Nk’Oku Yahandiikirwe Yohana 17:1-26
17 Yesu obu yamazire kubaza ebintu ebi, yaimukya amaiso naarora haiguru, yagamba ati: “Isenyowe, esaaha ehikire. Nyumiza omwana waawe, nukwo omwana waawe asobole kukunyumiza,
2 nk’oku omuhaire obusobozi hali abantu boona, nukwo asobole kuha obwomeezi obutahwaho abo boona ab’omuhaire.
3 Kusobora kutunga obwomeezi obutahwaho, basemeriire kumanya iwe Ruhanga omu ow’amananu, n’ogu ou watumire Yesu Kristo.
4 Nkunyumiize omu nsi, habwokuba omulimo ogu wampaire kukora ngumaliriize.
5 Hati Isenyowe, nyumiza ha rubaju rwawe n’ekitiinisa eki nkaba nyine ha rubaju rwawe, ensi etakabaireho.
6 “Ibara lyawe ndimanyisize abantu aba wampaire omu nsi. Bakaba bali baawe, wabampa kandi bakwasire* ekigambo kyawe.
7 Hati bakimanyire ngu ebintu byona ebi wampaire, biruga hali iwe;
8 habwokuba mbagambiire ebigambo ebi wampaire, kandi babiikiriize, baakigumiza kimu ngu nkaija kukukiikirra, kandi baikiriize ngu niiwe wantumire.
9 Nimbasabira; tindukusabira ensi, baitu ninsabira abo abawampaire, habwokuba baawe;
10 kandi ebintu byange byona byawe, n’ebyawe byange, kandi nyumiziibwe omuli bo.
11 “Tinkyali omu nsi, baitu bali omu nsi, kandi ninyija nambere oli. Isenyowe arukwera, balinde habw’ibara lyawe eri wampaire, nukwo basobole kuba omu, nk’oku na itwe tuli omu.
12 Obu nkaba ndi na bo, nabalindaga habw’ibara lyawe eri wampaire, mbalinzire kandi busaho n’omu hali bo ow’ahwerekeriire, oihireho omwana w’okuhwerekerra, nukwo ebyahandiikirwe bisobole kuhikirra.
13 Baitu hati ninyija nambere oli, kandi nimbaza ebintu binu omu nsi, nukwo basobole kutunga omu bwijwire okusemererwa oku nyine.
14 Mbagambiire ekigambo kyawe, baitu ensi ebanobere habwokuba tibali kicweka ky’ensi, nk’oku na nyowe ntali kicweka ky’ensi.
15 “Tindukukusaba okubaiha omu nsi, baitu obalinde habw’omubi.
16 Tibali kicweka ky’ensi, nk’oku na nyowe ntali kicweka ky’ensi.
17 Obeeze n’okozesa amananu; ekigambo kyawe nugo mananu.
18 Nk’oku wantumire omu nsi, na nyowe mbatumire omu nsi.
19 Kandi ninyeyeza habwabo nukwo na bo basobole kwezebwa kuraba omu mananu.
20 “Tindukusabira banu bonka, baitu ninsabira n’abo abarukunyikiririzaamu kuraba omu kigambo kyabo,
21 nukwo boona basobole kuba omu, nk’oku iwe Isenyowe oli omu bumu na nyowe, kandi na nyowe ndi omu bumu na iwe, na bo basobole kuba omu bumu na itwe, nukwo ensi esobole kwikiriza ngu niiwe wantumire.
22 Mbahaire ekitiinisa eki wampaire nukwo basobole kuba omu, nk’oku itwe tuli omu.
23 Nyowe ndi omu bumu na bo, kandi na iwe oli omu bumu na nyowe, nukwo basobole kuba omu bumu nukwo ensi emanye ngu niiwe wantumire kandi ngu okabagonza nk’oku wangondeze.
24 Taata, ningonza abo abawampaire babe na nyowe nambere ndi, nukwo basobole kurora ekitiinisa eki wampaire, habwokuba okangonza ensi etakahangirwe.
25 Isenyowe ow’okuhikirra, ensi tekakumanyire, baitu nyowe nkumanyire, kandi banu bakimanyire ngu niiwe wantumire.
26 Mbamanyisize ibara lyawe kandi ndirimanyisa, nukwo okugonza oku wanyolekere kusobole kuba omuli bo, kandi na nyowe mbe omu bumu na bo.”
Obugambo Obuli Hansi
^ Rundi, “boorobiire.”
