Ekigendererwa tikigarukira ha kuba n’ekirooto kyonka—ekintu eky’oyegomba kibeho. Ebigendererwa byonyini bitwarramu kwetekaniza, kuba muntu arukuhindahinduramu, kandi omwekambi.

Ebigendererwa nibisobora kuhikiirizibwa omu bwire buke (ebiro bike rundi wiiki nke), obwingiho (emyezi), hamu n’oburaihire (omwaka gumu n’okukiraho). Ebigendererwa ebitwara obwire oburaihire nibisobora kuhikiirizibwa kuraba omu kuhikiriza kimu kimu.

Kuhikiiriza ebigendererwa nikisobora kukukonyera kweyongera kweyikiririzaamu, kugumya enkoragana yaawe n’abanywani baawe n’okwongera ha kusemererwa kwawe.

Kuba muntu arukweyikiririzaamu: Obw’oyeteraho ebigendererwa ebike kandi okabihiikiriza, kikwekambisa kweteraho ebigendererwa eby’amaani. Ekindi, totiina obwoba n’oraba omu mitalibaine eya buli kiro—nk’okusindikirizibwa.

Obunywani: Abantu bagonza kunywana abo abeeteraho ebigendererwa omu bwomeezi—ekirukumanyisa abo abamanyire ekibarukugonza kandi bakeehayo kukikolerra. Kwongerraho, gumu ha miringo erukukirayo kugumya obunywani nukwo kukorra hamu n’omuntu ondi kuhikiiriza ekigendererwa nikyo kimu.

Okusemererwa: Obw’oyeteraho ebigendererwa kandi okabihikiiriza, ohurra oine ekintu eky’ohikireho.

“Ngonza kweteraho ebigendererwa. Binkonyera kwikara nyine bingi eby’okukora kandi bimpa ekintu ekinsemeriire kuhikaho. Kandi obw’ohikiiriza ekigendererwa, kikuleetera kwehurra kurungi kandi ogamba oti: ‘Mali nkikozere! Nkahikiiriza ekinatandikire kukora.’”—Christopher.

OMUSINGI GWA BAIBULI: “Anyakurolerra omuyaga talisiga; anyakurolerra ebicu taligesa.”—Omugambizi 11:4.

Kora ebintu binu kweteraho ebigendererwa n’okubihikiiriza.

Handiika orukarra rw’ebigendererwa. Handiika orukarra rw’ebigendererwa ebiwakugondeze kuhikiriiza obu n’osigikirra hali ebi ebiwakugondeze kutandikiraho.

Kora entekaniza. Ha buli kigendererwa kyona eky’orayeteraho, kora ebintu binu:

• Wetereho obwire obw’orakihikiiriza.

• Manya eby’osemeriire kurabamu.

• Tekerezaaho ebisobora kukulemesa n’omulingo osobora kubisingura.

Gira ekiwakoraho. Otalinda kuhikiiriza buli kimu ngu nukwo otandike. Wekaguze, ‘Kintu ki ekinsemeriire kubanza kukora kusobora kuhikiiriza ekigendererwa kyange?’ Hanyuma okikole. Ikara n’omanya nambere wahika omu kuhikiiriza ekigendererwa kyawe.

OMUSINGI GWA BAIBULI: “Ebitekerezo ebyomwekambi bireta omweru.”—Enfumo 21:5.