Ebikaguzo Kuruga omu Basomi Baitu
Abaisaleri obubakaba bali omu irungu, baali baine ebyokulya ebindi byona oihireho emanu n’endahi?
Abaisaleri bakiraga kulya emanu omu myaka 40 eibaamazire omu irungu. (Kurug. 16:35) Kandi emirundi ebiri, Yahwe akabaha endahi. (Kurug. 16:12, 13; Kubar. 11:31) Baitu bakaba baine ebyokulya ebindi bike, ebibaali nibasobora kulya.
Ekyokurorraho, obwire obumu Yahwe yabebemberaga, nabahikya omu biikaro eby’okuhuumurramu ebyabamuga ebyokulya ebyemereze hamu n’amaizi. (Kubar. 10:33) Kimu ha biikaro binu nikyo ekya Erimu “nambere hakaba hali ensoro zamaizi ikumi naibiri, nemikindo nsanju,” kandi nikizooka ngu emikindo enu ekaba n’esisana negi enyakwolekerwe ha rupapura 31. (Kurug. 15:27) Ekitabu ekirukwetwa Plants of the Bible nikigamba ngu “emikindo enu yabaga omu biikaro bingi ebirukwahukana omu irungu, . . . Kandi ebijuma byayo ebyolekerwe omu kisisani byalibwaga, nibaihamu amagita ag’okucumbisa, kandi baingi baahumurraga hansi y’emiti enu.”
Abaisaleri nibasobora kuba bayongiire baahumurra omu kiikaro ekirumu amaizi, hati ekirukumanywa nka Feiran, ekiri omu kyeya kya Feiran. Ekitabu Discovering the World of the Bible, nikigamba kiti: “Ekyeya kinu ekirumu ekisaaru, kikooto kwingana nka mairo 81 [kilomita 130] kandi kiri kimu ha byeya ebirukukirayo kuraiha, kusemera, n’okumanywa kukira ebyeya ebindi eby’omu Sinai. Mairo nka 28 [kilomita 45] kuruga nambere ekisaaru kirukutangatanganira n’enyanja, haroho ekiikaro ekirungi muno ekirukwetwa ekyeya kya Feiran. Kiraihire nka mairo 3 [kilomita 4.8], kandi kirumu emikindo emirungi muno. Habw’oburungi bwakyo, baingi bakyeta Adeni ya Sinai. Kurugira kimu kara emiti enu eretiire abantu baingi kugenda kwikara omu kiikaro eki.”
Emiti ey’omu kyeya kya Feiran n’ebijuma byayo
Abaisaleri obubaali nibaruga Misiri, bakaihayo ensaano, encuba, ebyokulya ebindi, n’amagita ag’okucumbisa. Ky’amananu ngu ebintu binu bitamale akasumi. Ekindi abantu bakarugayo ‘n’entaama, ente, n’ebisoro bingi muno.’ (Kurug. 12:34-39) Baitu habw’enyikara embi ez’omu irungu, ebisoro ebimu nibisobora kuba byafiire. Ebindi nibasobora kuba baabiriire kandi ebindi baabihayo nk’ebihongwa, otwaliiremu n’okubihongera baruhanga ab’ebisuba. a (Eng. 7:39-43) Baitu nabwo, Abaisaleri bakaba baine amagana g’ebisoro. Kinu nitukirorra ha bigambo Yahwe yabagambiire hanyuma y’okumujeemera. Akabagambira ati: “Abana banyu baliba balisa omu irungu okuhikya emyaka amakumi ana.” (Kubar. 14:33) Nahabweki, nikisoboka ngu amagana gaabo gabahaga amata kandi obwire obumu nibalya n’enyama baitu byali bitasobora kuliisa abantu abarukuhika nk’obukaikuru busatu kumara emyaka 40. b
Baitu kandi ebisoro byaihaga nka amaizi n’ebyokulya? c Nikisobora kuba ngu kasumi ako, omu kiikaro eki hagwamuga enjura nyingi ekyasobozesaga ebinyansi kukura. Ekitabu Insight on the Scriptures, Volume 1, nikigamba ngu; Emyaka nka 3,500 enyuma, “omu kiikaro nambere Abaisaleri baarabire, hakaba harumu amaizi maingi kukira nk’oku kiri hati. Kinu nukwo kiri habwokuba omu kiikaro eki harumu ebyeya ebirumu ebiina ebihamire kandi ebyomere ebikaba biri bisaaru kasumi ako.” Baitu nabwo ebiikaro ebirukukira obwingi omu irungu bikaba bitarumu amaizi kandi nibitiinisa. (Bir. 8:14-16) Kakuba Yahwe atarahaire Abaisaleri amaizi omu mulingo ogw’ekyamahano, ubo n’ebisoro byabo baakufiire.—Kurug. 15:22-25; 17:1-6; Kubar. 20:2, 11.
Musa akagambiira Abaisaleri ngu Yahwe akabaha emanu nukwo ‘abamanyise ngu omuntu taba mwomeezi n’ebyokulya byonka baitu habw’ekagambo kyona ekiruga omu kanwa ka Yahwe.’—Bir. 8:3.
a Baibuli ebazaaho emirundi ebiri ebisoro obubyahongerwe hali Yahwe omu irungu. Ogw’okubanza gukabaho ha kutongoza obwanyakatagara; kandi ogundi nubwo obubaali nibajaguza okuhingurwaho. Emirundi enu yoona ekabaho omu mwaka 1512 Y.A., omwaka ogwakabiri Abaisaleri barugire Misiri.—Lev. 8:14–9:24; Kubar. 9:1-5.
b Emyaka 40 obwekaba eri haihi kuhwayo, Abaisaleri bakanyaga ebisoro bingi kuruga omu bulemu. (Kubar. 31:32-34) Baitu nabwo bakagumizaamu nibalya emanu kuhikya obubaataahire omu Nsi ey’Ekaba Eraganiziibwe.—Yos. 5:10-12.
c Busaho bwakaiso oburukwoleka ngu ebisoro byalyaga emanu, habwokuba Yahwe akagambira Abaisaleri kusorooza emanu kusigikirra ha muhendo gw’abantu abali omu buli ka.—Kurug. 16:15, 16.
