Anakanya hi wuxaka la kuhlawuleka ni la kuhlamalisa leli mahahla manga na lona. * Nancy Segal, lweyi anga hahla tlhelo mulanguteli wa ndzawulu leyi djondzaka wuxaka la mahahla, a hlamusele leswaku mahahla man’wana ma vulavulisana ma tlhela ma twisisana hi kuhelela. Wansati mun’wana lweyi anga hahla a vule leswi: “Ni tiva hinkwaswo hi hahla la mina naswona lona li tiva hinkwaswo hi mina.”

Xana leswi swi kotekisa kuyini? Hambileswi ndhawu leyi mahahla ma kulisiwaka ka yona ni ndlela leyi vapsali vama khatalelaka ha yona swi khumbaka wuxaka la wona, vativi va vula leswaku wuxaka leli li koteka hileswi havambirhi va humaka hi ka maselula lama fanaka.

ANAKANYISISA HI LESWI: Muvumbi wa maselula a tiva mun’wana ni mun’wana wa hina kuyampsa kutlula ndlela leyi hina hi titivisaka xiswona. Davhida a tsale a ku: “Unihlayisile akhwirini la mamana wa mina. Marhambu ya mina amangafihlekanga ka wena. . . . Matihlo ya wena manivonile loko nahali xitumbulukwa; swiphemu swa xona hinkwaswo switsaliwe abukwini ya wena”. (Tipisalema 139:13, 15, 16) Yehovha ango tiva ntsena selula leli hi vumbiweke ha lona, kambe a tiva ni swilo leswihi humeleleke awuton’wini leswi khumbeke wumunhu la hina. Wutivi leli Yehovha anga na lona la ndlela leyi hi vumbisiweke xiswona lihi tiyisekisa leswaku hi kakunene wahi twisisa hilaha kuheleleke.

Davhida a khongelile: “Oho Yehovha, unilavisisile, naswona wanitiva. Wena utiva kutshama ka mina ni kunyima ka mina. Utiva miyanakanyo ya mina nayaha le kule. Aku na rito alirimini la mina, kambe waswivo! Wena Yehovha, se uswitiva kahle.” (Tipisalema 139:1, 2, 4) Yehovha wayi tiva ndlela leyi hi titwaka ha yona hi le ndzeni naswona “axiya lomu miyanakanyo ya munhu yibyekemelaka kona.” (1 Tikronika 28:9; 1 Samuwele 16:6, 7) Xana tindzimana leti tihi djondzisa yini?

Hambileswi minkama yin’wana hingaswi kotiki kuphofula ndlela leyi hi titwaka ha yona loko hi khongela ka Yehovha, hinga tiyiseka leswaku yena waswi xiya leswi hiswi yendlaka naswona waswi twisisa swivangelo leswihi susumutelaka kuswi yendla. Handle ka leswo, waswi tiva leswi hi navelaka kuswi yendla hambiloko swiyimo swa hina swingahi pfumeleli. Tani hileswi ahi rhandzaka, a tiyimiselile — naswona aswi navela hintamu — kuvona ni kutwisisa ndlela leyi hi titwaka ha yona ni swivangelo leswi yendlaka hi titwa hi ndlela yoleyo. — 1 Yohane 4:7-10.

Matsalwa mahi tiyisa

• “Mahlo ya Hosi matsakela lavolulama, ni tindleve ta yona tipfulekele svikhongelo sva vona”. — 1 Petro 3:12.

• Xikwembu xahi tshembisa: “Nitakunyika kutwisisa naswona nitakudjondzisa andleleni leyi ufaneleke ufamba ha yona. Nitakunyika ndzayu niveke tihlo la mina ahenhla ka wena.” — Tipisalema 32:8.

Xana swa pfuna kutiva leswaku Yehovha waswi xiya naswona waswi twisisa swiyimo leswi hi langutanaka na swona? Vona leswi humeleleke Ana, wa le Nigéria. A vule leswi: “Hikolaho ka swiyimo leswi ani langutana na swona, ani tivutisa leswaku naha hanyela yini. Ani li mufelakazi naswona ani ni n’wana lweyi a abaxare xibedlhela hi mhaka ya hidrocefalia (kutaleliwa hi mati ka byongo). Hi nkama wolowo, ni tsumbule leswaku ni ni kankru la mavele. Hi mhaka leyo, ni boheke kuwoperariwa ni kupetiwa ka michini makhambi ya manyingi. Handle ka leswo, ani phuza makinina ya manyingi. Aswingani vevukeli kukhatalela lihanyu la mina ni la n’wana wa mina lweyi a avabya swinene.”

I yini lexi pfuneke Ana kulangutana ni xiyimo lexi? “Ani yanakanya hi matsalwa ya kufana na Vafilipiya 4:6, 7, lama hlamuselaka leswaku ‘kurhula ka Xikwembu lokutlulaka kutwisisa hinkwaku, kutahlayisa timbilu ta n’wina ni matimba ya n’wina.’ Minkama hinkwayo leyi ani khumbuka ndzimana leyi, ani titwa ni le kusuhi na Yehovha. Leswo aswini yendla ni khumbuka leswaku Yehovha ani twisisa kuyampsa kutlula ndlela leyi ni titwisaka xiswona. Vamakwerhu lava rhandzekaka va le bandleni na vona avani tiyisa swinene.

“Hambileswi naha vabyaka, xiyimo xa mina ni xa xintombhana xa mina se xayampsa nyana. Kutiva leswaku Yehovha a na mina swini djondzisa leswaku ninga tshameli kupimisa hi xikarhato xin’wana ni xin’wana lexi ni langutanaka na xona. Yakobo 5:11 yahi tiyisa: ‘Lava hivulaka lesvaku vakatekile,hi lava vatiyiseleke. Mitwile ta kutiyisela ka Yobe, nasvona mivonile lesvi Hosi ayikongomile svona, ni hilaha Hosi yitaleke musa ni timpsalu hakona.’” Yehovha aaxi twisisa kahle xiyimo xa Yobo. Hikolaho, hinga tiyiseka leswaku ni swiyimo leswi hi langutanaka na swona waswi twisisa kahle.