“Nkhaghanaghanangako yayi kuti ningazakachita vinandi pakuteŵetera Yehova.” Umu ndimo Gwen wa ku England, wakalongosolera umo wakajipulikiranga chifukwa cha kuteŵetera uko kukukhumbikwa ŵapharazgi ŵanandi ku Albania. a

 Gwen njumoza mwa Ŵakaboni ŵanandi awo ŵali kusamira ku Albania kuti ŵakawovwirepo pa mulimo wa kuwunjika “vinthu vyakuzirwa vya mitundu yose.” (Hagayi 2:7) Kasi ntchivichi chikuŵatuma ŵapharazgi aŵa kuchita nthena? Kasi ŵakasintha vichi pa umoyo wawo kuti ŵafiske kusamira ku charu ichi? Ndipo kasi ŵasanga vichi ivyo vikuŵawovwira kulutilira kuŵa ŵakukondwa na kuzizipizga masuzgo agho ghangaŵapo?

 Ŵapharazgi wose awo ŵali kwiza kuzakawovwirapo kuno ku Albania, ŵakaŵa na chilato chimoza icho chikaŵatuma: Ŵakutemwa Yehova ndipo ŵakukhumba kovwira ŵanji kuti nawo ŵamumanye makora.

 Pambere ŵandasame, ŵakasintha vinthu vinyake mwakuti chiŵe chipusu kuteŵetera Yehova mu nthowa ziphya, ndipo ivi vikaŵawovwira kuti ŵaleke kusuzgika kusamukira ku charu chinyake. Gwen wakuti: “Chakwamba nkhasamukira mu kagulu ka chiyowoyero cha ku Albania ako kakaŵa mu tawuni yakwithu. Kufuma apo nkhazakaluta ku ungano wa chigaŵa ku Albania. Pamanyuma, nkhalutaso kwenekuku kuti nkhachimanye makora chiyowoyero cha ku Albania.”

 Apo Manuela wakaŵa na vyaka 23, wakasamira ku chigaŵa chinyake mu charu chawo cha Italy, kuti wakawovwirepo mu mpingo unyake. Iyo wakuti: “Nkhateŵeterako vyaka vinayi. Mbwenu nkhapulika kuti ku Albania kukukhumbikwa wovwiri. Ntheura nkhasankha kuti nkhachiteko upayiniya kwa myezi yichoko waka.”

 Federica wakaŵa na vyaka 7 pera apo wakapulika vyakukhwaskana na lipoti la ku Albania pa ungano wa chigaŵa. Iyo wakuti: “Mubali uyo wakapelekanga lipoti ili wakati ŵapharazgi ku Albania ŵakwambiska masambiro ghanandi gha Baibolo ndipo ŵakunweka ŵakwiza ku maungano. Nkhamba kuphalira ŵapapi ŵane kuti nkhukhumba kuluta ku Albania. Ivi vikaŵazizika chomene, ndipo adada ŵakati, ‘Uyilombere nkhani iyi, ndipo para ni khumbo la Yehova, mbwenu wakuzgorenge.’ Pati pajumpha myezi yichoko waka, banja lithu likapempheka kuti likateŵetere ku Albania!” Pasono pajumpha vyaka vinandi, ndipo Federica wali kutengwa kwa Orges. Iyo na mfumu wake wose ŵakuchita uteŵeti wanyengozose ku Albania.

 Gianpiero wati wapumura pa ntchito, wakasamira ku Albania na muwoli wake, Gloria. Iyo wakuti: “Ŵana ŵithu ŵakakulira ku Italy. Ŵatatu ŵali kusamukira ku chigaŵa uko kukukhumbikwira ŵapharazgi ŵanandi. Tikakhwaskika chomene na nkhani ya mu Gongwe la Mulinda ya mutu wakuti ‘Kasi Mungambukira ku Makedoniya?’ Tikakhala pasi na kudumbiskana umo tingachitira na ndalama yane ya penshoni kuti tikateŵetere ku Albania.”

 Awo ŵakuluta kukateŵetera mu vigaŵa ivyo kukukhumbikwa ŵapharazgi ŵanandi, ŵakwenera kunozgekera makora na kusintha vinyake pambere ŵandasamuke. (Luka 14:28) Vinyake mwa vinthu ivyo ŵakwenera kuchita, nkhusanga nthowa za umo ŵamusangira ndalama zakuŵawovwira pa umoyo wawo. Gwen uyo tamuzura kukwamba apo wakaŵa wachali kwawo ku England, wakamba dankha kukhala na mukuru wake kuti ŵasunge ndalama. Sophia na Christopher, awoso mba ku England, ŵakuti: “Tikaguliska galimoto yithu na katundu munyake. Tikaghanaghananga vya kukakhala ku Albania kwa chaka chimoza.” Chakukondweska ntchakuti ŵakakhalako nyengo yitali kuluska apa.

 Ŵapharazgi ŵanyake ŵakukhala ku Albania kwa myezi yichoko waka, na kuweleraso dankha kukwawo kuti ŵakagwire ntchito na kusunga ndalama, kufuma apo na kulutaso ku Albania. Umu ndimo ŵakachitiranga Eliseo na Miriam. Eliseo wakuti: “Miriam wakufuma ku chigaŵa icho kukutemwa kwiza ŵalendo ŵakuwona malo ku Italy, ntheura ntchipusu kusanga ntchito za kanyengo kachoko waka. Tikalutanga ku malo agha na kugwira ntchito kwa myezi yitatu na kusunga ndalama zakuti tiwelereso ku Albania uko tikakhalangako myezi 9. Tikachita nthena kwa vyaka 5.”

 Para awo ŵakuteŵetera uko kukukhumbikwa ŵapharazgi ŵanandi ŵasamukira ku chigaŵa chinyake, ŵakwenera kuzgoŵera malo ghachilendo, ndipo ulongozgi uwo ŵakupokera kufuma ku ŵabali na ŵadumbu ŵa mu chigaŵa icho ukuŵawovwira kutonda masuzgo agho ghangaŵapo. Sophia, uyo tangumuzunura kukwambilira wakati: “Mu nyengo ya kuzizima ku Albania, mu nyumba mukuzizimanga chomene, kuluska umo vikuŵira kukwithu. Nkhasambira kufuma ku ŵadumbu ŵa mu chigaŵa ichi umo ningavwalira kuti nileke kupima chomene.” Grzegorz na muwoli wake Sona, ŵakafuma ku Poland kuti ŵakawovwirepo ku tawuni yakutowa chomene ya Prizren ku Kosovo. b Grzegorz wakati: “Ŵapharazgi ŵa mu tawuni iyi mbakujiyuyura, ŵalusungu, na ŵakuzikira! Iwo ŵakutovwira kuti tisambire makora chiyowoyero. Mwachiyelezgero, ŵakatilongora masitolo agho vinthu vikutchipako, ndipo ŵakatilongosolera umo tingakagulira vyakukhumbikwira ku msika.”

 Awo ŵasamira charu chinyake ŵakupindura chomene para ŵapanga ubwezi wakukhora na ŵabali na ŵadumbu ŵa mu charu icho na kusambira vinandi kufuma kwa iwo. Sona wakuti: “Najiwonera nekha umo chitemwa cha Yehova chiliri na nkhongono. Ŵabali ŵakunovwira kuti nikhozge chipulikano chane chifukwa nkhuwona umo ŵakasinthira umoyo wawo na ivyo ŵakagomezganga ŵati ŵasambira waka vya Yehova. Mu mpingo tikujipulika kuti tili ŵakukhumbikwa ndipo tikuwona ivyo tingachita kuti tovwirepo. Tikuteŵetera lumoza na ŵabali na ŵadumbu awo mbabwezi ŵithu.” (Mariko 10:29, 30) Gloria wakuti: “Nkhumanya ŵadumbu ŵanandi awo ŵakazizipizga nthambuzgo kufuma ku ŵanthu awo Mbakaboni yayi mu tawuni iyi. Vikunikhwaska chomene kuwona umo ŵakumutemwera Yehova.”

 Awo ŵakusamukira uko kukhumbikwa ŵapharazgi ŵanandi ŵaliso na mwaŵi wakusambira vinthu ivyo ŵakatenge ŵavimanyenge yayi ŵaŵenge kukwawo. Mwachiyelezgero, iwo ŵakuwona kuti kuchita chinthu icho ntchipusu yayi mwakuti ŵachite vinandi pakuteŵetera Yehova kukovwira kuti munthu waŵe wakukondwa. Stefano wakulongosora kuti: “Apo nkhaŵa kukwithu, kanandi nkhapharazganga waka pa intakomu, ndipo nkhadumbiskananga na ŵanthu mwakudumura waka. Kweni ŵanthu ŵa kuno ku Albania ŵakutemwa kuyowoyeskana kwa nyengo yitali, chomene para ŵakumwa khofi. Pakuti ndine wasoni chomene, pakwamba soni zikanikoranga chifukwa nkhasoŵanga chakuyowoya. Ndipouli mukuluta kwa nyengo, nkhasambira kuŵika mtima pa ŵanthu, ndipo pasono nkhukondwa chomene kuchezga nawo. Upharazgi ukuniyendera makora chomene.”

 Leah wakasamira ku Albania kufuma ku United States pamoza na mfumu wake William. Iyo wakuti: “Kuteŵetera kuno kwatovwira kuti tighanaghanenge mu nthowa yinyake kweniso tasambira umoyo uphya. Tasambira vinandi vyakukhwaskana na kupokelera ŵalendo, ntchindi na kuŵa ŵaubwezi! Tasambira nthowa ziphya zakupharazgira, kupulikiska Malemba mu nthowa yinyake, kweniso umo tingachitira vinthu mu nthowa zinyake.” William wakuti: “Ŵanthu ŵanandi awo ŵakwiza kuno ku Albania ŵakutemwa chomene malo gha mumphepete mwa nyanja. Ine nkhutemwa kukwera mapiri ghanyake gha kuno ku Albania. Kweni ŵanthu ndiwo ŵakunipangiska kuti nitemwengeko chomene kuno! Ŵanthu ŵanandi mu chigaŵa icho tikupharazga, ŵali kupulikapo vichoko waka vyakukhwaskana na unenesko pa nyengo iyo kukachitikanga maupharazgi ghapadera. Para taluta kukapharazga, nyengo zinyake tikutandara zuŵa lose kuyowoyeskana na mabanja ghachoko waka.”

 Awo ŵakuteŵetera uko kukukhumbikwa ŵapharazgi ŵanandi ŵakukondwa chomene kuwona umo ŵanthu ŵakuchitira para ŵapulika makani ghawemi. (1 Ŵatesalonika 2:19, 20) Laura uyo wakasamira ku Albania apo wakaŵa msungwana waka wakati: “Nkhateŵeterapo kwakanyengo ku Fier. Mu vyaka viŵiri na hafu pera, ŵanthu 120 ŵakazomerezgeka kuŵa ŵapharazgi. Ine nkhasambirapo na ŵanthu 16 pa ŵanthu aŵa!” Mudumbu munyake zina lake Sandra wakuti: “Nkhapharazgira mwanakazi munyake ku msika. Pamanyuma wakazakaŵa Kaboni ndipo wakawelera kukwake. Ulendo unyake apo nkhapulika vya iyo, wakaŵa kuti wali na masambiro gha Baibolo 15!”

 Ŵapharazgi ŵanyake awo ŵali kusamira ku Albania vyaka ivyo vyajumpha, ŵachali kwenekuku ndipo ŵakukondwa chomene na uteŵeti wawo. Nyengo zinyake ŵakuzizwa kuwona kuti mulimo uwo ŵakachita kumasinda wamba kupambika vipambi. (Mupharazgi 11:6) Christopher, uyo tamuzunura kale kukwamba, wakati: “Nkhasangana na mwanalume munyake uyo nkhasambirapo nayo Baibolo nati niza waka kuno ku Albania. Nkhakhwaskika chomene wati walongosora vyose ivyo tikadumbiskana tati tasangana ulendo wakwamba nati namupharazgira. Pasono iyo na muwoli wake Mbakaboni ŵa Yehova.” Federica, uyo tamuzunura kukwamba, wakati: “Mu mpingo unyake, mudumbu wakiza kwa ine na kunifumba usange namukumbukira. Wakati nkhamupharazgira vyaka 9 ivyo vyajumpha. Nyengo yinyake apo nkhasamukira tawuni yinyake, iyo wakamba kusambira Baibolo na kubatizika. Nkhawonanga nga kuti vyaka vyakwambilira ivyo tikaŵira ku Albania tikaphyoka pawaka. Kweni uwu ukaŵa utesi!”

 Ŵabali na ŵadumbu awo ŵali kusamira ku Albania panji Kosovo ŵakuwonga chomene kuwona umo Yehova waŵatumbikira chifukwa cha kuyezgayezga kwawo ndipo waŵapa umoyo wakukondweska chomene. Wati wakhala vyaka vinandi ku Albania, Eliseo wakulongosora umo vinthu vikaŵira kwa iyo: “Taŵanthu tikukaŵa yayi kupusikika na kaghanaghaniro ka charu kakuti vinthu vingatiyendera makora para tikuchita ivyo charu chikuti ndiwo mbumoyo. Kweni uwu mbutesi. Fundo za Yehova ndizo zikutovwira kuti vinthu vitiyenderenge makora pa umoyo withu. Uteŵeti uwu nkhuchita ku chigaŵa icho kukukhumbikwa ŵapharazgi ŵanandi ukunikumbuska fundo iyi. Nkhujiwona wakukhumbikwa kweniso wakuzirwa. Nili na ŵabwezi ŵanadi awo nawoso ŵali na vilato vyakuyana waka na vyane.” Sandra nayo wakukolerana nayo fundo iyi, wakuti: “Nkhati nasamira ku chigaŵa icho kukukhumbikwa ŵapharazgi ŵanandi, nkhawona kuti Yehova wanipa mwaŵi wa kufiska chinthu icho nkhachidokeranga kwa nyengo yitali, kuŵa mu mishonale. Nkhudandawurapo yayi kuti nkhasamira ku Albania. Nakuti ndine wakukondwa chomene.”