Babuloni Mukuru, uyo wakuyowoyeka mu buku la Chivumbuzi, ni visopa vyose vyautesi, ivyo Chiuta wakuvikana. a (Chivumbuzi 14:8; 17:5; 18:21) Nangauli visopa ivi vikupambana mu vinandi, kweni vyose vikupangiska kuti ŵanthu ŵaleke kusopa Chiuta waunenesko, Yehova.​—Dotoronome 4:35.

Umo mungamanyira Babuloni Mukuru

1.   Babuloni Mukuru ntchimanyikwiro. Baibolo likuti ni “mwanakazi” na “muhule mukuru,” uyo wali na zina “lakuzizwiska lakuti: ‘Babuloni Mukuru.’” (Chivumbuzi 17:1, 3, 5) Buku la Chivumbuzi likugwiliskira ntchito “vimanyikwiro” vinandi, lekani ntchakupulikikwa kuyowoya kuti Babuloni Mukuru nayo ntchimanyikwiro, ni mwanakazi wanadi yayi. (Chivumbuzi 1:1) Nakutiso mwanakazi uyu, “wakukhala pa maji ghanandi,” kwimira “ŵanthu, mizinda, mitundu, na malulimi.” (Chivumbuzi 17:1, 15) Mwanakazi wanadi wangachita nadi ivi yayi.

2.   Babuloni Mukuru wakwimira wupu wa pa charu chose. Iyo wakuchemeka kuti “msumba ukuru uwo ukuchita ufumu pa mathemba gha charu chapasi.” (Chivumbuzi 17:18) Ivi vikung’anamura kuti vyakuchita vyake vikukhwaska charu chose chapasi.

3.   Babuloni Mukuru ni wupu wa chisopa, ni wupu wa ndyali panji wa malonda yayi. Msumba wakale wa Babuloni ukatemwanga chomene vyakusopa, ndipo ukamanyikwanga chomene chifukwa cha kugwiliskira ntchito “nyanga” na “masalamusi.” (Yesaya 47:1, 12, 13; Yeremiya 50:1, 2, 38) Chisopa chautesi icho Chiuta waunenesko Yehova wakuleka kukondwa nacho, ndicho chikaŵa mu msumba uwu. (Genizesi 10:8, 9; 11:2-4, 8) Ŵawusi ŵa ku Babuloni ŵakajiwonanga ŵapachanya chomene kuluska Yehova na nkhani ya kumusopa. (Yesaya 14:4, 13, 14; Daniyeli 5:2-4, 23) Mwakuyana waka, Babuloni Mukuru wakumanyikwa chifukwa cha “maluso [ghake] gha vyamizimu” agho wakuchita. Ivi ndivyo vikulongora kuti ni wupu wa chisopa.​—Chivumbuzi 18:23.

    Babuloni Mukuru wangaŵa wupu wa ndyali yayi, chifukwa “mathemba gha charu chapasi” ghazamulira para waparanyika. (Chivumbuzi 17:1, 2; 18:9) Wangaŵaso wupu wa malonda yayi, chifukwa Baibolo likumupambaniska na “ŵamalonda ŵa charu chapasi.”​—Chivumbuzi 18:11, 15.

4.   Babuloni Mukuru ngwakwenelera nadi kuŵa chisopa chautesi. M’malo mwa kusambizga ŵanthu umo ŵangachitira kuti ŵaŵe paubwezi na Chiuta waunenesko, Yehova, chisopa chautesi chikuŵalongozgera ku ŵachiuta ŵanyake. Baibolo likuti uwu ni “uzaghali.” (Levitiko 20:6; Ekisodo 34:15, 16) Vigomezgo nga ntcha Utatu, mzimu ukufwa yayi, kweniso maluso nga gha kugwiliskira ntchito vikozgo pakusopa, vikukolerana chomene na ivyo vikachitikanga ku Babuloni wakale ndipo vikukhozgera chisopa chautesi. Visopa ivi vikusambizgaso ŵanthu kuti ŵatemwenge charu. Baibolo likuti ivyo visopa ivi vikuchita mbuleŵi.​—Yakobe 4:4.

    Usambazi wa chisopa chautesi na mtima wa kujilongora uwo chili nawo, ukukolerana na ivyo Baibolo likuyowoya pa nkhani ya Babuloni Mukuru, kuti ‘wavwara vitchesamu na viswesi’ ndipo ‘watozgeka na golide na malibwe ghakuzirwa na ngale.’ (Chivumbuzi 17:4) Babuloni Mukuru ndiyo nyinawo wa “vinthu vyakuseluska vya charu chapasi,” panji kuti visambizgo na vyakuchita ivyo vikuyuyura Chiuta. (Chivumbuzi 17:5) Awo ŵali mu chisopa chautesi ni “ŵanthu, mizinda, mitundu, na malulimi” ndipo ŵakukhozgera Babuloni Mukuru.​—Chivumbuzi 17:15.

 Babuloni Mukuru wali na mulandu wa ndopa za “wose awo ŵakomeka pa charu chapasi.” (Chivumbuzi 18:24) Kwamba kale, chisopa chautesi chikukhozgera nkhondo kweniso magulu gha vigeŵenga ndipo chikutondeka kusambizga ŵanthu unenesko wakukhwaskana na Yehova uyo ni Chiuta wachitemwa. (1 Yohane 4:8) Ivi vyapangiska kuti ndopa za ŵanandi zithiskike. Ntheura ntchakwenelera nadi kuti wose awo ŵakukhumba kukondweska Chiuta ŵakwenera ‘kufumamo mwa iyo’ na kujipatura ku chisopa chautesi.​—Chivumbuzi 18:4; 2 Ŵakorinte 6:14-17.