Bob wakukhala ku Alberta, Canada ndipo zuŵa linyake wakendeskanga galimoto pa sipidi ya 100 kilomita pa ora limoza, ndipo tayala la galimoto yake likaphulika. Bob wakamanya yayi kuti tayala laphulika, ntheura wakalutilira kuchimbizga galimoto kuti wakafike kunyumba kwake, mtunda wa makilomita 5. Zuŵa ili kukazizima chomene, kukaŵa chimphepo ndipo vula yiwanga.

 Bob wakalembera kalata Ŵakaboni ŵa Yehova kufupi na uko wakakhalanga, ndipo wakalongosora kuti: “Ŵanyamata ŵatatu na ŵasungwana ŵaŵiri awo Mbakaboni ŵa Yehova, ŵakaŵa mu galimoto yawo ndipo ŵakakhizga windo na kuniphalira kuti tayala la galimoto lane laphulika. Tose tikimika magalimoto ndipo ŵakaniphalira kuti ndiwo ŵaniŵikirenge tayala liwemi ku galimoto yane. Nkhamanyangaso yayi usange nkhaŵa na tayala linyake, kweniso jeki. Ine nkhakhala waka pa mpando wa ŵanthu ŵakupendera, ndipo iwo ŵakalaŵiska kusi kwa galimoto ndipo ŵakasanga tayala na jeki, kufuma apo ŵakaŵikako tayala liwemi. Kukazizimanga chomene, ndipo chiwuvi chikawanga. Nangauli ŵanyamata aŵa ŵakatchena, kweni ŵakajipeleka na kuniŵikira tayala liwemi, ndipo nkhalutilira na ulendo wane. Panekha pakaŵavya chakuti ningachita.

 “Nkhuŵawonga chomene ŵanyamata na ŵasungwana aŵa chifukwa cha kunovwira. Ŵachinyamata aŵa ŵakiza ku malo agha kuti ŵazakapharazge Mazgu gha Chiuta. Iwo ŵakachitanga nadi ivyo ŵakupharazga. Ŵakanovwira chomene, kuŵavyenge iwo nkhumanya yayi umo vikatenge vimalirenge, nkhuŵawonga chomene. Vikaŵa nga Yehova watuma waka ŵangelo kuti ŵazakanovwire.”