Ivyo vili mu nkhani iyi

•  Chifukwa wuli ntchiwemi kuyowoyeskana maso na maso

•  Umo mungambiskira chidumbirano

•  Ivyo ŵanyinu ŵakuyowoya

 Ŵanthu ŵanyake ŵakuyowoya kuti kudumbiskana maso na maso nkhwakusuzga kweniso kungapangiska munthu kuchita wofi, chomenechomene para ŵakuyaniska na kulemba waka meseji.

 Anna wakayowoya kuti: “Munthu ukupanikizgika chomene para ukuyowoyeskana maso na maso chifukwa pakuŵa pakusuzga kuti unozge panji kusisita ivyo wayowoya.”

 Jean wakayowoya kuti: “Kulemba meseji vili nga nkhutegherezga pulogiramu yakujambura, apo kuyowoyeskana maso na maso vili nga nkhuwonelera pulogiramu iyo yikuchitika sono. Para nkhuyowoya na munthu maso na maso nkhufipa mtima chomene kuti nileke kubudiska.”

 Nangauli vili nthena, kweni yizamuŵapo nyengo apo muzamukhumbikwira kuti muyowoye na munthu maso na maso. Mwachiyelezgero, mungakhumbikwira kuyowoyeskana na munthu maso na maso para mukukhumba, kusanga ŵabwezi ŵaphya, kulembeka ntchito, kweniso para mukukhumba kuŵa pa chibwezi para ndimwe ŵakunozgeka.

 Chakukondweska ntchakuti, mukwenera kuchita wofi yayi para mukudumbiskana na munthu maso na maso. Namwe mungafiska kuchita nthena nangauli mungaŵa kuti mukuchita wofi.

 Neal wakayowoya kuti: “Ntchakumanyamanya kuti nyengo zinyake mungayowoya vinthu ivyo mungakhozgeka navyo soni. Kweni mukwenera kumanya kuti nyengo zose munthu wangachita makora pera yayi kwambura kubudiskapo.”

•   Fumbani mafumbo. Ghanaghanirani za nkhani iyo yingaŵa yakukondweska ku ŵanthu, ndipo yambani ndimwe kudumbiskana nawo. Mwachiyelezgero, mungamufumba kuti:

   “Kasi mwangwendapo ulendo pa holide iyo yajumpha sonosono?”

   “Webusayiti iyi njiwemi chomene. Kasi mukuyimanya kale?”

   “Kasi muli kupulikapo vyakuti . . . ?”

   Kuti chimuŵirani chipusu chomene, ghanaghanirani za vinthu ivyo imwe kweniso ivyo munthu uyo mukukhumba kudumbiskana nayo wakuvimanya kale. Mwachiyelezgero, kasi mose mukusambira sukulu yimoza panji mukugwira ntchito ku malo ghamoza? Gwiliskirani ntchito ivyo mose mukumanya kuti mwambiske chidumbirano.

   Maritza wakayowoya kuti: “Ghanaghanirani za mafumbo agho ghakumukondweskani ndipo mukukhumbisiska kumanya mazgoro ghake kufuma ku ŵanthu.”

   Ŵani maso: Mukwenera yayi kukhalira waka kuphulunga munyinu na mafumbo. Kweniso, mukwenera yayi kujighanaghanira chomene mwekha. Mafumbo nga ghakuti “Kasi mukuchita wofi chomene na vichi?” panji “Chifukwa wuli nyengo zose mukuvwara vya mtundu wa buluu?” Kafumbiro aka kangapangiska munyinu kuleka kujipulika makora. Ndipo fumbo lachiŵiri lingawoneka nga mukumweruzga munyinu.

   Kweniso mungagega kuŵa nga ni munthu uyo wakukhalira waka kuphulunga ŵanyake mafumbo. Mungachita nthena para mukuleka kuyowoyapo maghanoghano ghinu para wazgora panji pambere wandazgore. Chakukhumbikwa chomene ntchakuti mukwenera kudumbiskana, kufumba waka mafumbo nga muli pa ma intavyu yayi.

   Fundo ya mu Baibolo: “Maghanoghano mu mtima wa munthu ghali nga ni maji ghakunyang’amira, kweni munthu waumanyi watekengepo.”—Zintharika 20:5.

•   Ŵani ŵategherezgi ŵawemi. Kuti mulutilire kudumbiskana makora na munyinu vikuthemba pakutegherezga chomene kuluska ivyo mukuyowoya.

   Tamara wakuti: “Nkhujiŵikira chilato kuti nisambireko chinthu chimoza chiphya kwa munthu uyo nkhuyowoyeskana nayo. Paumaliro, nkhuyezga kukumbukira ivyo munthu yura wanguniphalira na chilato chakuti nighanaghanirepo fumbo lakulondezgapo ilo tingazakadumbiskana.”

   Ŵani Maso: Kufipa mtima yayi na ivyo muyowoyenge. Para mungategherezga mwakupwelelera, mungamanya makora umo mungazgolera ivyo munyinu wakuyowoya.

   Fundo ya mu Baibolo: “Munthu waliyose wapulikenge luŵiro, wazikirenge pakuyowoya.”—Yakobe 1:19.

•    Longorani kuti mukukondwa nayo munyinu. Mungadumbiskana makora para mukuŵikako mahara kwa munthu uyo mukudumbiskana nayo.

   Marie wakayowoya kuti: “Para munyinu wangamanya kuti mukuŵikako mahara ku ivyo iyo wakuyowoya, mbwe mudumbiskanenge makora, nanga vingaŵa kuti pa malo ghanyake chidumbirano changwenda makora viŵi yayi.”

   Ŵani maso: Lekani kufumba mwakujumphizga. Mwachiyelezgero, mungaŵa kuti mwajumpha mzere usange pakumuwonga mungayowoya kuti, “Chakuvwara ichi ntchiwemi chomene. Mukagura ndalama zilinga?”

   Fundo ya mu Baibolo: “Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Ŵafilipi 2:4.

 Kasi mungamalizga wuli chidumbirano? Jordan wakayowoya kuti: “Malizgani na mazgu ghakukhozga. Mwachiyelezgero mungayowoya kuti, ‘Nakondwa chomene tachezgapo’ panji ‘Nkhumukhumbirani zuŵa liwemi,’ vingawovwira kuti muzakalutizge chidumbirano ulendo unyake.”