Loko hi lava kutiva munhu wokarhi, hakanyingi hi rhanga hi kumu vutisa vito la yena. Loko awo vutisa Xikwembu vito la xona, xana axita ku hi xona mani?

“Hi mina Yehovha. Leli i vito la mina”. — Esaya 42:8.

Vito la Xikwembu i la lisima ka xona n’winyi. Xikwembu axi chuliwanga hi munhu a vito la xona; xiyoti nyika hi xoxe. Yehovha a te: “Leli i vito la mina hilaha kungaheliki, naswona nifanele nikhumbukiwa hi ndlela leyi kusukela ka xitukulwana xin’wana kuya ka xitukulwana xin’wanyana.” (Eksoda 3:15) Ka Bibele, vito la Xikwembu li kumeka makhambi yotala kutlula tindlela tin’wana leti xi vitaniwaka ha tona, totani hi “Wa Matimba Hinkwawo”, “Tatana”, “Hosi” kumbe “Xikwembu”; hambi kutlula mavito ya vanhu votani hi Abrahama, Moxe, Davhida kumbe Yesu. Naswona, Xikwembu xi rhandza leswaku vito la xona li tiviwa. Bibele li li: “Vanhu avaswitivi leswaku wena, lweyi vito unga Yehovha, hi wena ntsena Lweyi A Tlakukeke ahenhla ka misava hinkwayo.” — Tipisalema 83:18.

Vito la Xikwembu i la lisima ka Yesu. Ka Xikhongelo xa Hosi, Yesu a djondzise valandzeli va yena kukombela Xikwembu hi marito lamange: “Vito ra wena arihlawuleke”. (Matewu 6:9) Yesu hi ntshima a khongele Xikwembu a ku: “Tatana dzunisa vito ra wena!” (Yohane 12:28) Leswi Yesu aaswi rhangisa ka wutomi la yena aku li kuvangamisa vito la Xikwembu. Hi yona mhaka leyi anga khongela a ku: “Nivativisile vito la wena naswona nahatalitivisa”. — Yohane 17:26.

Vito la Xikwembu i la lisima ka vagandzeli va xona. Minkameni ya khale, vanhu va Xikwembu avaswi twisisa leswaku nsirhelelo ni kuchunsiwa ka vona aku fambisana ni vito leli hlawulekeke la Xikwembu. “Vito la Yehovha i xihondzo lexitiyeke. Lweyi wolulama atsutsumela ka xona ivi akuma nsirhelelo.” (Swivuriso 18:10) Naswona, “mun’wana ni mun’wana lweyi avitanaka vito la Yehovha ataponisiwa”. (Yuwele 2:32) Bibele li kombisa leswaku vito la Xikwembu alita hambanisa lavaxi gandzelaka ni lavangaxi gandzeliki. “Hikuva vanhu hinkwavo vata famba mun’wani ni mun’wani hi vito la xikwembu xa yena, kambe hina hitafamba hi vito la Yehovha, Xikwembu xa hina, hilaha kungaheliki, masiku hinkwawo.” — Mikiya 4:5; Mintirho 15:14.

Vito leli li hlawulekisa Xikwembu. Swidjondzeki swotala swi fikelela magamu ya leswaku vito la Yehovha li vula leswaku “A Yendla Leswaku Swi Va Kona”. Yehovha Xikwembu a voningele nhlamuselo ya vito la yena loko ati b’ala ka Moxe hi marito lamange: “Nitatiyendla Niva Leswi Ningatahlawula Kutiyendla Swona.” (Eksoda 3:14) Hi marito lawa, hi vona leswaku vito lelinge Yehovha ali hlamuseli ntsena leswaku Xikwembu i Mutumbuluxi wa swilo hinkwaswo. Kambe li tlhela li hlamusela leswaku Xikwembu xaswi kota kuti yendla xin’wana ni xin’wana lexi lavaka kuva xona leswaku xi hetisisa xikongomelo xa xona naswona xaswi kota kutirhisa ntumbuluku wa xona hilaha xi lavaka ha kona leswaku xi hetisisa xikongomelo xa xona. Mavitanela man’wana ya Xikwembu mangaha hlamusela wulawuli, matimba kumbe xikhundla xa xona, kambe i vito lelinge Yehovha ntsena leli nyimelaka hinkwaswo leswi xinga swona ni hinkwaswo leswi xi kotaka kuti yendla xiva swona.

Vito leli li kombisa leswaku Xikwembu xahi rhandza. A nhlamuselo ya vito la Xikwembu yi kombisa leswaku xi ya mahlweni xi rhandza ntumbuluku wa xona na hina vanhu. Naswona, kuva Xikwembu xihi byele vito la xona, swi komba leswaku xi lava hixi tiva. Kahle kahle, Xikwembu xi rhange xihi byela vito la xona nahingase vutisa. Swi le livaleni leswaku Xikwembu xi lava leswaku hixi vona tani hi Munhu wa xiviri, lweyi hinga vaka ni wunghanu na yena, hayi kuxi vona tani hi xikwembu xokarhi lexinga kule ni vanhu. — Tipisalema 73:28.

Kutirhisa vito la Xikwembu swi komba leswaku haxi rhandza. Ahinge u kombela munhu wokarhi lweyi u navelaka leswaku a va munghanu wa wena leswaku aku vitana hi vito la wena. Kambe, nkama ni nkama, wa yala kuswi yendla leswo. Xana aswitaku tsakisa? Hi kufamba ka nkama, kumbexana awuta tivutisa loko hakunene munhu lweyo a lava kuva munghanu wa wena. Swi tanu ni ka Xikwembu. Xihi tivise vito la xona hikuva xi lava leswaku hili tirhisa. Kutani, loko hi yendla leswi, hi komba Yehovha leswaku hi lava kuva vanghanu va yena. Xiya leswaku Xikwembu xava vona “lavayanakanyaka hi vito” la xona! — Malakiya 3:16.

Nchumu wosungula kuva hi tiva Xikwembu i kudjondza hi vito la xona. Kambe, aswi gameli kolano. Ku ni swin’wana leswi hi faneleke kuswi tiva. Hi fanele kutiva ni N’winyi wa vito. Hi fanele kutiva matshamelo ya wumunhu la Xikwembu.