Nkhamupweteka chomene munyane uyo nkhachitanga nayo maseŵero gha kalati ndipo nkhamanyanga yayi kuti ningamupweteka nthena. Nkhamutchaya kumphuno mwangozi. Nkhajiyimba mulandu chomene ndipo nkhamba kukayika usange nilutilirenge na maseŵero agha. Kweni kasi chifukwa wuli ivyo nkhamuchitira munyane vikapangiska kuti nambe kughanaghana nthena, apo nkhaghatemwanga chomene maseŵero agha kweniso nkhaŵa kuti naghasambira kwanyengo yitali? Chakwamba, lekani nimulongosolerani umo nkhambira maseŵero gha kalati.

 Nkhakulira kufupi na tawuni ya Buffalo, New York, U.S.A. Tose mu banja lithu tikaŵa Ŵakatolika ndipo tikakhalanga mwakukondwa. Apo nkhaŵa mwana nkhasambira masukulu gha Chikatolika ndipo nkhawovwiranga wasembe pakuchita milimo yinyake ya mu tchalitchi. Ŵapapi ŵane ŵakakhumbanga kuti ine na mudumbu wane tikondwenge na umoyo. Ntheura ŵakanizomerezganga kukaseŵera para nawera ku maseŵero gha ku sukulu panji ku ganyu chikuru nkhukwera magiredi ghawemi ku sukulu. Ivi vikapangiska kuti nambe kuchita vinthu mwamahara uku nichali muchoko chomene.

 Apo nkhaŵa na vyaka 17, nkhamba kusambira kalati. Kwa vyaka vinandi, nkhasambiranga kwa maora ghatatu pa zuŵa, kwa mazuŵa 6 pa sabata. Sabata yiliyose, nkhamalirangaso maora ghanandi kuyezgelera panekha kweniso kuwonelera mavidiyo ghakuti ghanovwire kuti nichitenge makora. Para nkhuyezgelera nkhatemwanga kujijara kumaso na chisalu nanga nipara nkhuyezgelera na vilwero. Nkhaswanga thabwa panji njerwa na fayiti yimoza pera. Nkhaŵa yumoza mwaŵanthu awo ŵakachitanga makora chomene maseŵero gha kalati ndipo nkhawinapo viphalizgano vinandi. Maseŵero gha kalati chikamba kuŵa chinthu chakuzirwa chomene pa umoyo wane.

 Nkhawonanga kuti niŵenge munthu wakukondwa. Nkhamalizga masambiro ghane ku Yunivesite yinyake, ndipo nkhakwera makora chomene. Nkhamba kugwira ntchito pa kampani yinyake ndipo nkhaŵa injiniya wa makompyuta. Kampani iyi yikanipanga vinthu vinandi vyakusazgikira padera pa malipiro agho nkhapokeranga, nkhaŵa na nyumba, kweniso nkhaŵa na chibwezi. Ŵanthu ŵakawonanga kuti nkhukondwa na umoyo kweni unenesko ngwakuti nkhaŵa wakukondwa yayi chifukwa nkhaŵa na mafumbo ghanyake ghakuzirwa agho nkhakhumbanga kumanya mazgoro ghake.

 Kuti nisange mazgoro gha mafumbo ghane, nkhamba kuluta ku tchalitchi kaŵiri pa sabata ndiposo kulomba kwa Chiuta kuti wanovwire. Kweni ivyo nkhadumbiskana na munyane zuŵa linyake vikasintha umoyo wane. Nkhamufumba kuti: “Kasi uli kujifumbapo chifukwa icho tiliri na umoyo?” Nkhamuphaliraso kuti: “Pa charu pali masuzgo ghanandi chomene kweniso vinthu vinandi vyambura urunji!” Iyo wakaniphalira kuti pakwamba nayo wakaŵa na mafumbo ghakuyana waka kweni wakasanga mazgoro ghake mu Baibolo. Wakanipa buku la mutu wakuti Mungathe Kukhala ndi Moyo Kosatha M’Paradaiso pa Dziko Lapansi. a Iyo wakanilongosolera kuti wakasambiranga Baibolo na Ŵakaboni ŵa Yehova. Pakwamba, nkhakhumbanga yayi kuŵerenga buku ili chifukwa nkhawonanga kuti nkhwenera kuŵerenga mabuku gha ku tchalitchi lane pera. Kweni chifukwa chakuti nkhakhumbanga kumanya mazgoro gha mafumbo agho nkhaŵa nagho, mbwenu nkhamba kuŵerenga buku ili kuti niwone usange ivyo Ŵakaboni ŵakusambizga ni vyakupulikikwa.

 Nkhakondwa chomene kumanya ivyo Baibolo likusambizga. Nkhasambira kuti khumbo la Chiuta pakwamba likaŵa lakuti ŵanthu ŵakhale pa charu chapasi kwamuyirayira mu paradiso ndipo khumbo ili lindasinthe. (Genizesi 1:28) Nkhazizwa chomene kuwona zina la Chiuta, Yehova, mu Baibolo lane la King James kweniso kumanya kuti ndilo zina ilo nkhazunuranga para nkhulomba Lurombo lwa Fumu. (Salimo 83:18; Mateyu 6:9) Kweniso paumaliro, nkhapulikiska chifukwa icho Chiuta wazomerezgera masuzgo kuti ghaŵepo kwa kanyengo. Vyose ivyo nkhasambira vikanifika pamtima chomene! Nkhakondwa maseŵera cha.

 Nizamuluwapo yayi umo nkhakondwera pa zuŵa lakwamba ilo nkhafikira pa maungano gha Ŵakaboni ŵa Yehova. Waliyose wakaŵa waubwezi ndipo wakakhumbanga kumanya zina lane. Pa zuŵa lakwamba ilo nkhafikira pa maungano, pakayowoyeka nkhani yapadera yakukhwaskana na malurombo agho Chiuta wakupulika. Mutu uwu ukanikondweska chomene chifukwa nkhaŵa kuti nkhulomba kwa Chiuta kuti wanovwire. Pamanyuma, nkhaŵapo pa Chikumbusko cha nyifwa ya Yesu. Pa maungano agha, nkhazizwa chomene kuwona kuti ŵana nawo ŵakujura Baibolo na kulondezgana nayo muyowoyi para wakuŵerenga Malemba. Pakwamba, nkhamanyanga yayi kujura Baibolo, kweni Ŵakaboni ŵakanovwira chomene na kunisambizga umo ningasangira Malemba.

 Nati nasangikapo pa maungano ghanandi, ndipo nkhamba kuwona kuzirwa kwa ivyo Ŵakaboni ŵa Yehova ŵakusambizga. Pa ungano uliwose nkhasambiranga vinandi, ndipo vikanikhozganga chomene. Ntheura Ŵakaboni ŵakanipempha kuti ŵasambirenge nane Baibolo.

 Ivyo nkhawona pakati pa Ŵakaboni ŵa Yehova vikapambananga chomene na ivyo vikachitikanga ku tchalitchi lane. Nkhawona kuti Ŵakaboni ŵa Yehova ŵakukolerana chomene kweniso kuti ŵakuyezgayezga kuti ŵakondweske Chiuta. Nkhamba kukhorwa kuti ŵakulongora chitemwa icho ntchimanyikwiro cha Ŵakhristu ŵaunenesko.—Yohane 13:35.

 Nati namba kusambira Baibolo, nkhamba kusintha umoyo wane kuti ukolerane na fundo za mu Baibolo izo nkhasambiranga. Kweni nkhawonanga kuti nkhwenera kulutirizga nipera maseŵero gha kalati. Nkhaghatemwanga chomene ndipo nkhakondwanga para tikuchita viphalizgano. Nati namuphalira uyo wakasambiranga nane Baibolo, iyo wakaniphalira mwachitemwa kuti, “Iwe lutizga waka kusambira, ndipo nkhumanya kuti usankhenge mwakwenelera.” Mazgu agha ndigho nkhakhumbikwiranga nadi kupulika. Ntheura nati nalutizga kusambira, ndipo nkhamba kumutemwa chomene Yehova Chiuta.

 Pangozi iyo nanguzunura kukwambilira kwa nkhani iyi, ndipo nkhamba kusinthira umoyo wane. Ngozi iyo nkhachita yikamba kunipangiska kughanaghana kuti ningaŵa yayi mulondezgi wa mtende wa Khristu para ningalutizga maseŵero gha kalati. Nkhasambira kuti lemba la Yesaya 2:3, 4 likayowoyerathu kuti awo ŵakulondezga ulongozgi wa Yehova “ŵazamusambiraso nkhondo chara.” Yesu wakasambizga kuti tingaŵanga ŵankhaza yayi nanga ni para ŵanthu ŵanyake ŵakutichitira vinthu vyambura urunji. (Mateyu 26:52) Ntheura nkhaleka maseŵero agho nkhaghatemwanga chomene.

 Nati nachita nthena, nkhalondezga ulongozgi wa mu Baibolo wakuti “ujizgoŵezge kusopa Chiuta mwakujipeleka.” (1 Timote 4:7) Nyengo yose iyo kale nkhamaliranga ku maseŵero gha kalati, pasono nkhuyigwiliskira ntchito pakuchita vinthu vyauzimu. Chibwezi chane chikakolerana navyo yayi vyakuti namba kusambira Baibolo, ntheura tikamazga chibwezi. Nkhabatizika na kuŵa yumoza wa Ŵakaboni ŵa Yehova pa January 24, 1987. Pakati pajumpha nyengo yichoko waka, nkhamba upayiniya wanyengozose, ndipo nkhamba kugwiliskira ntchito nyengo yane pakusambizga ŵanthu Baibolo. Nkhalutizga kuchita upayiniya m’paka apo nkhambira kuteŵetera pa ofesi yikuru ya Ŵakaboni ŵa Yehova pa charu chose ku New York, U.S.A.

 Pakuti sono nili kumanya unenesko wa Baibolo, ningayowoya kuti nili kusanga chinthu icho nkhapenjanga pa umoyo wane. Kujipulika kuti nkhusoŵerwaso kanthu yayi. M’malo mwake, nkhumanya chifukwa icho Chiuta wali kutilengera, nili na chilindizga chiwemi cha munthazi, kweniso ndine wakukondwa zanadi. Nangauli nichali kuchita maseŵero ghakukhozga thupi, kweni pasono nkhuwona kuti maseŵero ghakukhozga thupi ndigho ngakuzirwa chomene yayi kwa ine. Chinthu chakwamba pa umoyo wane nkhuteŵetera Yehova Chiuta.

 Panyengo iyo nkhachitanga maseŵero gha kalati, nyengo zose nkhaŵanga maso na ŵanthu awo nkhakhalanga nawo pafupi ndipo kanandi nkhaghanaghananga umo ningajivikililira para munthu wanganiyamba. Mazuŵa ghano napo nili maso na ŵanthu awo nakhala nawo pafupi, kweni pa chifukwa chinyake, na chilato chakuti niŵawovwire. Baibolo lanovwira kuti niŵe na mtima wakupa kweniso niŵe mfumu muwemi kwa muwoli wane wakutowa, Brenda.

 Maseŵero gha kalati ndicho chikaŵa chakurya chane. Kweni pasono chakurya chane ntchiwemi chomene kuluska maseŵero agho nkhachitanga. Baibolo likuti: “Maseŵero ghakukhozga thupi ghali na chandulo chichoko waka, kweni kusopa Chiuta mwakujipeleka kuli na vyandulo vyose, pakuti kuli na layizgo la umoyo wa sono na uwo ukwiza.”—1 Timote 4:8.