Ebikaguzo Kuruga omu Basomi Baitu
Omukristaayo asemeriire kutunga emundu y’okumulinda hali abanyanzigwa?
Emisingi enu n’eyoleka ngu kintu kibi Abakristaayo kukozesa eby’okurwanisa nk’emundu kubalinda hali abanyanzigwa. Katubazeho ensonga zimu.
Obwomeezi bw’omuntu bw’omuhendo hali Yahwe. Omuhandiiki wa Zabuli obwakaba nabazaho Yahwe akagamba ngu: “Haliiwe haloho ensoro eyobwomezi.” (Zabuli 36:9) Nahabweki, kakuba Omukristaayo acwamu kwerinda, rundi kulinda ebintu bye bitahikwaho akabi, asemeriire kukora kyona ekirukusoboka kurora tiyaita omuntu.—Ekyebiragiro 22:8; Zabuli 51:14.
Nobukiraaba ngu omuntu arukwerwanaho n’asobora kukozesa ekintu kyona kwita omuntu ondi, twijuke ngu ogu anyakwine emundu uwe nikimwanguhira muno kwita, abe akigenderiire rundi atakigenderiire. * (Rora obugambo obuli hansi.) Ekindi, omunyanzigwa nasobora kuba atinire ira, baitu kakuba arora emundu, nauwe nasobora kuba nagonza kwerwanaho hanyuma omu halubo namalirra afiire.
Yesu obu yaragiire abegeswa be kuhimba empirima ha kiro eky’akaba nagenda kwitwa, akaba atarukumanyisa ngu zikaba z’okurwanisa. (Luka 22:36, 38) Akaba n’agonza kubegesa isomo linu: Abegeswa be bakaba batasemeriire kurwana, n’obu kiraaba ngu bakaba nibagenda kutangatangana ekitebe ky’abantu ekihimbire eby’okurwanisa. (Luka 22:52) Petero obu yakozeseze empirima ye kurwanisa omwiru wa nyakatagara omukuru, Yesu akaragira Petero ati: “Empirima yawe ogiga’re omu kiikaro kyayo.” Hanyuma Yesu akamuha omusingi naitwe ogu tusemeriire kuhondera. Akagamba: “Bona abakwata empirima balifa empirima.”—Matayo 26:51, 52.
Nk’oku kyaragwirwe omu Mika 4:3, abaheereza ba Ruhanga ‘bahesa busitama zabu okuba enfuka, namacumu gabu okuba ebisalizo.’ Abakristaayo ab’amananu bamanyirwe kuba bantu ab’obusinge. Bahondera ebiragiro Ruhanga yahaire kurabira omu mukwenda Paulo. Ekyokurorraho, ebiragiro nka “Mutagarurra omuntu obubi obwobubi” hamu na “muterane nobusinge nabantu bona.” (Abarumi 12:17, 18) Nobukiraaba ngu Paulo akahikwaho ebizibu by’amaani nk’okuba “omu kabi kabazinzi,” atacwe emisingi ya Baibuli kusobora kwerinda. (2 Abakolinso 11:26) Baitu akesiga Ruhanga kandi akaba namanya ngu amagezi agarukusangwa omu Baibuli “nigakira ebyokurwanisa ebyobulemu.”—Omugambizi 9:18.
Hali Abakristaayo, obwomeezi bw’omuhendo kukira itungo. Nitumanya ngu “obwomeezi bw’omuntu tiriri itungolye eryanyinalyo.” (Luka 12:15) Nahabweki kakuba olengaho kubaza omu mulingo gw’obwebundaazi n’omusuma anyakwine emundu baitu akalema kukuhuliiriza, hondera obuhabuzi bwa Yesu oburukugamba: “Mutalitanga omubi.” Kinu nikimanyisa ngu nosobora kumuleka atwale buli kintu kyona eky’arukugonza. (Matayo 5:39, 40; Luka 6:29) * (Rora obugambo obuli hansi.) Baitu kirungi tuleke kukora ebintu ebirukusobora kusikiriza abasuma. Nitusobora kwerinda abasuma kakuba tuhondera obuhabuzi bwa Baibuli oburukututererra kwetantara okweyoleka. (1 Yohana 2:16) Kandi nitwija kutunga obulinzi obu turaaba nitwikara omu businge n’abatahi baitu.—Enfumo 18:10.
Abakristaayo tibagonza kutabaijura omuntu w’omunda ow’abantu abandi. (Abarumi 14:21) Kakuba ab’oruganda n’abanyaanya itwe abamu bahurra ngu haroho Omukristaayo mugenzi wabo omu kitebe anyakwine emundu y’okumulinda hali abanyanzigwa, nikisobora kubatinisa rundi kubatabaijura. Nikisobora kuba nikiikirizibwa omu biragiro omuntu kutunga emundu. Baitu habw’okugonza abaheereza bagenzi baitu, titwakugondeze kukora ekintu kyona ekirukubatabaijura.—1 Abakolinso 10:32, 33; 13:4, 5.
Abakristaayo basemeriire kuba kyokurorraho ekirungi hali abantu abandi. (2 Abakolinso 4:2; 1 Petero 5:2, 3) Kakuba Omukristaayo atunga emundu y’okumulinda hali abanyanzigwa, abagurusi basemeriire kumuha obuhabuzi kuruga omu Baibuli. Kakuba acwamu ngu nagenda kwikara n’emundu y’okumulinda, n’aija kuba atali kyokurorraho kirungi. Kinu nikimanyisa ngu tasemeriire kutunga obujunanizibwa bwona rundi obuheereza bwona obwembaganiza omu kitebe. Nikyo kimu n’Omukristaayo arukukora omulimo ogurukumwetagisa kukozesa emundu. Hakire aserre omulimo gundi. *—Rora obugambo obuli hansi.
Omukristaayo asemeriire kwecweramu wenka omulingo arayerindamu, omulingo aralinda eka ye n’ebintu bye, hamu n’omulimo asemeriire kukora. Baitu encwamu zinu zoona asemeriire kuzikora n’asigikirra ha misingi ya Baibuli. Yahwe Ruhanga akatuha emisingi enu habwokuba natugonza. Enu niyo ensonga habwaki Abakristaayo abanyakwine enkoragana y’amaani na Yahwe bacwamu ngu tibarukwija kutunga emundu y’okubalinda hali abanyanzigwa. Nibakigumya ngu nibaija kutunga obulinzi obutahwaho obu barayesiga Ruhanga kandi bakahondera emisingi ya Baibuli.—Zabuli 97:10; Enfumo 1:33; 2:6, 7.
Omuhito mwingi obu gulihika, Abakristaayo tibalirengaho kwerwanaho baitu balyesiga Yahwe
^ kac. 3 Omukristaayo n’asobora kucwamu kuba n’emundu y’okukozesa omu kuhiiga ebisoro nukwo atunge eky’okulya rundi kwerinda bitamutahirira. Baitu omu bwire obwarukuba atarukugikozesa, asemeriire kugihamu amasasi rundi agipangurre nukwo agyahule kurungi nambere kitarukwanguha kugizoora. Omu bikaro nambere kitarukwikirizibwa kuba n’emundu rundi nambere gavumenti etarukwikiriza buli muntu kuba n’emundu, Abakristaayo basemeriire kworobera ebiragiro.—Abarumi 13:1.
^ kac. 6 Kumanya omulingo osobora kwerwanaho kakuba omuntu aba nagonza kukuhamba, rora Awake! eya Maaci 8, 1993 nambere hali omutwe “Omulingo Osobora Kwerinda Kuhambwa.”
^ kac. 2 Kumanya ebirukukiraho ebirukukwata ha kukora emirimo erukwetagisa kuba n’emundu, rora Watchtower ya Novemba 1, 2005, rupapura 31; hamu n’eya Julaayi 15, 1983, rupapura 25-26.
