ma sasekile hi le handle kuve ndzeni ka wona ma tale hi marhambu ya vafi ni chaka la ku hambanahambana.
28 Hi ku fana, hi le handle mi tikomba mi lulamile ka vanhu, kambe ndzeni mi tale hi wukanganyisi ni swilo swa ku kala nawu.+
29 “Yowee n’wina vatsali ni Vafarisi, vakanganyisi ndzin’wina!+ Hikusa mi yaka masirha ya vaprofeta mi tlhela mi sasekisa masirha ya lava ku lulama+
30 mi gama mi ku: ‘Loko a hi hanyile minkameni ya vavhovho, a hi nga ta va pfuna ku dlayetela vaprofeta.’
31 Hi ku vula leswo, mi tivula hi n’wexe swaku mi vana va lava nga dlaya vaprofeta.+
32 Kutani hetiselani leswi vavhovho va n’wina va nga swi sungula.*
33 “N’wina vana va tinyoka leti nga ni vhenenu,*+ mi nga ku balekisa ku yini ku yavanyisiwa ni ku txukumetiwa Gehena?*+
34 Hi mhaka leyo, ni mi rhumela vaprofeta+ ni vanhu va ku tlhariha ni vadjondzisi.+ Van’wani mi ta va dlaya+ mi va gongondzela ka timhandzi, naswona van’wanyani mi ta va ba+ ka masinagoga ya n’wina ni ku va xanisa+ ka madoropa ya ku hambanahambana,
35 leswaku ngati hinkwayu ya lava ku lulama, leyi nga halatiwa misaveni yi va henhla ka n’wina, ku sukela ka ngati ya Abele+ lweyi a a lulamile, ku ya fika ka ngati ya Zakariya n’wana wa Barakiya, lweyi mi nga mu dlaya xikarhi ka tempele ni altari.+
36 Ni mi byela ntiyiso: Vanhu va nguva leyi va ta khatisiwa hi mhaka ya swilo leswi hinkwaswu.
37 “Yerusalema, Yerusalema, mudlayi wa vaprofeta ni lweyi a va baka hi maribye lava rhumiwaka ka wena+ . . . I kangaki ni nga lava ku hlengeleta vana va wena, ku fana ni leswi huku yi hlengeletisaka xiswona switxiwani swa yona hansi ka timpapa ta yona! Kambe a wu swi lavanga.+
38 Phela Xikwembu xi ta yi tsukula yindlo* ya n’wina.+
39 Hikusa na mi byela swaku ku sukela swoswi, a mi nga ha ta ni vona anze ku fika siku leli mi nga ta ku: ‘A katekile lweyi a taka hi vito la Yehovha!’”*+
Tinhlamunselu ta le hansi
^ Swikaxani leswi a swi bohiwa ka ximombo ni le ka voko la ximatsi.
^ I tindhawu leti Vayuda a va kumana ka tona swaku va khongela va tlhela va lerha matsalwa.
^ Kumbe: “Mudjondzisi.”
^ Vona Xiyengetelo A3.
^ Vona Ntlhamuselo.
^ Minti, aneta ni kominyo i minchumu leyi tirhiseliwaka ku temperara swakudla.
^ Ku nga ku navela kakukulu ka swilo swa vanhu van’wani.
^ Hi Xigriki: “tatisani mpimu wa vavhovho va n’wina.”
^ Kumbe: “timhiri”.
^ Vona Ntlhamuselo.
^ Ku nga tempele.
^ Vona Xiyengetelo A5.
