Nk’Oku Yahandiikirwe Luka 11:1-54
11 Akaba ali omu kiikaro ekimu naasaba, obu yamazire kusaba, omu h’abegeswa be yamugambira ati: “Mukama waitu, twegese kusaba nk’oku Yohana yayegeseze abegeswa be.”
2 Yabagambira ati: “Obu muraabaga nimusaba, musabege muti: ‘Isiitwe, ibara lyawe lyezebwe. Obukama bwawe bwije.
3 Buli kiro otuhe ebyokulya byaitu kusigikirra ha bwetaago bwaitu obwa buli kiro.
4 Kandi otuganyire ebibi byaitu, habwokuba na itwe tuganyira ogu weena ou tubanja; kandi otatutwara omu kwohebwa.”
5 Hanyuma yabagambira ati: “Kakuba omu hali inywe aba aine omunywani, akagenda omu ka ye omu itumbi akamugambira ati: ‘Munywani wange nyohozaayo emigaati esatu,
6 habwokuba nabungirwa munywani wange arugire hara kandi tinyine kyokumuha.’
7 Baitu akugarukamu ali omu nju ati: ‘Leka kuntalibaniza. Mmazire ira kukinga orwigi, kandi nyowe n’abaana bange tumazire kubyama. Tindasobole kwimuka kukuha ekintu kyona.’
8 Nimbagambira nti, n’obu araaba ataimukire kumuha ekintu kyona habwokuba munywani we, baitu obu araikara naamusaba atarukujwaha, naija kwimuka amuhe kyona eki arukwetaaga.
9 Nahabweki, nimbagambira nti, mwikale nimusaba, muliheebwa; mwikale nimuserra, mulizoora; mwikale nimuteera kodi, mulikingulirwaho.
10 Habwokuba ogu weena ow’aikara naasaba aheebwa, weena ow’aserra azoora, kandi weena ow’ateera kodi, akingulirwaho.
11 Amananu gali, muzaire ki omuli inywe asobora kuha omwana we enjoka, kakuba amusaba encu?
12 Rundi nooha omuli inywe asobora kuha omwana we enge, kakuba amusaba ihuli?
13 Nahabweki, obu kiraaba ngu inywe ababi mumanyire kuha abaana banyu ebisembo ebirungi, Isiinywe ow’omu iguru talikiraho kuha omwoyo ogurukwera abo abamusaba!”
14 Hanyuma Yesu yabinga omu muntu daimooni ey’ekaba n’emulemesa kubaza. Daimooni obu yamazire kumurugamu, omusaija ogu yatandika kubaza kandi abantu boona baahunirra.
15 Baitu bamu hali bo baagamba bati: “Naabinga daimooni naakozesa Berezebbabbu, omulemi w’abadaimooni.”
16 Kandi abandi kusobora kumulenga, baatandika kumusaba akokurorraho kuruga omu iguru.
17 Obu yamanyire ebi barukuteekereza, yabagambira ati: “Obukama bwona obwebaganizaamu buhwerekerra, kandi eka yoona enyakwebaganizaamu, tesobora kwikaraho.
18 Omu mulingo nugwo gumu, kakuba Sitaani aba ayebaganizeemu, obukama bwe buraikaraho buta? Habwokuba mugamba ngu mbinga daimooni ninkozesa amaani ga Berezebbabbu.
19 Baitu obu ndaaba nimbinga daimooni ninkozesa amaani ga Berezebbabbu, batabani banyu bazibinga nibakozesa amaani gooha? Egi niyo ensonga habwaki balibacwera omusango.
20 Baitu obu ndaaba nimbinga daimooni ninkozesa ekyara kya Ruhanga, Obukama bwa Ruhanga bwizire mutakimanyire.
21 Omusaija ow’amaani kandi ow’aine eby’okurwanisa obu alinda ekikaali kye, ebintu bye biikara birinzirwe kurungi.
22 Baitu omuntu ow’arukumukira amaani obu aija akamurwanisa kandi akamusingura, atwara eby’okurwanisa byona ebi abaire naayesiga kandi n’ebintu byona ebi aba amwihireho abigaba.
23 Weena ow’atali harubaju rwange, munyanzigwa wange, kandi weena atasorooleza nambere ndi, ararangya.
24 “Omwoyo omubi obu guruga omu muntu, guraba omu biikaro ebitarumu maizi niguserra nambere gurahuumurra, baitu obu gutazooraho, gugamba guti: ‘Leka ngaruke omu nju yange nambere narugire.’
25 Kandi obu guhikayo, gusanga enju etarumu kintu, esingoliirwe, kandi eteekaniziibwe kurungi.
26 Hanyuma gugarukayo guleeta emyoyo endi musanju emibi muno kugukira, hanyuma y’okutaaha omu nju egi, emyoyo egi ikaramu. Nahabweki, enyikara ey’okumalirra ey’omuntu ogu ey’eyongerra kimu kusiisikara, kukira ey’okubanza.”
27 Obu akaba naakyabaza ebintu ebi, omukazi ow’akaba ali omu kitebe ky’abantu yatokera haiguru naagamba ati: “Aine okusemererwa omukazi ayakuzaire kandi yakwonkya!”
28 Baitu Yesu yamugarukamu ati: “Nangwa, oihireho, abaine okusemererwa nubo abo abahurra ekigambo kya Ruhanga kandi bakakita omu nkora.”
29 Ebitebe by’abantu obu bakaba nibesorooza hamu, yatandika kugamba ati: “Abantu ab’obusinge bunu obubi baserra akokurorraho, baitu busaho kokurorraho akalibaheebwa oihireho, akokurorraho ka Yona.
30 Nk’oku Yona yafookere akokurorraho hali abantu ba Nineve, nukwo n’Omwana w’omuntu aliba ati hali abantu ab’obusinge bunu.
31 Omukama omukazi ow’omu masirimuka alihumbuuka n’abantu ab’obusinge bunu kandi abasingise omusango, habwokuba akaruga ha mpero y’ensi, yaija kuhurra amagezi ga Suleimani. Baitu dora! ogu arukukira Suleimani ali hanu.
32 Omu kasumi ak’okucwerwa omusango, abantu ba Nineve balihumbuuka n’abantu ab’obusinge bunu, babasingise omusango habwokuba bakeegarukamu habw’ebi Yona ebi yatebiize. Baitu dora! ogu arukukira Yona ali hanu.
33 Omuntu obu amara kuhemba etaara, tagisereka kandi tagijuumikira ekigega, baitu agiteeka ha kikondo kyayo nukwo boona abarukutaaha omu nju barole ekyererezi.
34 Etaara y’omubiri, niryo eriiso. Eriiso lyawe obu liba nirirora hamu, omubiri gwawe gwona gurora ekyererezi; baitu obu liba ly’ihali, omubiri gwawe gwona gwijura omwirima.
35 Nahabweki wegendereze nukwo ekyererezi ekiri omuli iwe, kitaba mwirima.
36 Nahabweki, omubiri gwawe gwona obu guba gwijwire ekyererezi, gutarumu mwirima gwona, nigwija kwangasana nk’oku etaara ekumulikira n’ekyererezi kyayo.”
37 Obu yamazire kubaza ebintu ebi, Omufalisaayo yamusaba kulya na uwe. Nahabweki, akataahamu yaikarra ha meeza.
38 Omufalisaayo yahunirra habw’okurora Yesu naalya atabandize kunaaba omu ngaro.
39 Baitu Mukama waitu yamugambira ati: “Inywe Abafalisaayo, musemeza aheeru y’ekikopo n’ebbakuli, baitu omunda mwijwire omururu n’ebikorwa ebibi.
40 Badomadoma inywe, ogu ayakozere aheeru tali nuwe yakozere n’omunda?
41 Ebintu ebiri omunda omu mutima nibyo mugabire abanaku nk’ebisembo kandi ebindi byona hali inywe nibiija kuba byecumi.
42 Mulikibona inywe Abafalisaayo habwokuba muhayo kimu kya ikumi ekya minti, peganoni* n’eky’ekimera ekindi ekiribwa nk’omukubi, baitu munagiiriza obwinganiza n’okugonza Ruhanga! Ebintu binu nibyo mukaba musemeriire kukora, baitu n’ebintu ebindi timusemeriire kubinagiiriza.
43 Mulikibona inywe Abafalisaayo habwokuba mugonza kwikarra omu ntebe ez’omu maiso omu masorrokaniro, n’okubaramukya omu butale!
44 Mulikibona inywe habwokuba muli nk’ebituuro ebitarukurorwa kurungi, abantu ebi baraba haiguru baitu tibakimanyire ngu biri bituuro!”
45 Omu hali abo ow’akaba amanyire kurungi Ebiragiro, yamugambira ati: “Mwegesa obu wabaza ebintu ebi, na itwe watujumiramu.”
46 Yesu yamugarukamu ati: “Mulikibona na inywe abamanyire kurungi Ebiragiro, habwokuba nimwetwekesa abantu emigugu erukulemeera muno, baitu inywe timurukugonza n’okugikwasaaho akaara kanyu!
47 “Mulikibona inywe, habwokuba mwombeka ebituuro bya banabbi, baitu baisenkuruinywe nubo baabaisire!
48 Mali mumanyire ebikorwa bya baisenkuruinywe kandi nimubisagika, habwokuba bakaita banabbi, baitu inywe nimwombeka ebituuro byabo.
49 Enu niyo ensonga habwaki omu magezi ge, Ruhanga yagambire ati: ‘Ndibasindikira banabbi n’abakwenda, baitu nibaija kwita kandi bahiiganize bamu hali bo,
50 nukwo esagama ya banabbi boona eyaseeserwe kuruga ha kutandikwa kw’ensi ejunaanwe abantu ab’obusinge bunu,
51 kurugira kimu ha sagama eya Aberi, kuhika ha ya Zakaliya ayaitiirwe hagati y’ekyoto na yekaru.’ Mananu kwo nimbagambira nti, niija kujunaanizibwa obusinge bunu.
52 “Mulikibona inywe abamanyire kurungi Ebiragiro habwokuba mukatwara ekisumuruzo eky’okumanya. Inywe inywenka mutataahemu kandi mutangira n’abo abarukutaahamu!”
53 Obu yarugireyo oku, abahandiiki n’Abafalisaayo baatandika kumutalibaniza muno nibamukaguza ebikaguzo ebindi bingi,
54 n’ekigendererwa eky’okumukwata omu bigambo bye.
Obugambo Obuli Hansi
^ Omu Ruyonaani, “peganoni.” Kimera ekikozesebwa nk’omubazi kandi nk’ekirungo ekikozesebwa kuboyesa emikubi.
