1. Abato baine kucwamu ki obukirukuhika ebiro byabo eby’omu maiso? Kiki ekisobora kubakonyera kuleka kutiina? (Rora ekisisani ekiri ha kutandika kw’isomo linu.)

ABATO inywena nimukimanya ngu otakatandikire orugendo rwona, ky’amagezi kubanza kumanya nambere orukugenda. Obwomeezi buli nk’orugendo, kandi obwire oburungi bw’okubwetegekera nubwo obworukuba okyali muto. Nitukimanya ngu nikisobora kutanguha kukora entegeka eza mulingo gunu. Omwisiki arukwetwa Heather nagamba ngu: “Nikitiinisa. Oine kucwamu okyali muto eky’orakora omu bwomeezi bwawe bwona.” Naiwe obworaaba noyehurra oti, ijuka Yahwe nagamba: “Otafube’ra, baitu ninyowe Ruhanga wawe: nyowe ndikuha amaani; ego, ndikukonyera.”​—Isaya 41:10.

2. Nomanya ota ngu Yahwe nagonza oyekorre entekaniza enungi ez’ebiro eby’omu maiso?

² Yahwe nakutererra kwetekaniriza kurungi ebiro eby’omu maiso. (Omugambizi 12:1; Matayo 6:20) Kwoleka ngu n’agonza tusemererwe, akatuha obusobozi bw’okurora, kuhurra, hamu n’okulya ebintu ebi yahangire. Haroho emiringo endi ei Yahwe aturolerramu. Atuha obuhabuzi kandi atwegesa omulingo tusobora kukozesa kurungi obwomeezi bwaitu. Baitu abantu obu banga obuhabuzi  bwe oburungi, kimusaliza. Abo abatahondera oburagirizi bwe n’abagambira ngu: “Baitu mukakora eki ekiri kibi omu maiso gange. . . . Dora, abairu bange balisemererwa, baitu inywe mulilkwatwa ensoni: dora, abairu bange balizina habw’okusemererwa okwomutima.” (Isaya 65:12-14) Obu tukora encwamu ez’amagezi omu bwomeezi bwaitu, kimuhaisa ekitiinisa.​—Enfumo 27:11.

3. Yahwe nagonza okole entekaniza za mulingo ki?

³ Yahwe nagonza okole entekaniza za mulingo ki? Obworaaba nogonza kutunga okusemererwa, oine kumanya Yahwe n’okumuheereza. Kinu kiri kyetago eki Yahwe yataire omu bantu. (Zabuli 128:1; Matayo 5:3) Hali ebisoro, okulya, kunywa, n’okuzaara nibyo ebirukukira obukuru. Baitu Yahwe nagonza oyekorre entekaniza ezirakuletera okusemererwa n’ekigendererwa omu bwomeezi. Omuhangi waitu ali “Ruhanga owokugonza,” kandi “Ruhanga ow’okusemererwa,” ayahangire abantu omu “kusisanakwe.” (2 Abakolinso 13:11; 1 Timoseo 1:11, NW; Okubanza 1:27) Noija kutunga okusemererwa obworahondera ekyokurorraho kya Ruhanga. Baibuli egamba: “Okugaba kwomugisa okukira okuhebwa.” (Engeso Ezabakwenda 20:35) Naiwe eki okyeroliire? Ganu amananu busaho arukusobora kugahakaniza. Nahabweki Yahwe nagonza okole entekaniza ez’ebiro eby’omu maiso nosigikirra ha kugonza okwominiire hamu n’abantu.​—Soma Matayo 22:36-39.

4, 5. Kiki ekyaletiire Yesu okusemererwa?

⁴ Yesu Kristo akaha abato ekyokurorraho kirungi. Obwakaba ali muto, aine kuba yazaine kandi yayegonza. Nk’oku Baibuli eyoleka, haroho “akasumi akokusekeramu” hamu ‘n’akasumi akokuziniramu.’ (Omugambizi 3:4) Kandi okwesomesa Ebyahandiikirwe kikakonyera Yesu kwirra haihi na Yahwe. Ha myaka 12, akahuniriza abegesa ba yekaro “habwokwetegereza nokugarukamukwe.”​—Luka 2:42, 46, 47.

⁵ Obu yakuzire, kukora Ruhanga eby’arukugonza kikamuletera okusemererwa. Ekyokurorraho, Ruhanga akaba nagonza Yesu “okutebeza abasege ebigambo ebirungi” hamu “nokuigura amaiso agabafu bamaiso.” (Luka 4:18) Zabuli 40:8 nesoborraho eti omulingo Yesu yayehuliire: “Ninsemererwa okukora ebyogonza, Ai Ruhanga wange.” Yesu kyamusemezaga kwegesa abantu ebirukukwata hali Ise. (Soma Luka 10:21.) Kiro kimu Yesu obu yamazire kubazaaho n’omukazi ebirukukwata ha kuramya okw’amananu, akagambira abegeswa be ngu: “Ebyokulya byange nukwo kukora ayantumire ebyagonza, nokuhikiriza emirimoye.” (Yohana 4:31-34) Kikasemeza Yesu habwokuba akaba nayoleka Ruhanga hamu n’abandi okugonza. Obworakora oti, naiwe noija kutunga okusemererwa.

6. Habwaki kirungi kugambiraho abandi entekaniza zaitu ez’obusumi bw’omu maiso?

⁶ Abakristaayo abarukukira obwingi abatandikire kuheereza nk’abapayoniya bakyali bato bakatunga okusemererwa kwingi. Nosobora kugambiraho omuntu ezimu ha ntekaniza zaawe? “Nambere hataroho okuhanura, ebimaliriirwe bisubwa baitu omu kuhanura kwabaingi bigumibwaho.” (Enfumo 15:22)  Ab’oruganda n’abanyaanya itwe ab’oragambiraho nibasobora kukugambira ngu kukora nka payoniya nikiija kukukonyera kwega ebintu bingi ebirakukonyera omu bwomeezi bwawe bwona. Yesu obwakaba ali omu iguru, akega ebintu bingi kuruga hali Ise. Kandi n’obwakaba ali omu nsi natebeza, akeyongera kwega. Kutebeza amakuru amarungi n’okulinda obwesigwa bwe bikamukonyera kwikara asemeriirwe n’omu bwire obutanguhire. (Soma Isaya 50:4; Abaheburaniya 5:8; 12:2) Leka turole omulingo obuheereza obw’akasumi koona busobora kukuletera okusemererwa.

7. Kiki ekiretiire ensingaanto baingi kwegondeza omu mulimo gw’okutebeza?

⁷ Yesu akaturagira ‘kuhindura amahanga gona abegeswa’ n’okubegesa. (Matayo 28:19, 20) Obworaaba oine ekigendererwa ky’okukora omulimo gunu obwomeezi bwawe bwona, noija kutunga ekigendererwa omu bwomeezi kandi nikiija kuhaisa Yahwe ekitiinisa. Omulimo gunu nigusisana n’emirimo endi habwokuba nigutwara akaire kurora wagumanyirra. Ow’oruganda arukwetwa Timothy ayatandikire kukora nka payoniya akyali muto nagamba: “Ngonza kuheereza Yahwe omu buheereza bw’akasumi koona habwokuba nugwo omulingo gw’okumwolekamu okugonza kwange. Ha kubanza, kitanyanguhire kutunga abeegi ba Baibuli baitu hanyuma y’akasumi nkagenda omu kiikaro kindi nambere natungire abeegi baingi. Omu halibo akatandika kwija omu nso’rokano. Obu narugire omu Isomero ly’ab’Oruganda Abataswire ery’ameezi abiri, bakansindika omu kiikaro kihyaka nambere natungire abeegi ba Baibuli bbana. Ngonza kwegesa abantu habwokuba ndora omulingo omwoyo ogurukwera gubakonyera.” * (Rora obugambo obuli hansi.)​—1 Abasesalonika 2:19.

8. Ensingaanto abarukukira obwingi bakozere ki kusobora kutebeza abantu baingi?

⁸ Ensingaanto abandi batairemu amaani kwega orulimi orundi. Ekyokurorraho, Jacob kuruga omu Amerika nagamba ngu: “Obu nkaba nyine emyaka musanju, nasomaga n’abaana abarukuruga Vyetinamu. Nkaba ningonza kubatebeza, nahabweki nkakora entekaniza z’okwega orulimi rwabo. Ekyakizire kunkonyera nukwo kukozesa Watchtower ibiri, nindengesaniza ey’Orungereza n’ey’Oruvyetinamu. Kandi, nkanywana n’abantu kuruga omu kitebe ky’orulimi runu ekikaba kituli haihi. Obu nahikize emyaka 18, nkatandika kuheereza nka payoniya. Hanyuma y’obwire nkagenda omu Isomero ly’ab’Oruganda Abataswire. Nkegayo ebintu ebyankonyire omu buheereza bwange nka payoniya kandi hati ninyowe omugurusi omu wenka anyakuli omu gurupu enu erukukozesa orulimi Oruvyetinamu. Abantu baingi abarukubaza Oruvyetinamu kibasemeza muno obu barora nimbaza orulimi rwabo. Banyikiriza n’okutaaha omu maju gabo kubegesa Baibuli. Abamu begere bahika n’okubatizibwa.”​—Lengesaniza n’Engeso Ezabakwenda 2:7, 8.

9. Bintu ki ebitwega omu mulimo gw’okutebeza?

⁹ Omulimo gw’okutebeza gukonyera omuntu kwega omulingo osemeriire kwetwaza obworukuba nokora, omulingo osemeriire kubazaamu n’abantu, n’okuba muntu omumanzi kandi arukukozesa amagezi. (Enfumo 21:5; 2 Timoseo 2:24) Baitu ekintu ekindi ekikira kuleta okusemererwa omu mulimo gunu nukwo kwega omulingo osobora kukozesa Ebyahandikirwe kwikirizisa abantu. Kitwegesa n’okukorra hamu na Yahwe.​—1 Abakolinso 3:9.

10. Nosobora kutunga ota okusemererwa omu mulimo gw’okutebeza n’omu kiikaro nambere abantu batarukugonza kwega?

 ¹⁰ Nosobora kutunga okusemererwa n’obworukuba notebeza nambere abantu baingi batarukugonza kwega Baibuli. Kufoora abantu begeswa mulimo gw’ekitebe kyona. Baitu obu hazooka muntu arukugonza kwega amananu, munyaanya itwe rundi ow’oruganda omu nuwe amwegesa. Baitu nobukiraaba ngu omuntu omu nuwe amwegesa, itwena kitusemeza omuntu ogu obwafooka mwegeswa. Ekyokurorraho, ow’oruganda Brandon akakora nka payoniya kumara emyaka mwenda omu kiikaro nambere abantu bake muno baikirizaga kwega Baibuli. Nagamba ngu: “Ngonza muno kutebeza habwokuba nugwo mulimo Yahwe aturagiire kukora. Obu namazire emisomo yange nkatandikiraho kukora nka payoniya. Kinsemeza obu ndora ow’oruganda muto ou ngarwiremu amaani nakurakurana omu by’omwoyo. Obu narugire omu Isomero ry’ab’Oruganda Abataswire, bakantuma kugenda kuheereza omu kiikaro ekindi. Nobukiraaba ngu tinyine omuntu ou nkonyire kuhika ha kubatizibwa, ab’oruganda abandi basoboire kukonyera abantu abamu. Nikinsemeza kurora ngu nkekorra entekaniza z’okukonyera abantu kufooka baheereza ba Yahwe.”​—Omugambizi 11:6.

11. Buheereza ki bundi obuletiire ensingaanto okusemererwa?

¹¹ Twine emiringo nyingi ey’okuheerezamu Yahwe. Ekyokurorraho, ensingaanto baingi nibakora omu mulimo gw’okwombeka. Ebyombeko by’Obukama bingi eby’okuramizaamu nibyetagwa. Kakuba okonyera omu kwombeka ebiikaro binu by’okuramizamu, noija kutunga okusemererwa habwokuba bihaisa Yahwe ekitiinisa. Kandi noija kutunga okusemererwa habw’okukora n’ab’oruganda hamu n’abanyaanya itwe abarukwahukana. Kandi oyega n’ebintu bingi ebihyaka, nk’ekyokurorraho omulingo osobora kukora omulimo kurungi kandi okerinda kuhutaara, hamu n’omulingo osobora kukoragana n’abaroleerezi abarukurolerra omulimo.

12. Kuheereza nka payoniya kisobora kukuhikya kita ha migisa endi?

¹² Ow’oruganda Kevin nagamba ngu: “Kuruga omu buto nkaba ningonza kuheereza Yahwe omu buheereza obw’akasumi koona. Obu nahikize emyaka 19 nkatandika kukora nka payoniya. Obu nabaga ntali omu buheereza nakoraga n’ow’oruganda akaba nayombeka nukwo ntunge sente z’okunsagika. Nkega kusakaara amaju n’okutamu enyingi n’amadirisa. Hanyuma bakanyeta kukora n’akatebe akakonyera kwombeka Ebyombeko by’Obukama n’amaka g’ab’oruganda abagweriirwe ebigwererezi. Obu nahuliire ngu omu South Africa hakaba haliyo obwetago bw’okukonyera omu kwombeka, nkahandiika ninsaba kugenda kukonyera kandi banyikiriza. Kandi hati hanu nambere ndi omu Africa, tuba nitukyamara kwombeka Ekyombeko ky’Obukama kimu nitugenda kwombeka ekindi. Abankora nabo omu kwombeka tuli nk’eka. Twikara hamu, tusoma hamu Baibuli, kandi tukora hamu. Kandi  ngonza kutebeza hamu n’ab’oruganda nambere tuba tugenzere kwombeka. Entekaniza ezinayekoliire omu buto zindetiire okusemererwa oku nkaba ntarukunihira.”

13. Habwaki ensingaanto baingi nikibasemeza kuheereza ha Beseri?

¹³ Abamu abakaba nibakora nk’abapayoniya hati nibahereza ha Beseri. Kuheereza ha Beseri kireta okusemererwa habwokuba buli kimu eky’okora oba nokikorra Yahwe. Ababeseri bakonyera omu kutuhikyaho Baibuli n’ebitabu nukwo bikonyere abantu kwega amananu. Omubeseri omu arukwetwa Dustin n’agamba ngu: “Nketeraho ekigendererwa ky’okuheereza omu buheereza bw’akasumi koona obu nkaba nyine emyaka mwenda, kandi obu namazire kusoma, nkatandikiraho kukora nka payoniya. Obu harabireho omwaka n’ekicweka, bakanyeta kukora ha Beseri nambere nayegere kukozesa ebyoma by’okutera ebitabu kandi hanyuma natandika kukora puroguramu ezikozesebwa omu kompyuta. Ekintu ekinsemeza ha Beseri nukwo kuba muntu w’okubanza kuhurra omulingo omulimo gw’okutebeza gurukukurakurana omu nsi yoona. Ngonza kuheereza ha Beseri habwokuba emirimo yaitu ekonyera abandi kwirra haihi na Yahwe.”

14. Kintu ki eky’osobora kukora hati kwetekaniriza obuheereza bw’akasumi koona?

¹⁴ Nosobora kwetekaniriza ota obuheereza obw’akasumi koona? Obworaaba nogonza  kuheereza Yahwe ekirukukirayo, osemeriire kuba n’emiringo mirungi ey’Ekikristaayo. Osomege Ekigambo kya Ruhanga buli kiro, okyecumitirizeho muno, kandi obworaaba oli omu nso’rokano, yoleka okwikiriza kwawe. Obworaaba nokyasoma, yongeramu amaani omu kutebeza abandi amakuru amarungi. Lengaho kumanya ebirukukwata ha bantu ab’orukutebeza kuraba omu kubakaguza omu mulingo ogw’amagezi n’okuhuliiriza ebi barukugarukamu. Kandi nosobora nokwehayo kukonyeraga omu bintu ebimu eby’ekitebe nk’okusemeza n’okudabiriza Ekyombeko ky’Obukama. Yahwe agonza kukozesa abantu abaculeezi kandi abaine omutima gw’okukora. (Soma Zabuli 110:3; Engeso Ezabakwenda 6:1-3) Omukwenda Paulo akasaba Timoseo kumweteranizaho kuheereza nk’omumisani habwokuba Timoseo “akasimibwa bene babu.”​—Engeso Ezabakwenda 16:1-5.

15. Nosobora kukora ki kurora watunga omulingo ogurakukonyera kukora nka payoniya?

¹⁵ Abarukukira obwingi abali omu buheereza obw’akasumi koona basemeriire kukora nukwo besagike. (Engeso Ezabakwenda 18:2, 3) Naiwe nosobora kusoma koosi etarukutwara obwire bwingi erukusobora kukukonyera kutunga omulimo nambere oli ogw’orakora gukakusagika omu kukora nka payoniya. Gambiraho omurolerezi w’ekicweka kyanyu n’abapayoniya ha ntekaniza zaawe nukwo bakuhe amagezi. Hanyuma ohondere obuhabuzi bwa Baibuli oburukugamba, “sigira Mukama emirimo yawe, kandi nebitekerezo byawe birigumibwa.”​—Enfumo 16:3; 20:18.

16. Obuheereza bw’akasumi koona nibusobora kukutekaniriza buta obujunanizibwa obw’ebiro ebirukwija?

¹⁶ N’osobora kukigumya ngu Yahwe n’agonza ‘okwate obwomeezi obu’ obw’ebiro eby’omu maiso ebirungi. (Soma 1 Timoseo 6:18, 19.) Obuhereza bw’akasumi koona bukonyera omuntu kukura omu by’omwoyo habwokuba akora n’abandi abali omu buhereza nka bunu. Abamu nibagamba ngu habwokuba bakataaha obuheereza bunu bakyali bato, hati kibakonyire omu buswere bwabo. Emirundi erukukira obwingi, omuntu obwasangwa ali payoniya kandi akataaha obuswere, ayeyongera kukora nka payoniya uwe n’omugonzebwa we.​—Abarumi 16:3, 4.

17, 18. Omutima gwine bujunanizibwa ki obu kirukuhika ha kukora entegeka?

¹⁷ Obwoba nokora entekaniza, oba obandize kugitekerezaho ha mutima. Zabuli 20:4 rubazaho ruti Yahwe: “Akuhe omutima gwawe ekigugonza, ahikirize okutekereza kwawe kwona.” Obworaaba nokora entekaniza y’ebiro eby’omu maiso, banza ogitekerezeho kuruga ha mutima nukwo orole omulingo gwonyini ogu wakugondeze kukozesamu obwomeezi bwawe. Kandi otekerezeho omulimo Yahwe arukukora omu kasumi kanu nukwo naiwe orole eky’osobora kukora omu mulimo ogu. Hanyuma, ocwemu kukora ekiramusemeza.

¹⁸ Noija kutunga okusemererwa kwingi obworakozesa obwomeezi bwawe bwona kuhereza Yahwe n’okumuhaisa ekitiinisa. Naija kufooka ndugirro y’okusemererwa kwawe kandi “alikuha ebyokusaba ebyomutima gwawe.”​—Zabuli 37:4.