1. Kusigikirra ha Omugambizi 7:20, mananu ki Sulemani agayabalizeeho?

 OMUKAMA Sulemani akahandika ati: “Tiharoho hansi omuntu ahikiriire, arukukora kurungi, atarukukora kubi.” (Mug. 7:20) Nigo mananu mali! Itwena tuli basiisi. (1 Yoh. 1:8) Nahabweki itwena nitwetaaga kuganyirwa Ruhanga n’abataahi baitu.

2. Oyehurra ota munywani wawe nfe na nfe obwakuganyira?

² Hataroho kugurukyagurukya n’oijuka akasumi nambere w’abiihize munywani wawe nfe na nfe. Habw’okugonza kwongera kufooka munywani we, okamusaba ekiganyiro kuruga ha mutima. Okehurra ota munywani wawe obuyakuganyire? Okehurra kurungi kandi watunga okusemererwa!

3. Biki ebiturukugenda kubazaaho omu kicweka kinu?

³ Nitugonza Yahwe afooke munywani waitu nfe na nfe, baitu obwire obumu, nitwija kubaza rundi kukora ebintu ebiramubiihiza. Habwaki nitusobora kukigumya ngu Yahwe aine ekihika eky’okutuganyira? Okuganyira kwa Yahwe nikukira kuta okwaitu abantu? Kandi eky’okumalirra, nibaha Yahwe abaaganyira?

4. Habwaki nitukigumya ngu Yahwe ayetekaniize kuganyira?

⁴ Ekigambo kya Ruhanga nikitugumya ngu Yahwe ayetekaniize kutuganyira. Yahwe obuyasoboroliire Musa emiringo ye ha Rusozi Sinai, kurabira omu malaika akamugambira  ati: ‘[Yahwe, Yahwe], Ruhanga aijuire okuganyira kandi owembabazi, aikaraho okutabihirwa, asaagire ebyokuganyira namazima; nagirra embabazi enkumi nenkumi, alekera okutahikirra nokusisa nekibi.’ (Kurug. 34:6, 7) Yahwe ali Ruhanga ow’embabazi ow’aikara ayetekaniize kuganyira abasiisi abegarukamu.​—Neh. 9:17; Zab. 86:15.

5. Kusigikirra ha Zabuli 103:13, 14, kiki Yahwe eky’akora habwokuba amanyire kurungi abantu?

⁵ Yahwe amanyire buli kimu kyona ekirukutukwataho habwokuba nuwe Muhangi waitu. Kitekerezeeho! Yahwe amanyire buli kimu kyona ekirukukwata ha buli muntu ow’ali omu nsi. (Zab. 139:15-17) Nahabweki n’asobora kurora obutahikirra bwona obutwaijukwire kuruga h’abazaire baitu. Amanyire n’ebintu ebitwarabiremu, ebituletera kwetwaza omu mulingo twetwazaamu. Yahwe, habwokuba atumanyire kurungi, kimuletera kukora ki? Kimuletera kutwoleka embabazi.​—Zab. 78:39; soma Zabuli 103:13, 14.

6. Yahwe akyolekere ata ngu aine ekihika eky’okuganyira?

⁶ Yahwe ayolekere ngu aine ekihika eky’okuganyira. Nakyetegereza ngu habw’ebikorwa eby’omuntu ow’okubanza Adamu, itwena tukahikwaho omukyeno gw’ekibi hamu n’okufa. (Bar. 5:12) Hakaba hataroho omulingo gwona ogutusobora kwecungura rundi kucungura omuntu ondi wena kuruga omu mukyeno ogu. (Zab. 49:7-9) Baitu Ruhanga waitu ow’okugonza, akatusaliririrwa kandi y’akora entekaniza ey’okutucungura. Kiki ekiyakozere? Nk’oku Yohana 3:16 rurukwoleka, Yahwe akatuma Omwana we omu wenka kutufeera. (Mat. 20:28; Bar. 5:19) Yesu akafa omu kiikaro kyaitu​—nukwo asobole kucungura omuntu wena anyakumwikiririzaamu. (Baheb. 2:9) Kiine kuba kyasaliize muno Yahwe kurora Omwana we omugonzebwa naitwa omu mulingo ogurukusaaliza kandi ogurukuswaza! Hataroho kugurukyagurukya, Yahwe tiyakwikiriize Omwana we kufa kakuba yali atarukugonza kutuganyira.

7. Bantu ki abamu abarukubazibwaho omu Baibuli Yahwe abayaganyire?

⁷ Baibuli eijwiremu ebyokurorraho bingi eby’abantu Yahwe yaganyire. (Bef. 4:32) Noha ow’obandize kutekerezaaho? Obundi otekerizeeho Omukama Manase. Omusaija ogu omubi akasiisira Yahwe omu miringo  erukukirayo obubi. Yaramyaga baruhanga ab’ebisuba kandi yayekambisaaga n’abandi kukikora. Akaita abaana be, kurabira omu kubahonga hali baruhanga ab’ebisuba. Akahika na ha rulengo orw’okukora ekisisani ekya ruhanga ow’ebisuba yakiteeka omu yekaru ya Yahwe ey’erukwera. Baibuli, n’emubazaaho eti: “Akakora kibi kingi omu maiso ga [Yahwe], okumubihiza.” (2 Byom. 33:2-7) Baitu, Manase obuyayegarukiremu kuruga ha mutima, Yahwe akamuganyira. Kandi akamugarura n’obukama bwe. (2 Byom. 33:12, 13) Obundi otekerizeeho n’Omukama Daudi, ayakozere ebibi eby’amaani muno omu maiso ga Yahwe, nk’obusihani hamu n’obwisi. Baitu, Daudi obuyaikiriize ekibi kye kandi yayegarukamu kuruga ha mutima na uwe Yahwe akamuganyira. (2 Sam. 12:9, 10, 13, 14) Nitukigumiza kimu ngu Yahwe aine ekihika eky’okuganyira. Kandi nk’oku turarora, obusobozi bwa Yahwe obw’okuganyira nibukirra kimu obw’abantu. 

8. Ekiikaro kya Yahwe eky’embaganiza nk’Omucwi w’Emisango kimusobozesa kita kuganyira?

⁸ Yahwe nuwe “Omucwi wemisango yensi zona.” (Kub. 18:25) Omucwi w’emisango omurungi asemeriire kuba n’ayetegereza kurungi ebiragiro. Busaho kugurukyagurukya, Yahwe amanyire kurungi ebiragiro habwokuba nuwe muhi w’ebiragiro oihireho eky’okuba Mucwi w’Emisango. (Is. 33:22) Busaho muntu wena asobora kukira Yahwe kumanya ekihikire n’ekigwire. Kiki ekindi omucwi w’emisango omurungi aba nayetaaga? Nayetaaga kuba amanyire amananu goona atakacwire omusango. Nahabweki Yahwe nuwe Mucwi w’Emisango arukukirrayo kimu oburungi habwokuba aikara amanyire amananu goona.

9. Biki Yahwe ebyasigikirraho kuganyira rundi okutaganyira omuntu?

⁹ Okutasisanaho abantu abandi abacwa emisango, Yahwe aikara amanyire amananu goona agarukukwata ha musango. (Kub. 18:20, 21; Zab. 90:8) Tagarukira ha bintu abantu basobora kurora rundi kuhurra. Nayetegerereza kimu nk’oku ebikorwa by’omuntu bisigikirra ha miringo hamu n’engeso ebiyaijukwire kuruga hali bazaire be, okusoma kwe, nambere arukwikara, enyehurra, hamu n’enyikara ye ey’obwongo. Ekindi, Yahwe arora ebiri ha mutima. Nayetegerereza kimu ensonga habwaki omuntu akora ekintu. Busaho kintu kyona ekisobora kuserekwa hali Yahwe. (Baheb. 4:13) Nahabweki, Yahwe obwaganyira omuntu aba akikozere habwokuba aba n’amanya amananu goona agarukukwata ha kibi eky’omuntu aba akozere.

10. Habwaki nitusobora kugamba ngu omulingo Yahwe acwa emisango gwikara guli gw’obwinganiza? (Ekyebiragiro 32:4)

¹⁰ Omulingo Yahwe acwa emisango gwikara guli gw’obwinganiza. Yahwe tasoroora. Yahwe tasobora kuganyira omuntu habwokuba ngu nazooka kurungi, muguuda, aine ebitiinisa, rundi habw’ebisembo bingi eby’aine. (1 Sam. 16:7; Yak. 2:1-4) Busaho muntu asobora kusindikiriza Yahwe rundi kumuha enguzi. (2 Byom. 19:7) Encwamu ze tizisigikirra ha kiniga rundi ha nyehurra ze. (Kurug. 34:7) Yahwe nuwe Omucwi w’Emisango arukukirrayo kimu, habwokuba n’amanya buli kimu kyona ekirukutukwataho hamu n’enyikara yaitu.​—Soma Ekyebiragiro 32:4.

11. Okuganyira kwa Yahwe nikwahukana kuta n’okw’abantu?

¹¹ Abaahandiikire Ebyahandiikirwe eby’Oruheburaniya bakakyetegereza ngu kuganyira kwa Yahwe kw’embaganiza. Haroho nambere bakozesaaga ekigambo ky’Oruheburaniya  abakugu abamu ekibagamba ngu “kyoleka okuganyira kwa Ruhanga hali abasisi, hatali okuganyira okutaito kandi okw’ekipimo abantu okubolekangana.” Yahwe nuwe aine obusobozi obw’okuganyirra kimu omusiisi anyakwegarukiremu. Kiki ekirugamu Yahwe obw’atuganyira?

12-13. (a) Omuntu ayegondeza omu birungi ki Yahwe obw’amuganyira? (b) Yahwe obwamara kutuganyira, agumizaamu natujunaana habw’ekibi ekitwakozere?

¹² Obutwikiriza ngu Yahwe atuganyiire, twegondeza omu biro “ebiro ebyokuhumuzibwa,” otwaliiremu obusinge omu biteekerezo hamu n’okuba n’omuntu ow’omunda omurungi. Okuganyira nk’oku tikusobora kuruga omu bantu, baitu kusemeriire “okuruga omu maiso ga [Yahwe].” (Eng. 3:19) Yahwe obwatuganyira twongera tufooka banywani be kandi tusisana oti rundi titukasiisaga.

¹³ Yahwe obwamara kutuganyira tayongera kutujunaana rundi kutufubira habw’ekibi eki. (Is. 43:25; Yer. 31:34) “Nkoburugaizoba okubuli hara nobugwaizoba,” nukwo Yahwe ateeka hara ebibi byaitu. * (Zab. 103:12) Obututekerezaaho omulingo Yahwe aganyira, kituletera kumusiima n’okumutiina. (Zab. 130:4) Baitu nibaha Yahwe abaaganyira?

14. Biki ebitwakeega ha kuganyira kwa Yahwe?

¹⁴ Nk’oku turozere, Yahwe taganyira omuntu kusigikirra ha bukooto bw’ekibi kye. Kandi nk’oku twegere, Yahwe akozesa amagezi ge nk’Omuhangi waitu, Omuhi w’Ebiragiro, kandi nk’Omucwi w’Emisango kucwamu obwaraaba asemeriire kuganyira omuntu. Nsonga ki Yahwe ez’atekerezaaho atakacwiremu kuganyira omuntu rundi kutamuganyira?

15. Kusigikirra ha Luka 12:47, 48, nsonga ki emu Yahwe ey’atekerezaaho?

¹⁵ Ensonga endi Yahwe ey’atekerezaaho eri ngu, omusiisi obwaraaba akaba amanyire ngu ekyarukukora kyali kiri kibi. Yesu akooleka kurungi ensonga enu omu Luka 12:47, 48. (Soma.) Omuntu ow’akora entekaniza ey’okukora ekintu eky’amanyiire kimu ngu kibi omu maiso ga Ruhanga, kandi akagumizaamu akakikora, aba akozere ekibi eky’amaani. Yahwe nasobora kucwamu kutaganyira omuntu  ogu. (Mar. 3:29; Yoh. 9:41) Baitu, tusemeriire kukiikiriza ngu obwire obumu tukora ebintu ebimu ebitumanyire ngu tibihikire. Haroho kunihira kwona okw’okuganyirwa? Ego! Kandi kinu nikitutwara ha nsonga endi Yahwe ey’atekerezaaho.

16. Kwegarukamu nikimanyisa ki, kandi habwaki kikuru Yahwe obwaraaba ali w’okutuganyira?

¹⁶ Ensonga endi Yahwe ey’atekerezaaho niyo ngu omusiisi obwaraaba ayegarukiremu kuruga ha mutima. Kwegarukamu nikimanyisa ki? Kwegarukamu nikimanyisa omuntu “kuhindura entekereza ye, rundi ekigendererwa kye.” Kitwarramu omuntu kwehurra kubi n’okweijukya habw’ebintu ebibi ebiyakozere rundi habw’okutakora ebintu ebirungi eby’akaba asemeriire kukora. Omuntu ow’ayegarukiremu, asaalirwa habw’ebintu ebibi ebiyakozere kandi na habw’okuleka enkoragana ye na Yahwe kuceka, ekyamurugiriiremu kukora ebintu ebibi. Okiijuke ngu Omukama Manase hamu na Daudi boona bakakora ebibi eby’amaani; baitu nabwo Yahwe akabaganyira habwokuba bakaba begarukiremu kuruga ha mutima. (1 Bakam. 14:8) Ego Yahwe atuganyira obwarora ngu twegarukiremu kwo. Baitu tikirukumara kwehurra ngu tusaliirwe habw’ebibi ebitwakozere. Tusemeriire kwikara twetekaniize kugira ekitwakoraho. * Eki nikitutwara ha nsonga endi Yahwe ey’atekerezaaho.

17. Kuhinduka nikimanyisa ki, kandi habwaki nikwetaagisibwa obuturaaba tuli b’okwerinda kukora ebibi ebitwakoraga kara? (Isaya 55:7)

¹⁷ Kuhinduka eri nsonga endi enkuru Yahwe ey’atekerezaaho. Kuhinduka nikimanyisa omuntu kuleka kukora ebintu ebibi kandi akatandika kwetwaza omu mulingo Yahwe arukugonza abantu betwazeemu. (Soma Isaya 55:7.) Omuntu ogu, asemeriire kuhindura entekereza ye nukwo ayebemberwe entekereza ya Yahwe. (Bar. 12:2; Bef. 4:23) Asemeriire kuba amaliriire kuleka entekereza hamu n’ebikorwa bye ebibi. (Bak. 3:7-10) Baitu Yahwe ekyasigikirraho kutuganyira n’okutwogyaho ebibi nukwo kwikiririza omu kihongwa kya Kristo. Yahwe naija kutuganyira nasigikirra  ha kihongwa eki kakuba arora nitukora kyona ekiturukusobora kuhindura engeso zaitu.​—1 Yoh. 1:7.

18. Biki ebitwegere ha kuganyira kwa Yahwe?

¹⁸ Leka tweijukyemu omu bugufu ensonga ezimu ezitubalizeeho. Yahwe nuwe arukukirrayo kimu kuganyira omu nsi n’omu iguru. Habwaki nitugamba tuti? Eky’okubanza, aikara ayetekaniize kuganyira. Ekyakabiri, atumanyire kurungi. Amanyire buli kimu kyona ekirukutukwataho, kandi nuwe muntu arukukirrayo kimu kumanya obutuba twegarukiiremu kimu kuruga ha mutima. Kandi eyakasatu, Yahwe obw’atuganyira atuganyirra kimu, kandi omu maiso ge tusisana nk’abatakakoraga ekibi eki. Kinu kitusobozesa kuba n’omuntu ow’omunda omurungi, kandi n’okusiimwa omu maiso ge.

19. N’obukiraaba ngu tituhikiriire kandi nitwija kugumizaamu nitusiisa, habwaki nitusobora kutunga okusemererwa?

¹⁹ Ky’amananu ngu, nk’oku tukyali abantu abatahikiriire, nitwija kugumizaamu nitusiisa. Baitu nitusobora kutunga okuhumuzibwa kuruga omu bigambo ebirukusangwa omu Insight on the Scriptures, Omuzingo 2, orupapura 771: “Nk’oku Yahwe w’embabazi kandi amanyire obuceke obw’abaheereza be, tibasemeriire kwikara nibehurra kubi obwire bwona habw’ensobi ezibakora habw’obutahikirra bwabo. (Zab 103:8-14; 130:3) Kakuba baba nibakora kyona ekibarukusobora kurubatira omu mihanda ya Ruhanga, nibasobora kutunga okusemererwa. (Baf 4:4-6; 1Yoh 3:19-22).” Eki kanikigarramu amaani!

20. Nitwija kubazaaho ki omu kicweka ekirukwongeraho?

²⁰ Nitusiima muno Yahwe habwokuba aikara ayetekaniize kutuganyira obutuba twegarukiremu kwo habw’ebibi byaitu. Baitu itwe, nitusobora tuta kwegera ha kuganyira kwa Yahwe? Miringo ki okuganyira kwaitu kurukusisana n’okwa Yahwe, kandi miringo ki eikurukwahukanamu? Habwaki kikuru kwetegereza embaganiza egi? Nitwija kugarukamu ebikaguzo ebi omu kicweka ekirukwongeraho.