Omu Baibuli ekigambo ekihindurwa nka “okuhumbuka” kiruga omu ky’Oruyonaani a·naʹsta·sis, ekirukumanyisa “kwimukya” rundi “kwongera kwimuka.” Omuntu obw’ahumbuuka aimuka kuruga omu bafu kandi ayongera afooka mwomeezi nk’oku akaba ali atakafiire.​—1 Abakolinso 15:12, 13.

 N’obukiraaba ngu ekigambo “okuhumbuuka” tikirukusangwa omu Byahandiikirwe eby’Oruheburaniya, rundi Endagaano Enkuru, enyegesa egi n’ebazibwaho. Ekyokurorraho, kurabira omu nabbi Hoseya, Ruhanga akaraganiza ati: “Ndibanunura hali amani gokuzimu; ndibacungura hali okufa.”​—Hoseya 13:14; Yobu 14:13-15; Isaya 26:19; Danieri 12:2, 13.

 Abantu abalihumbuuka baliikara nkaha? Abantu abamu bahumbuuka nibagenda omu iguru kulema nk’abakama hamu na Yesu. (2 Abakolinso 5:1; Okusuku’rwa 5:9, 10) Kunu Baibuli ekweta “kuhumbuka okwokubanza” ekirukwoleka ngu haroho okundi okulibaho hanyuma. (Okusuku’rwa 20:6) Okuhumbuuka kunu okulyongeraho nukwo kw’abantu abarukukira obwingi abarukwija kuhumbuurwa baikale omu nsi kandi begondeze omu bwomeezi oburungi.​—Zabuli 37:29.

 Abantu bahumbuurwa omu mulingo ki? Ruhanga ahaire Yesu amaani ag’okuhumbuura abafu. (Yohana 11:25) ‘Boona abali omu bituuro’ Yesu alyongera abafoole abomeezi, buli omu nk’oku akaba nasisana, enyetwaza ye, hamu n’ebyarukwijuka. (Yohana 5:​28, 29) Abo abahumbuuka bakagenda omu iguru batunga omubiri gw’omwoyo, baitu abo abahumbuuka kwikara omu nsi batunga emibiri ey’etarukurwara, eyetaine obulema, kandi ey’ehikiriire.​—Isaya 33:24; 35:5, 6; 1 Abakolinso 15:42-44, 50.

 Nibaha abarukwija kuhumbuurwa? Baibuli egamba ngu “halibaho okuhumbuka okwabahikiriire nabatahikiriire.” (Engeso Ezabakwenda 24:15) Abahikiriire nibatwarramu abaheereza ba Ruhanga abesigwa nka Nuha, Sara na Iburahimu. (Okubanza 6:9; Abaheburaniya 11:11; Yakobo 2:​21) Abatahikiriire nibatwarramu abo abataahonderaga endengo za Ruhanga habw’okuba batatunge omugisa gw’okuzegaho nukwo bazihondere.

 Baitu abo abakora ebibi eby’amaani kuhika ha rulengo ngu tibasobora kuhinduka tibarukwija kuhumbuurwa. Obu bafa bahwerekerra kandi baba bataine okunihira kwongera kufooka bomeezi.​—Matayo 23:33; Abaheburaniya 10:26, 27.

 Okuhumbuuka kulibaho di? Baibuli ekaranga ngu okuhumbuuka okw’okugenda omu iguru kwakubaireho omu kasumi k’okubaho kwa Kristo, akaatandikire omu 1914. (1 Abakolinso 15:21-23) Okuhumbuuka okw’omu nsi nikwija kubaho omu Myaka Rukumi ey’Obulemi bwa Yesu Kristo, ensi yoona obu erifooka orugonjo orurungi.​—Luka 23:43; Okusuku’rwa 20:6, 12, 13.

 Habwaki tusemeriire kwikiririza omu kuhumbuuka? Baibuli ebazaaho omu bwijwire okuhumbuuka okw’emiringo mwenda okwabaireho kwo kandi okwali kuroho n’abakaiso. (1 Ekyabakama 17:17-24; 2 Ekyabakama 4:32-37; 13:20, 21; Luka 7:11-17; 8:40-56; Yohana 11:38-44; Engeso Ezabakwenda 9:36-42; Engeso Ezabakwenda 20:7-12; 1 Abakolinso 15:3-6) Okuhumbuuka okurukuhuniriza muno nukwo okwa Lazaro, habwokuba akaba amazire ebiro bbina afiire kandi Yesu akakora ekyamahano kinu omu maiso g’abantu baingi. (Yohana 11:39, 42) Naabo abaali nibahakaniza Yesu bakaba batasobora kuhakaniza ekintu kinu, oihireho bakakora entekaniza z’okwita Yesu na Lazaro.​—Yohana 11:47, 53; 12:9-11.

 Baibuli n’eyoleka ngu Ruhanga aine obusobozi n’ekihika eky’okuhumbuura abafu. Aikara naijuka byona ebirukukwata hali buli muntu ow’arukwija kuhumbuura n’akozesa amaani ge agataine bugarukiro. (Yobu 37:23; Matayo 10:30; Luka 20:37, 38) Ruhanga aine obusobozi obw’okuhumbuura abafu kandi n’agondeza kimu kukikora! Baibuli obw’eba n’ebazaaho okuhumbuuka okurukwija kubaho, ebazaaho Ruhanga eti: “Wakugondeze omulimo gwengaro zawe.”​—Yobu 14:15.

Ebisuba ebirukukwata ha kuhumbuuka

 Ekitahikire: Okuhumbuuka nukwo kwongera kuteranizibwa okw’omwoyo n’omubiri.

 Ekihikire: Baibuli eyegesa ngu omuntu obw’afa wena afeera kimu, busaho ekicweka kye ekiikara kiri kyomeezi hanyuma y’okufa. (Okubanza 2:7 Ezekyeri 18:4) Omuntu ow’ahumbuuka tayongera kuteranizibwa n’omwoyo gwe; baitu ayongera afooka omwoyo ogwomiire rundi omuntu ayomiire.

 Ekitahikire: Abantu abamu bahumbuuka kandi aho naaho nibahwerekerezebwa.

 Ekihikire: Baibuli egamba ngu abo “abakozere okubi” balihumbuuka bacwerwe omusango. (Yohana 5:29) Baitu omusango gunu nigusigikirra ha bintu ebibalikora hanyuma y’okuhumbuuka hatali ebibaakozere batakafiire. Yesu akagamba ati: ‘Abafu balihurra iraka ly’Omwana wa Ruhanga.’ (Yohana 5:​25) Abo ‘abalihurra’ rundi abalyobera ebintu ebibalyega hanyuma y’okuhumbuuka, amabara gaabo galihandiikwa omu ‘kitabu ky’obwomeezi.’​—Okusuku’rwa 20:12, 13.

 Ekitahikire: Hanyuma y’okuhumbuuka, omuntu atunga omubiri gwonyini nk’ogw’akaba aine atakafiire.

 Ekihikire: Hanyuma y’okufa, omubiri gw’omuntu nigujunda kandi nigusobora n’okucwekacweka niguhweraho kimu.​—Omugambizi 3:19, 20.