Abantu baingi bagamba ngu nibaikiririza omuli Ruhanga. Baitu kakuba obakaguza oti “Ruhanga nuwe oha?” noija kutunga eby’okugarukamu ebirukwahukana. Abamu batekereza ngu Ruhanga mucwi w’emisango ow’ataine mbabazi kandi ow’agonza kufubira abantu kwonka habw’ensobi zaabo. Abandi batekereza ngu aine kugonza kandi abaganyira n’obu bakora ebintu ebibi kwingana nkaha. Kandi abandi bagamba ngu Ruhanga ali hara naitwe kandi tarukutufaaho. Habw’entekereza zinu zoona ezikwahukana, baingi bagamba ngu tikirukusoboka kumanya amananu agarukukwata hali Ruhanga.

Kikuru kumanya Ruhanga? Ego, kikuru. Obutumanya Ruhanga kurungi, kitukonyera kuba n’obwomeezi oburungi kandi obwine ekigendererwa. (Engeso Ezabakwenda 17:26-28) Obwoyeyongera kwirra haihi na Ruhanga, nauwe ayeyongera kukugonza kandi n’okukukonyera. (Yakobo 4:8) Obwomanya amananu agarukukwata hali Ruhanga nikisobora kukusobozesa kutunga obwomeezi obutahwaho.—Yohana 17:3.

Nosobora ota kumanya Ruhanga? Tekerezaaho munywani wawe nfe na nfe. Mukafooka muta banywani? Hataroho kugurukyagurukya okabanza kumanya ibara lye, engeso ze, ebintu eby’agonza n’ebyatarukugonza, ebintu eby’akozere rundi n’ebyarukugenda kukora hamu n’ebintu ebindi. Habw’okumanya ebirukumukwataho, kikakuletera kufooka munywani we.

Omu mulingo nugwo gumu, nitusobora kumanya Ruhanga obuturayetegereza ebintu binu:

• IBARA LYA RUHANGA NUWE OHA?

• RUHANGA AINE MIRINGO KI?

• BINTU KI RUHANGA EBY’ARUKUGENDA KUKORA?

• BINTU KI EBY’ARUKWIJA KUKORA?

• NOIJA KUGASIRWA OTA OBW’ORAMANYA RUHANGA?

Magaziini enu etekaniziibwe kukukonyera kutunga eby’okugarukamu eby’ebikaguzo ebi kuruga omu Baibuli. Ebicweka ebiri omu magaziini enu tibirukwija kukukonyera kumanya Ruhanga kwonka baitu nibiija n’okukukonyera kumanya emigisa ey’eruga omu kuba n’enkoragana enungi nauwe.