Ruhanga tasoroora kandi n’agonza kuha abantu boona emigisa.

Ruhanga akaraganiza nabbi Iburahimu ngu ‘omuli iwe enganda zoona ez’ensi numwo ziriheerwa omugisa.’​—Okubanza 12:3.

Isomo ki eriturukwega? Ruhanga n’atugonza muno kandi n’agonza kuha emigisa eka zoona ezirukumworobera otwaliiremu abasaija, abakazi, hamu n’abaana.

Ruhanga aijwire embabazi kandi aheereza emigisa abo abalengaho kumumanya.

Ruhanga Ow’obusobozi bwona akaha nabbi Musa amaani ag’okukora ebyamahano eby’amaani. Baitu nabwo nabbi Musa akasaba nagamba ati: “Onyoleke hati emihanda yawe, nkumanye, nubwo ngaruke ndole embabazi omu maiso gawe.” (Okuruga 33:13) Ruhanga akasiima nabbi Musa habw’ekintu ekiyamusabire kandi akamuha omugisa ogw’okwongera kumanya n’okwetegereza emihanda n’emiringo ya Ruhanga. Ekyokurorraho, nabbi Musa akeega ngu Omuhangi ali “Ruhanga aijuire okuganyira kandi owembabazi.”​—Okuruga 34:6, 7.

Isomo ki eriturukwega? Ruhanga n’agonza itwena kutuha emigisa otwaliiremu abasaija, abakazi, hamu n’abaana kakuba twekamba kumumanya kurungi. N’atwoleka omu Byahandiikirwe Ebirukwera omulingo tusobora kumuramya kandi ngu aine ekihika eky’okutuha emigisa.

Nitusobora kutunga emigisa ya Ruhanga ey’ebiro n’ebiro kakuba twegaho Yesu, ebiyakozere, hamu n’ebiyayegeseze.

Ekigambo kya Ruhanga kirumu ebintu bingi ebirukukwata ha bwomeezi bwa Yesu n’ebintu ebiyayegeseze. Ruhanga akaha Yesu amaani ag’okukora ebyamahano eby’amaani, nk’okukiza abafu ba maiso, abafu bamatu n’abalema. Akahumbuura n’abafu. Omu mulingo gunu, Yesu akooleka emigisa Ruhanga aliretera abantu boona omu kasumi ak’omu maiso. Akasoborra omulingo tusobora kutunga emigisa enu, n’agamba ati: “Bunu nubwo bwomezi obutahwaho, okumanya iwe Ruhanga omu owamananu, nogu ouwatumire, Yesu Kristo.”​—Yohana 17:3.

Yesu yasalirirwaga abantu, abafaaho, kandi abooleka embabazi. Abasaija n’abakazi, abato n’abakuru, baikaija omu bwingi hali uwe obuyabaraalize n’agamba ati: “Mwegere hali nyowe, baitu ndi munaku nomuculezi omu mutima, nainywe mulizora okuhumura okwomu mutima gwanyu.” (Matayo 11:29) Okwahukanaho n’abantu abandi ab’omu kasumi ke abaali nibatwaza kubi abakazi, Yesu uwe akabatwaza omu mulingo ogw’embabazi, kandi ogw’ekitiinisa.

Isomo ki eriturukwega? Yesu akooleka abantu okugonza kwingi, kandi akatuteraho ekyokurorraho ekirungi muno ha mulingo tusemeriire kutwaza abandi.

Ebyahandiikirwe Ebirukwera nibyegesa ngu “halitwe haroho Ruhanga omu” ay’ahangire bintu byona kandi Yesu Kristo akaba ali mutumwa we omwebundaazi. (1 Abakolinso 8:6) Yesu akasoborra kurungi nk’oku Ruhanga namukira obusobozi kandi ngu nuwe yamutumire omu nsi.​—Yohana 11:41, 42; 14:28. *