Xikwembu xi tshembise muprofeta Abrahamu swaku mun’we wa vatukulu va yena a a ta yentxa swaku vanhu va “matiko hinkwawu” va katekisiwa. (Genesa 22:18) I mani ntukulu wa kona?

Kolomu ka malembe ya 2.000 la ma nga hundza, Xikwembu xi nyike Yesu lweyi a a li ntukulu wa Abrahamu, matimba ya ku yentxa masingita. Masingita wolawo a ma kombisa swaku Yehovha a ta tirhisa Yesu swaku a hetisisa switshembiso leswi a nga swi tshembisa Abrahamu. — Vagalatiya 3:14.

Masingita lawa Yesu a nga ma yentxa, ma hi pfuna ku vona swaku hi yena lweyi a nga langiwa hi Xikwembu swaku a katekisa vanhu. Naswona a ma kombisa leswi Xikwembu xi nga ta swi yentxaka hi ku tirhisa Yesu. Masingita lawa Yesu a nga ma yentxa a ma kombisa wumunhu la yena.

Wunene li pfune Yesu swaku a hanyisa vanhu va ku vabya.

Siku lin’wana munhu lweyi a a ni lepra a kombele Yesu swaku a mu hanyisa. Yesu a mu khumbile a gama a ku: ‘Naswirhandza’, na ku basisa. Se lepra li nyamalala, a hanya. — Marka 1:40-42.

Ku nyika swi yentxe Yesu a phamela lava a va twa ndlala.

Yesu a a nga lavi swaku vanhu va fa hi ndlala. Makhambi man’wana hi ku tirhisa masingita a phamele xitshungu lexi a xi twa ndlala hi ku tirhisa mapawu ya matsongo ni tihlampfi ta titsongo. (Matewu 14:17-21; 15:32-38) Hinkwavu va dlile va xurha ku tlhela ku sala swakudla swa swinyingi.

Ntwelawusiwana wu yentxe swaku Yesu a pfuxa vanhu va ku fa.

A nkama Yesu a nga vona wansati wa ku feliwa hi nuna na a rila hi leswi a a feliwe hi n’wana wa yena wa mun’we ‘amutwele wusiwana’ hikusa a ku nga ha na munhu lweyi a a ta sala a mu hlayisa. — Luka 7:12-15.