Amananu Agarukukwata ha Busumi obw’Omu Maiso
Wakekaguzahoga nk’oku obwomeezi buliba omu busumi obw’omu maiso? Baibuli netugambira empindahinduka enkuru muno ezirukwija kuhika h’abantu omu nsi omu kasumi akatali kahara.
Yesu akasoborra nk’oku ‘twakumanyire ngu Obukama bwa Ruhanga buli haihi.’ (Luka 21:31) Omu bunabbi bwe, Yesu akagamba ngu hakaba nihagenda kubaho obulemu obw’amaani, emisisa, ibura lye by’okulya, hamu n’endwaire nyingi muno—kandi binu nibyo ebintu byonyini ebirukubaho kasumi kanu.—Luka 21:10-17.
Kandi Baibuli n’etugambira ngu omu ‘biro eby’empero’ eby’abalemi b’ensi, abantu bakwetwaize kubi muno. Nosobora kusoma 2 Timoseo 3:1-5 kumanya abantu nk’oku bakwetwaize omu biro binu eby’empero. Obworukurora ebikorwa binu, n’enyetwaza ey’abantu kasumi kanu, nibigumiza kimu ngu obunabbi obuli omu Baibuli nibukwatagana n’ebintu ebiroho kasumi kanu.
Hati eki nikimanyisa ki? Nikimanyisa ngu obwire bwiriire haihi Obukama bwa Ruhanga kukora empindahinduka ez’amaani ezirasemeza obwomeezi omu nsi. (Luka 21:36) Omu Baibuli, Ruhanga naturaganiza ngu nagenda kukorra abantu omu nsi ebintu ebirungi. Tekerezaaho ebyokurorraho binu.
OBULEMI OBURUNGI
“Kandi [Yesu] yahabwa okulema, nekitinisa, nobukama, abantu bona namahanga, nabendimi bamukorrege: okulemakwe kulema okwebiro nebiro, okutalihwaho, nobukamabwe nubwo butalihwerekerezebwa.”—DANIERI 7:14.
Amakuru g’orukarra oru: Nosobora kwegondeza omu bwomeezi hansi ya gavumenti erukukirayo, Ruhanga ey’ataireho kwebemberwa Omwana we nk’Omukama.
OBWOMEEZI OBURUNGI
“Anyakuikarayo taligamba ati ndi murwaire.”—ISAYA 33:24.
Amakuru g’orukarra oru: Tolyongera kurwara rundi kuba n’obulema ha mubiri gwawe kandi noija kwomeera ebiro n’ebiro hataroho kufa.
OBUSINGE OBWINGI
“Nagenda kumaraho obulemu omu nsi yoona.”—ZABULI 46:9, NW.
Amakuru g’orukarra oru: Ensi yoona terukwija kubamu obulemu n’okubonabona okuletwa obulemu.
ENSI NIIJA KUBA IJWIRWEMU ABANTU ABARUNGI
“Omubi alihera . . . Baitu abaculezi baligwetwa ensi.”—ZABULI 37:10, 11.
Amakuru g’orukarra oru: Abantu ababi tibarukwija kubaho oihireho abantu abarukugonza kworobera Ruhanga.
ENSI YOONA ERIFOOKA ORUGONJO ORURUNGI
“Balyombeka enju balizitahamu; balibyara emisiri eyemizabibu, baliryaho ebyana.”—ISAYA 65:21, 22.
Amakuru g’orukarra oru: Ensi yoona niija kusemezebwa. Kandi Ruhanga naija kuhikiriza okusaba kwaitu okurukugamba ngu “ebyogonza bikorwe ha nsi.”—Matayo 6:10.
