Vanhu va vanyingi va tirhise leswi nga ka Bibele, leswi nga kombisiwa ka tinhlokomhaka leti swaku va kota ku tsuvula xikheto ka timbilu ta vona. Kambe ku vula ntiyiso a hi nge swi koti ku tsuvula xikheto hinkwaxu hi hoxe. Se i mpsini swi nga hi pfunaka?

Mimfumu ya vanhu a yi swi koti ku helisa xikheto. Kambe leswo a swi vuli swona swaku a ku na mfumu lowu nga kotaka ku xi helisa.

A mfumu lowu nga helisaka xikheto wu fanele:

1. 1. Wu pfuna vanhu va txintxa mapimiselo ya vona ni leswi va titwisaka xiswona hi vanhu van’wana.

2. 2. Wu pfuna vanhu lava swi va tikelaka ku va khoma kahle vanhu van’wana hileswi na vona va kalaka va nga khomiwanga kahle.

3. 3. Wu va ni varhangeli lava kalaka va nga na xikheto.

4. 4. Wu yentxa swaku vanhu hinkwavu va twanana.

Bibele li hi byela swaku Xikwembu hi xona xi nga ni mfumu wolowo. Naswona wu vitaniwa swaku i “Mfumu wa Xikwembu.” — Luka 4:43.

Vona leswi mfumu wolowo wu nga ta swi yentxa.

“Lava tshamaka ka yona [misava] va ta djondza ku lulama.” — ESAYA 26:9.

“A ku lulama ka ntiyisu ku ta yentxa swaku ku va ni ku rhula, naswona a ku lulama ka kakunene ku ta yentxa swaku vanhu va tshamiseka va tlhela va nga chavi nchumu hi lani ku nga heliki.” — ESAYA 32:17.

Swi vula yini leswi? Swi vula swaku a Mfumu wa Xikwembu wu ta djondzisa vanhu swilo swa ku lulama. Loko vanhu va ta djondza ku hambanisa swa swinene ni swa ku biha, va ta txintxa leswi va titwisaka xiswona hi vanhu van’wana. Hinkwavu va ta swi twisisa swaku leswi va faneleke va swi yentxa i ku rhandza vanhu van’wana.

‘Xikwembu xitasula minhloti hinkwayu matihlweni ya vona, ni lifu alingahatava kona; hambi mali mahlomulu kumbe kurila kumbe kuvaviseka aswingahatava kona, hikuva leswosungula se swihundzile.’ — NHLAVUTELO 21:4.

Swi vula yini leswi? Swi vula swaku a Mfumu wa Xikwembu wu ta helisa wubihi hinkwalu. Hambi lava a va nga khomiwi kahle a va nga ta va ni xivangelo xa ku kwatela van’wana.

“Angatayavanyisa hikuya hi leswi aswivonaka hi matihlo ya yena, kumbe kulaya hikuya hi leswi twiwaka hi tindleve ta yena. Atayavanyisa swisiwana hi kululama, naswona atalaya hi ndlela leyinene leswaku apfuna lavorhula va laha misaveni.” — ESAYA 11:3, 4.

Swi vula yini leswi? Swi vula swaku Yesu Kreste lweyi a nga Hosi ka Mfumu wa matilo, a ta fuma vanhu hinkwavu na a nga na xikheto. Yesu a nga voni vanhu va tiku lin’we na va yampsa ku tlula vanhu va tiku lin’wana. Naswona a ta yentxa swaku vanhu hinkwavu va yingisa minawu ya yena.

Mfumu wa Xikwembu wu djondzisa vanhu swaku va va ni ‘miyehleketo yofana, ni lirhandzu lofana, ni moya wun’we, ni kuyanakanya kun’we.’ — VAFILIPIYA 2:2.

Swi vula yini leswo? Swi vula swaku Mfumu wa Xikwembu wu ta yentxa vanhu hinkwavu va twanana. Vanhu hinkwavu va ta twanana hi ku helela hikusa va ta va na va rhandzana.