Osomere kurungi magaziini eza Omunaara gw’Omulinzi ez’omwaka gunu? Hati, rora obu oraaba nosobora kugarukamu ebikaguzo ebirukuhonderaho:

Yahwe atuteriireho kyokurorraho ki obukirukuhika ha mulingo tusemeriire kutwazaamu abakazi?

Tabasoroora, obu naayoleka abasaija okugonza kwingi kukira abakazi. Ruhanga ahuliiriza abakazi obu naafaayo ha nyehurra zaabo n’ebirukuberalikiriza. Kandi abesigire kuhikiiriza omulimo gwe.—w24.01, rup. 15-16.

Nitusobora tuta kuteeka omu nkora obuhabuzi oburukusangwa omu Abefeso 5:​7, oburukugamba: “Mutaliterana nabo”?

Omukwenda Paulo akaba naatutererra kutaterana n’abantu abasobora kutulemesa kugumira ha ndengo za Ruhanga. Abantu nk’abo nibatwarramu abantu abatumara na bo obwire maiso h’amaiso rundi ha mikura y’okubalizaaho.—w24.03, rup. 22-23.

Tusemeriire kwetantara ebisuba bya mulingo ki?

Tusemeriire kwegendereza amakuru agatutarukumanya endugirro yago kuruga ha banywani baitu, obutumwa kuruga omu bantu abatutamanyire, hamu n’abecwireho ekitebe abarukwefoora ngu nibagonza kumanya ebirukukiraho.—w24.04, rup. 12.

Biki ebi tumanyire kandi biki ebi tutamanyire ha mulingo Yahwe alicweramu omusango Omukama Suleimani hamu n’abo abaafiire omu Sodomu na Gomora hamu n’abo abaafiire omu Kusandaara kw’Amaizi?

Titurukukigumya Yahwe obu araaba yabahwerekeriize kimu. Baitu eki turukumanya nikyo ngu Yahwe naamanya byona kandi aine embabazi nyingi.—w24.05, rup. 3-4.

Kiki ekiturukugumya habwa Ruhanga kuba “Mwandara” gwaitu? (Bir. 32:4)

Nitusobora kufoora Yahwe bwirukiro bwaitu. Nayesigwa, kandi aikara naahikiriza emirago ye. Tahindahinduka, tahindura enyetwaza ye n’ebigendererwa bye.—w24.06, rup. 26-28.

Kiki ekisobora kukukonyera kumanyira ekitebe ekihyaka?

Wesige Yahwe, naija kukukonyera nk’oku yakonyiire abaheereza be aba kara. Wetantale kulengesaniza ekitebe ekihyaka n’eki okaba orumu. Wejumbire omu kukora emirimo n’ekitebe ekihyaka, kandi olengeho kutunga abanywani abahyaka.—w24.07, rup. 26-28.

Masomo ki agarukusangwa omu byokurorraho bisatu ebirukusangwa omu Matayo esuura 25?

Ekyokurorraho ky’entaama n’embuzi kyoleka obukuru obw’okuba besigwa. Ekyokurorraho ky’abaisiki ab’amagezi n’abadomadoma, nikyoleka obukuru bw’okwikara twetekaniize kandi tuli bulindaara. Kandi ekyokurorraho eky’etaranta nikyoleka obukuru obw’okuba abekambi n’okwikara tuli bulindaara.—w24.09, rup. 20-24.

Ekisasi kya yekaru ya Suleimani kikaba kiraihire kwingana nkaha?

Omu 2 Ekyebyomubusinge 3:​4, ebihandiiko ebimu ebya kara bigamba “emikono 120,” ekifooora ekisasi kuba n’oburaiha bwa mita 53 (fuuti 175.) Baitu ebihandiiko ebindi ebirukwesigwa bigamba “emikono 20,” ekifora ekisasi kuba n’oburaiha bwa mita mwenda (fuuti 30.) Ebihandiiko ebihyaka nibizooka nk’ebikuhikaana n’obukooto bw’ebisiika bya yekaru.—w24.10, rup. 31.

Nikimanyisa ki omuheereza omu kitebe kuba ‘musaija w’omukazi omu’? (1 Tim. 3:12)

Nikimanyisa ngu aba aswire omukazi omu kandi tasemeriire kuba naasiihana. Ekindi, tasemeriire kutwaza abakazi abandi omu mulingo ogutasemiire.—w24.11, rup. 19.

Habwaki nitugamba ngu ekyahandiikirwe ekirukusangwa omu Yohana 6:53 gutabe nugwa omulingo Ekiihura kya Mukama Waitu ekya Rwebagyo kisemeriire kukorwamu?