Nicolas na Céline bakahikwaho ekizibu ekirukwahukana. Bakaikiriza obujunanizibwa obwarugire ha ofiisi y’itaagi lya France obw’okugenda omu kitebe ekihyaka. Nibagamba bati: “Ha kubanza tukaba tusemeriirwe muno, baitu hanyuma tukatandika kuhurra amasu haw’okutaba n’abanywani baitu. Tukaba tutakatungire enkoragana ey’amaani n’ab’oruganda na banyaanya itwe ab’omu kitebe ekihyaka.” a N’obu kiraaba ngu tikyanguhire, n’osobora ota kutunga okusemererwa kandi okaba w’omugaso obu ogenda omu kitebe ekihyaka? Bintu ki abandi ebi basobora kukora kukonyera? Kandi miringo ki ei osobora kugarramu abandi amaani kandi naiwe okagarurwamu amaani omu kitebe kyawe ekihyaka?

EMISINGI ENA EY’ESOBORA KUKUKONYERA KUHINDURAMU

1. Wesige Yahwe. (Zab. 37:5) Kazumi, kuruga omu Japan, akaleka ekitebe eki akaba arumu kumara emyaka 20 hanyuma y’omusaija we kusindikwa kukorra omu kiikaro ekindi. ‘Orugendo rwe akaruhayo ata hali Yahwe’? Nagamba ati: “Nkasesera Yahwe omutima gwange namugambira ebintu byona ebikaba nibintinisa, nibinkwasa amasu, hamu n’okwetuntura oku nkaba nyine. Buli murundi obu nakikoraga, yampaga amaani aganabaga ninyetaaga.”

N’osobora ota kweyongera kwesiga Yahwe? Nk’oku ekimera kyetaaga amaizi n’ebiriisa kuruga omu itaka nukwo kisobole kukura, omu mulingo nugwo gumu, okwikiriza kwaitu kusemeriire kwikara nikuliisibwa nukwo kusobole kukura. Nicolas, ou tusangirwe tubalizeeho, akakyetegereza ngu kwecumiitiriza ha kyokurorraho kya Iburahimu, Yesu, hamu na Paulo—abasaija abaayeferiize kusobora kukora Ruhanga eby’agonza—kikagumya obwesige bwe omu busagiki bwa Yahwe.  Enteekaniza ey’okwesomesa Baibuli butoosa terukwija kugarukira ha kukonyera kugumira empindahinduka omu bwomeezi bwawe kyonka, baitu kwega ebintu ebi osobora kukozesa kugarramu abandi amaani omu kitebe kyawe ekihyaka.

2. Otalengesaniza ekitebe eki warugiremu n’eki orumu. (Mug. 7:10) Jules akaba aine kukora empindahinduka ey’amaani muno kusobora kumanyiira obuhangwa obuhyaka obu yarugire Benin yagenda omu United States. Nagamba ati: “Nkaba ninyehurra ngu nkaba nsemeriire kugambira buli muntu wena omuhyaka ou natangatanganaga ebirukunkwataho.” Habwokuba kinu kikaba nikyahukana ha kyakaba amanyiriire, akatandika kwesoroora hali ekitebe. Baitu hanyuma y’okumanya kurungi ab’oruganda na banyaanya itwe, akahindura entekereza ye. Nagamba ati: “Hati nkyetegeriize ngu hoona nambere tuli omu nsi, itwena nitusisana. Ekintu kyonka ekitwahukaniza nugwo omulingo tubazaamu n’omulingo tukoramu ebintu. Kikuru muno twikirize abantu nk’oku bali.” Nahabweki, wetantale kulengesaniza ekitebe eki orumu n’eki warugiremu. Nk’oku munyaanya itwe omu ow’arukwetwa Anne-Lise kandi ow’ali payoniya yagambire: “Ntagende omu kitebe ekihyaka kuserra ebi nkaba nsigire enyuma. Nkagenda kuzoora ebintu ebihyaka.”

Abagurusi nabo tibasemeriire kulengesaniza ekitebe eki baarugiremu n’eki barumu. Habwokuba ab’oruganda omu kitebe ekihyaka nibakora ebintu omu mulingo ogurukwahukana, eki tikirukumanyisa ngu ebi barukukora bigwire. Kikuru kubanza kumanya enyikara ez’ekiikaro otakahaireyo enteekereza yaawe. (Mug. 3:​1, 7b) Kirungi kwegesa ab’oruganda kuraba omu kyokurorraho kyawe omu kiikaro ky’okulengaho kubahambiriza kutekereza nka iwe.—2 Kol. 1:24.

3. Ba na bingi eby’okukora omu kitebe kyawe ekihyaka. (Baf. 1:27) Kufuruka kyetaagisa obwire bwingi n’amaani, baitu kikuru muno kugenda omu nsorrokano z’ekitebe—maiso ha maiso obu kiraaba nikisoboka—kurugira kimu ha kutandika. Ab’oruganda na banyaanya itwe omu kitebe kyawe ekihyaka nibetaaga kukurora noija omu nsorrokano butoosa nukwo basobole kukunywana kandi bakukonyere. Lucinda, na bahara be babiri abafurukiire omu rubuga orukooto omu South Africa, nagamba ati: “Banywani bange bakanyekambisa kuteeka omutima ha kufoora ab’oruganda omu kitebe kyange ekihyaka banywani bange, kukora nabo omu buheereza n’okwejumbira omu nsorrokano. Ekindi, tukagambira ab’oruganda ngu nibasobora kukozesa eka yaitu kukwatirahoga orusorrokano orw’okugenda omu buheereza.”

‘Kukorra hamu’ emirimo y’ekitebe n’ab’oruganda na banyaanya itwe omu kitebe kyawe ekihyaka guli mulingo omurungi muno ogw’okuleetaho “okuikiriza okwenjiri.” Anne-Lise, ou tusangirwe tubalizeehoga, akekambisibwa abagurusi be ab’ekitebe kulengaho kutebeza na buli omu wena omu kitebe. Kiki ekyarugiremu? Nagamba ati: “Nkanguha kukyetegereza ngu gunu mulingo omukuru ogw’okwehurra oli kicweka ky’ekitebe.” Ekindi, kwehayo kukonyera omu mirimo nk’okuyonja n’okurolerra Ekyombeko ky’Obukama nikiija kwoleka ab’oruganda na banyaanya itwe ngu eki hati nokitwara nk’ekitebe kyawe. Obu oyeyongera kwejumbira omu kitebe, nikiija kwanguhira ab’oruganda kukunywana kandi noija kwehurra ngu enu eri eka yaawe ey’eby’omwoyo.

 4. Tunga abanywani abahyaka. (2 Kol. 6:​11-13) Kwoleka okufaayo nugwo omulingo ogurukukirrayo kimu ogw’okutunga abanywani, nahabweki, kora entekaniza kwija kara ensorrokano zitakatandikire kandi oikaleho na hanyuma y’ensorrokano kuhwa nukwo otunge obwire bw’okubaza n’abantu okabamanya kurungi. Teekamu amaani kumanya amabara gaabo. Kwijuka amabara g’abantu, kuba n’obutagasi, hamu n’okuba muntu arukuhikirirwa, nikiija kusikiriza abantu kugonza kukumanya kandi bafooke banywani bawe abarungi.

Omu kiikaro ky’okwefoora eki otali nukwo bakugonze, kirungi kuleka ab’oruganda kumanya oli muntu owa mulingo ki. Kora nk’oku Lucinda arukugamba, “Hati twine abanywani abarungi habwokuba tukora kyona eki turukusobora kubaraaliza omu ka yaitu.”

“MUTANGIIRANGANEGE”

Kutaaha omu Kyombeko ky’Obukama ekiijwiremu abantu ab’otamanyire nikisobora kutiinisa abantu abamu. Hati, nosobora kukonyera ota abantu abahyaka abaija omu kitebe kyanyu? Omukwenda Paulo akekambisa ab’oruganda ati: “Mutangiiranganege nka Kristo nauwe oku yatangiriire inywe.” (Bar. 15:​7, NWT) Kuraba omu kuhondera ekyokurorraho kya Kristo, abagurusi nibasobora kukonyera abahyaka kwehurra ngu nibatangirirwa. (Rora akasanduuko “ Ebintu Ebisobora Kukukonyera Kumanyiira Bwangu Hanyuma y’Okufuruka.”) Baitu, boona omu kitebe baine obujunanizibwa obw’okukukonyera abahyaka kwehurra nibagonzebwa.

Kutangirra abandi kitwarramu kwoleka amakune baitu nikisobora nokutwarramu n’okubakonyera. Ekyokurorraho, munyaanya itwe omu akakozesa obwire bwe kurambuza munyaanya itwe ow’akaba afurukiire omu kicweka kye orubuga kandi yamwoleka omulingo asobora kukozesaamu bbasi n’egaali y’omwika. Kinu kikakwataho muno munyaanya itwe omuhyaka kandi kyamuleetera kwehurra ateekaine omu ka ye empyaka.

OMUGISA OGW’OKUKURAKURANA

Enzige obw’eba n’ekura, eyehohoora ekisusu kyayo emirundi nyingi, amapapa gaayo gatakatungire amaani ag’okuhurruka. Omu mulingo nugwo gumu,  obutufurukira omu kitebe ekihyaka, kiba nikitwetaagisa kweihaho okweralikirra kwona okusobora kutulemesa kwanjurra amapapa gaitu omu buheereza bwaitu hali Yahwe. Nicolas na Céline nibagamba ngu: “Kufuruka kuli kutendekwa okurungi. Kusobora kumanyiira abantu abahyaka hamu n’ekiikaro ekihyaka, bikatwekambisa kukurakuraniza emiringo empyaka.” Jean-Charles, ou tusangire tubalizeeho hakutandika, nabazaaho omulingo agasirwe ati: “Empindahinduka zinu zikonyiire abaana baitu kukura omu by’omwoyo kandi n’okwongera kwirra haihi na Yahwe omu kitebe kinu ekihyaka. Hanyuma y’emyezi nke muhara waitu akaikiriza kuheebwa ebicweka omu rusorrokano orwa hagati omu wiiki kandi mutabani waitu akafooka mutebezi ow’atakabatiziibwe.”

Ekyokurorraho, kakuba enyikara zaawe ziba zitarukukusobozesa kugenda nambere hali obwetaago? N’osobora kuleetera ekitebe kyawe kuba nk’ekihyaka hali iwe kuraba omu kuteeka omu nkora gamu h’amagezi agakuhairwe omu kicweka kinu? Obu n’oyesiga Yahwe, wejumbire omu mirimo y’ekitebe kuraba omu kukora enteekaniza kukora n’abandi omu buheereza hamu n’okutunga abanywani abahyaka rundi kugumya enkoragana n’abanywani ab’osangirwe nabo. Obundi n’osobora kugira eki wakoraho obu n’okonyera abahyaka rundi abo abali omu bwetaago. Nk’oku okugonza kali kokurorraho ak’Abakristaayo ab’amananu, obu orakonyera abandi nikiija kukwiriza haihi na Yahwe. (Yoh. 13:35) N’osobora kukigumya ngu “ebyonzira ebirukusisana biti Ruhanga nabisiima muno.”—Baheb. 13:16.

Nobu kiraaba ngu batangatangana ebizibu, Abakristaayo baingi basoboire kutunga okusemererwa n’okuba ab’omugaso omu bitebe byabo ebihyaka—kandi naiwe n’osobora! Anne-Lise nagamba ati: “Kuhindura ebitebe kikankonyera kumanya kurungi ab’oruganda na banyaanya itwe.” Hati Kazumi nakigumya ngu obwofuruka “Yahwe naija kwikara nakukonyera omu miringo ey’otakaroraga.” Kandi uwe Jules nagamba ati: “Abanywani abantungire bankonyera kwehurra nteekaine. Hati ninyehurra ndi kicweka ky’ekitebe kyange ekihyaka kuhika ha rulengo ngu tindukugonza kukirugamu.”