Ka wora la kusungula ndzhaku ka loko xi velekiwile, xibebetana xi fanele xi kombiwa mamana wa xona leswaku axi khoma a tlhela axi fumbarhela. Hayini? Hikuva kuyendla leswo swi ni vuyelo lelinene ka makulele ya xona. *

I yini lexi yendlaka mamana a kombisa lirhandzu ka xibebetana xa yena lexi xahali kuvelekiwaka? Ka buku leyinge The Journal of Perinatal Education, Mudjondzisi Jeannette Crenshaw a hlamusela leswaku ndzhaku ka kuveleka a miri wa mamana wu yengetela mahormona manyingi lawa ma vitaniwaka oxitocina. Mahormona lawa “ma pfuxa mintlhaveko ya wumamana loko ali karhi a khoma xibebetana xa yena, axi langutisisa ni kuxi nyan’wisa.” Mahormona man’wana lama humesiwaka ka nkama lowu “ma pfuna mamana leswaku a twisisa ni kuyendla leswi laviwaka hi xibebetana” ni kukulisa kunavela ka yena kovulavulisana na xona. Hayini hinkwaswo leswi swihi hlamalisa?

Wuxaka la kuhlamalisa leli mamana ni xibebetana xa yena vanga na lona i nyiku leyi humaka hi ka Muvumbi wa hina wa lirhandzu, Yehovha Xikwembu. * Hosi Davhida a yise kudzuneka ka Yehovha hi kuva ‘ahumesiwile akhwirhini la mamana’ ni hileswi Yehovha amu sirheleleke amavokweni ya mamana wa yena. A khongele a ku: “Nivekiwe avokweni la wena kusukela mbelekweni; kusukela nihuma khwirini la mamana u Xikwembu xa mina.” — Tipisalema 22:9, 10.

ANAKANYISISA HI LESWI: Leswi hi ntumbuluku Yehovha a yendleke vamamana ni wuswikoti lelinga vevukiki kulitwisisa la kukhatala ni kurhandza swibebetana swa vona, hinga tiyiseka leswaku a nyikela yingiso ni kutlhela a khatala hi mun’wana ni mun’wana wa hina “rixaka kumbe vana” va yena. — Mintirho 17:29.

Yesu Kreste, lweyi a tivaka kahle Yehovha kutlula swivumbiwa hinkwaswo, a te: “Xana svindzingiri svimbirhi asvixaviwi hi ‘sentavhu’ yin’we ntsena ke? kasi akungawi ni xin’we xa svona hansi, handle ka kurhandza ka Tatana wa n’wina. Xilesvo, loko kuli n’wina, hambi yili misisi ya tinhloko ta n’wina yihlayiwile hinkwayo. Hikolaho mingachaveni; n’wina mitlula svindzingiri lesvotala hi risima.” — Matewu 10:29-31.

I vantsongo lava nyikelaka yingiso ka xinyanyana xin’wana ni xin’wana xa xitsongo lexi vaxi vonaka. Hingaha vuli loko ‘xin’we xa swona xiwa’. Kambe, Tatana wa hina wa le matilweni a nyikela yingiso ka xinyanyana  xin’wana ni xin’wana! Kambe xiya leswaku swinyanyana — hambi swili swinyingi — aswi na lisima kutlula hina vanhu. Xana leswi swihi djondzisa yini? Unga tshuki ‘uchava’, kutani u pimisa leswaku Xikwembu axi nyikeli yingiso ka wena. Kuhambana ni leswo, tiyiseka leswaku xi ni mhaka na wena!

Matsalwa mahi tiyisa

• “Emahlweni ka Xikwembu, kuhava xivumbiwa ni xin’we lexitumbeleke. Hinkwasvu sviyo tlandlala, rivaleni”. — Vaheveru 4:13.

• “Matihlo ya Yehovha ma le henhla ka lavolulama, ni tindleve ta yena tavayingisa loko varilela kupfuniwa.” — Tipisalema 34:15.

• “Nitatsaka ngopfu hikolaho ka lirhandzu la wena la kutshembeka, Hikusa ukuvonile kukarhateka ka mina, Wakutiva kuvaviseka lokukulu loku ninga na kona” — Tipisalema 31:7.

Xana kutiva leswaku Yehovha wa khatala hi swilo hinkwaswo leswi hiswi yendlaka swingava ni vuyelo lokarhi awuton’wini la hina? Ina, swingava na lona. Ana, * wa le Inglatera wa hlamusela:

“Makhambi manyingi ani pimisa leswaku Xikwembu axingani rhandzi ni leswaku axinga hlamule swikhongelo swa mina. Ani pimisa leswaku axi yendla leswo hi mhaka ya leswi aninga li na lipfumelo. Ani tivona ninga li wa lisima ka xona naswona ani titwa ingi nokhatisiwa kumbe kupapalatiwa hi xona. Ani pimisa leswaku Xikwembu axinga na mhaka na mina.”

Hambiswilitano, swoswi Ana angaha kanakani leswaku Yehovha wamu rhandza ni leswaku a ni mhaka na yena. I yini leximu pfuneke kuhlula kunakana loko? Wa hlamusela: “Leswo swi yendleke katsongokatsongo. Ni khumbuka nkulumi ningayi twa malembendzhaku, leyi ayi vulavula hi lifu la Yesu. Nkulumi liyani yini khumbe hintamu naswona yini tiyisekise leswaku Xikwembu xani rhandza. Loko ni vona ndlela leyi xi hlamulaka ha yona swikhongelo swa mina, ni huma ni mihloti hi kuvona leswaku phela hi kakunene, xani rhandza. Kudjondza Bibele ni kuva kona minhlanganwini ya Wukreste swini yendle leswaku niya ni tiva Yehovha, wumunhu la yena ni ndlela leyi a titwaka hi yona hi hina vanhu. Swoswi naswi vona leswaku Yehovha wahi seketela, wahi rhandza naswona a tiyimiselile kukhatalela mun’wana ni mun’wana wa hina.”

Leswi Ana aswi vuleke swi thova mbilu. Kambe, i yini leswingaku tiyisekisaka leswaku Xikwembu xayi twisisa naswona axiyi rivali ndlela leyi u titwaka ha yona? Nhlokomhaka leyi landzelaka yita hlamula xivutiso lexi.