A MUZIKA a ku li xiyenge xa lisima swinene ka wutomi la Vayisrayele. Loko hi lerha Bibele hi kuma leswaku ku kombisiwa a vanhu va ku hambanahambana na va chaya, va tlhela va yimbelela a tinsimu. Lona Bibele hi loxe li ni mabuku man’wani lama nga ni tinsimu. Hi xikombiso a buku la Tipisalema, Lisimu La Solomoni ni la Swirilo i mabuku lawa ma nga tala hi tinsimu. A buku lin’wani loko li vulavula hi vanhu va khale li te: “Leswo swi kombisa swaku a ku yimbelela a ku li xiyenge xa lisima ka wutomi la Vayisrayele; a va yendla leswo ka mintirho ya vona ya siku ni siku.”

A va yimbelela ka wutomi la vona la siku ni siku. A Vayisrayele a va chaya, va txina va tlhela va yimbelela loko va tsakile. (Esa. 30:29) Hi xikombiso, a vavasati a va chaya, va yimbelela va tlhela va txina na va tsakile leswaku va kulungela a hosi ya nyuwani ni loko Vayisrayele va hlulile nyimpini va tlhela va yimbelela ka mafexta lawa a va ma yendla leswaku va dzunisa Yehovha. (Vay. 11:34; 1 Sa. 18:6, 7; 1 Tih. 1:39, 40) A va tlhela va yimbelela leswaku va kombisa ku vaviseka loku a va ku twa loko ku fe munhu. (2 Tik. 35:25) Hilani buku lin’wani li vulaka hi kona “a ku yimbelela a swi li swa lisima hintamu ka wutomi la Vayisrayele.”

Ku yimbelela a swi li swa lisima ka tihosi ta Israyele. Phela a tihosi ta Israyele a ti swi rhandza hintamu ku yimbelela. Hi xikombiso, nkama lowu Sawulo a nga va hosi, a rhambe Davhida leswaku a ta a ta yimbelela ka yindlo ya wuhosi. (1 Sa. 16:18, 23) Naswona hi ku famba ka nkama loko Davhida na yena a ve hosi, a a li ni mintlawa ya ku yimbelela atempeleni, naswona yena Davhida ku ni tinsimu leti a nga ti hamba ta ku saseka swinene. (2 Tik. 7:6; Amo. 6:5) N’wana wa yena Solomoni nkama lowu na yena a nga va hosi a a ni vanhu lava a va yimbelela ka yindlo ya wuhosi. — Ekl. 2:8.

A va yimbelela leswaku va dzunisa Yehovha. Hi xikombiso, a buku la 1 Tikronika 23:5 li vulavula hi 4.000 wa vanhu lava a va yimbelela atempeleni aYerusalema leswaku va dzunisa Yehovha. Vona a va chaya a swilo swa ku fana ni switende, tiharipa ni swa ku chaya hi swona swa nsimbi. (2 Tik. 5:12) Kambe a hi vavanuna volavo va 4.000 ntsena lava a va yimbelela, ni Vayisrayele hinkwavu a va yimbelela leswaku va mu dzunisa Yehovha. Tinsimu tin’wani leti a va ti yimbelela ti vitaniwa Tinsimu ta Ku Khupuka. (Ps. 120-134) Funtshi mabuku man’wani lawa ma vulavulaka hi ta wutomi la Vayuda ma vula leswaku a Vayuda a va yimbelela leswaku va dzunisa Yehovha a loko ku fika Paxkwa.

Ninamuntlha a ku yimbelela i swa lisima hintamu ka vanhu va Xikwembu. (Yak. 5:13) Va swi yendla leswo loko va gandzela Yehovha. (Efe. 5:19) Phela nkama lowu hi yimbelelaka swi hi tshineta kusuhi swinene ni vamakwerhu. (Kol. 3:16) Xin’wanyani, hileswaku a ku yimbelela ni ku va hi yingisela mamuzika, swi hi pfuna leswaku hi rhula mbilwini ya hina loko hi kumana ni swilo swa ku tika. (Min. 16:25) Nkama lowu hi yimbelelaka hi va hi kombisa ndlela leyi hi mu rhandzaka hi yona Yehovha ni lipfumelo leli hi nga na lona.