Kubaza hamu okuhikire, kubaho iwe n’abaana bawe obumugambirahongana ebiteekerezo hamu n’enyehurra zanyu.

Abaana kikira kubagumira kubaza n’abazaire baabo obu bahika omu myaka y’ensinganto. Ekitabu ekirukwetwa Breaking the Code, nikigamba ngu abaana bagambira bazaire baabo buli kimu kyona ekibarukurabamu omu bwomeezi bwabo, baitu obubagenda nibakura batandika kusereka bazaire baabo ebintu ebimu. Baitu eki n’obukiraaba nukwo kiri, ako kaba kasumi akarungi abaana akabarukwetaaga kusobora kubaza n’abazaire baabo.

Baza n’omwana wawe omu kasumi akaarukugonza kubalizaamu. Eki kikole n’obwaraaba n’agonza kubaza naiwe kuhikya obwire bw’ekiro muno.

“N’osobora kwehurra n’ogonza kumugambira ngu, ‘Bunu nubwo obwire obworozere obworukugonza kungambira ekiri ha mutima gwawe? Katusiibire hamu ekiro kyona!’ Mali tusemeriire kutontorroma abaana baitu obubarukuba nibagonza kutugambira omulingo barukwehurra? Eki tikiri nikyo buli muzaire yakugondeze?”—Lisa.

“N’obukiraaba ngu ngonza muno kubyama kara, baitu abaana bange abakyali nsingaanto bakira kungambira enyehurra zaabo omu bwire obw’ekiro muno omu itumbi.”—Herbert.

OMUSINGI GWA BAIBULI: “Omuntu wena aleke okuserra ebye wenka, baitu aserre ebyabandi.”—1 Abakolinso 10:24.

Otaikiriza ekintu kyona kukuhugura. Taata omu nagamba ati: “Obwire obumu nyesanga nyine ebintu bingi eby’okuteekerezaaho abaana bange obubaba nibambaliza. Kandi eki obukibaho bakirorra kimu ngu timbataireho omutima!”

Obworaaba ohugwirwe tivi, esimu rundi ekyoma ekindi ekyakalimagezi kiiheho kandi okiteeke ha rubaju. Teeka omutima ha bintu omwana aliyo n’akugambira n’obukiraaba ngu ebyarukukugambira nibizooka nk’ebitaine makuru.

“Tusemeriire kugumya ngu enyehurra z’abaana baitu nkuru muno haliitwe. Kakuba tubaleetera kwehurra ngu enyehurra zaabo tiziri nkuru haliitwe, tibarukwija kutugambira omulingo barukwehurra rundi nibaija kugenda handi kuserra obukonyezi.”—Maranda.

“Otehurra kubi enteekereza y’omwana wawe obweraaba etahikire.”—Anthony.

OMUSINGI GWA BAIBULI: “Mwerindege okumuhurra.”—Luka 8:18.

Kozesa akagisa kubaza n’abaana bawe omu nyikara ezirukwahukana. Obwire obumu abaana kibanguhira kubaza ekibali ha mutima obubaba nibakora hamu n’abazaire baabo ebintu ebya buli kiro.

“Tukozesa akagisa obutuba tuli omu motoka nitugenda. Obutubaza nabo tubali haihi omu kiikaro ky’okubaamirra kitukonyire kubaza nabo kurungi.”—Nicole.

Abazaire nibasobora kukozesa obwire obwokulya kubaza n’abaana baabo.

“Obutuba nitulya eky’ekiro, buli omu abazaaho ekintu ekirungi n’ekibi ekimubaireho kiro eki. Kinu kitwirizangana haihi kandi kireetera buli omu kukimanya ngu titusemeriire kwemarra ebizibu itwenka.”—Robin.

OMUSINGI GWA BAIBULI: “Omuntu arahukege okuhurra, naikaraho okutagamba.”—Yakobo 1:19.