Nk’oku Yahandiikirwe Matayo 20:1-34
20 “Obukama obw’omu iguru nibusisana nk’omusaija ow’akaba aine omusiri gw’emizabbibbu, ayazindukire nyenkyakara kuserra abakozi abarakora omu musiri gwe.
2 Obu yamazire kwikiranganiza n’abakozi kubasasura dinaali emu ekiro kimu, yabatuma bagende bakole omu musiri gw’emizabbibbu.
3 Obu yaturukire aheeru nk’omu saaha isatu, yarora abandi bemeriire omu katale bataine mulimo,
4 yabagambira ati: ‘Na inywe mugende mukole omu musiri gw’emizabbibbu, ninyija kubasasura ekibasemeriire.’
5 Baagenda. Obu yayongiire kuturuka aheeru nk’omu saaha mukaaga n’omu saaha mwenda, yakora ekintu nikyo kimu.
6 Ha kumalirra, obu yaturukire aheeru nk’omu saaha 11 yarora abandi bemeriire, yabagambira ati: ‘Habwaki mwemeriire hanu ekiro kyona mutaine mulimo?’
7 Baamugarukamu bati: ‘Habwokuba busaho muntu ow’atuhaire omulimo.’ Yabagambira ati: ‘Na inywe mugende mukole omu musiri gwange gw’emizabbibbu.’
8 Obu bwahikire rwebagyo, mukama w’omusiri yagambira omusaija ow’akaba ataireho kurolerra abakozi ati: ‘Yeta abakozi obasasule empeera yabo, otandikire hali abo abaizire ha kumalirra kandi omalirre n’abo abaizire ha kubanza.’
9 Abaatandikire saaha 11 obu baizire, buli omu yaheebwa dinaali emu.
10 Abo abaabandize ha mulimo obu baizire, baateekereza ngu nibaija kusasurwa empeera erukukiraho, baitu na bo buli omu yasasurwa dinaali emu.
11 Obu baagitungire, baatandika kutontorroma omu maiso ga mukama w’omusiri
12 nibagamba bati: ‘Abasaija abaizire ha kumalirra bakozere esaaha emu yonka, baitu wabaha omusaara ogurukwingana n’ogwaitu abasiibire nitukora ekiro kyona nituteerwa omusana.’
13 Yagarukamu omu hali bo ati: ‘Musaija, tinyine ekibi kyona eki nkozere. Toikirizeege kunkorra habw’edinaali emu?
14 Gitwale, ogende. N’abo abaizire ha kumalirra ningonza kubasasura empeera ey’erukwingana n’eyaawe.
15 Tinyine bugabe obw’okukozesa ebintu byange nk’oku ndukugonza? Okwasirwe ihali habwokuba ndi muntu murungi?’
16 Enu niyo ensonga habwaki ab’okumalirra baliba b’okubanza, kandi ab’okubanza babe b’okumalirra.”
17 Obu bakaba nibagenda Yerusalemu, Yesu akatwara abegeswa be 12 harubaju yabagambira ati:
18 “Dora, nitugenda Yerusalemu kandi Omwana w’omuntu naija kuheebwayo omu mikono y’abanyakatagara abakuru n’abahandiiki. Balimucwera ogw’okufa,
19 bamuheyo omu mikono y’abanyamahanga bamusekereze, bamuteere, bamuhanike ha muti afe, kandi ha kiro ekya kasatu alihumbuurwa.”
20 Hanyuma, nyina batabani ba Zebedaayo akaija na bo hali Yesu, yateeza amaju omu maiso ge aine eki arukumusaba.
21 Yesu yamukaguza ati: “Noogonza ki?” Yamugarukamu ati: “Ninkusaba batabani bange banu babiri obaikirize, omu aikarre ha mukono gwawe ogw’obulyo, kandi ondi ha mukono gwawe ogw’emoso omu Bukama bwawe.”
22 Yesu yagarukamu ati: “Timurukumanya eki murukusaba. Nimusobora kunywera ha kikopo eki ndi haihi kunyweraho?” Baamugarukamu bati: “Nitusobora.”
23 Yabagambira ati: “Mananu kwo nimwija kunywera ha kikopo kyange, baitu eky’okwikarra ha mukono gwange ogw’obulyo na ha mukono gwange ogw’emoso, tali ninyowe arukucwamu, baitu ky’abo Isenyowe abayakitekaniriize.”
24 Abegeswa abandi ikumi obu baakihuliire, baabiihirirwa abo babiri.
25 Baitu Yesu yabeeta yabagambira ati: “Abalemi b’amahanga balema abantu n’ikama, n’abakuru balema n’obukaali.
26 Inywe mutaba nka bo, baitu ogu weena arukugonza kuba mukuru omuli inywe, asemeriire kuba muheereza wanyu,
27 kandi weena arukugonza kuba w’okubanza omuli inywe, asemeriire kuba mwiru wanyu.
28 N’Omwana w’omuntu ataije kuheerezebwa baitu okuheereza, n’okuhayo obwomeezi bwe nk’ekicunguro habw’abaingi.”
29 Obu bakaba nibaruga omu Yeriko, ekitebe ky’abantu baingi baamuhondera.
30 Kandi dora! abasaija babiri abakaba bafiire amaiso baali baikaliire harubaju rw’omuhanda. Obu baahuliire Yesu naarabaho baatokera haiguru bati: “Mukama waitu, Omwana wa Daudi, tugirre embabazi.”
31 Baitu abantu baabacoomera nibabagambira kuculeera, baayeyongera kutokera haiguru nibagamba bati: “Mukama waitu, Omwana wa Daudi, tugirre embabazi.”
32 Yesu yayemerra, yabeeta, yabakaguza ati: “Nimugonza mbakorre ki?”
33 Baamugarukamu bati: “Mukama waitu, nitugonza amaiso gaitu gaiguke.”
34 Yesu yabakwatirwa embabazi, yakwata h’amaiso gaabo, ahonaaho baatandika kuhweza kandi baamuhondera.
