Mazgu gha Chigiriki agho kwafuma zina la buku la mu Baibolo la Chivumbuzi, ni A·po·kaʹly·psis (apocalypse), agho ghakung’anamura “Vinthu ivyo Khristu wakavumbura.” Ntheura zina lakuti Chivumbuzi likung’anamura kuvumbura vinthu vyakubisika na kuphara vinthu ivyo vikalembeka kale chomene kuti vichitikenge kunthazi. Mauchimi ghanandi gha mu buku ili ghafiskikenge kunthazi.

Ivyo vili mu buku la Chivumbuzi

•    Mazgu ghakwamba.—Chivumbuzi 1:1-9.

•   Uthenga wa Yesu ku mipingo 7.—Chivumbuzi 1:10–3:22.

•   Mboniwoni ya Chiuta wali pa chitengo chake kuchanya.—Chivumbuzi 4:1-11.

•   Mboniwoni zakupambanapambana zakulondezgana:

  •   Vyakubatikira 7.—Chivumbuzi 5:1–8:6.

  •   Mbata 7, ndipo zitatu zaumaliro zikuyowoya vya masoka ghatatu.—Chivumbuzi 8:7–14:20.

  •   Ŵabakule 7, ndipo bakule waliyose wakwimira muliri wa cheruzgo cha Yehova icho wapelekenge pa charu chapasi.—Chivumbuzi 15:1–16:21.

  •   Mboniwoni za kuparanyika kwa ŵanthu ŵaheni.—Chivumbuzi 17:1–20:10.

  •   Mboniwoni za vitumbiko vya Chiuta kuchanya na charu chapasi.—Chivumbuzi 20:11–22:5.

•   Mazgu ghaumaliro.—Chivumbuzi 22:6-21.

Ivyo vingamovwirani kupulikiska buku la Chivumbuzi

1.   Buku ili lili na nkhani ziwemi chomene, ndipo ni zakofya yayi kwa awo ŵakuteŵetera Chiuta. Nangauli ŵanthu ŵanandi ŵakuti mazgu ghakuti “uvumbuzi” (apocalypse) ghakuyowoya za soka lakofya, kweni buku la Chivumbuzi likwamba na kumara na mazgu ghakuti mbakukondwa awo ŵakuŵazga mwakukwezga, kupulika mazgu gha uchimi uwu, na kusungilira vinthu ivyo vili kulembeka.—Chivumbuzi 1:3; 22:7.

2.   Mu buku la Chivumbuzi muli “vimanyikwiro” vinandi ivyo tikwenera kuvitora nga umo viliri nadi yayi.—Chivumbuzi 1:1.

3.   Ŵanthu na vimanyikwiro vinandi ivyo vikuzunurika mu buku la Chivumbuzi vikusangikaso mu mabuku ghanyake gha mu Baibolo:

   •   Yehova—“Chiuta waunenesko mu mtambo kuchanya” na Mlengi wa vinthu vyose.—Dotoronome 4:39; Masalimo 103:19; Chivumbuzi 4:11; 15:3.

   •   Yesu Khristu—“Mwana wa mberere wa Chiuta.”—Yohane 1:29; Chivumbuzi 5:6; 14:1.

   •   Satana Dyabulosi—Mulwani wa Chiuta.—Genizesi 3:14, 15; Yohane 8:44; Chivumbuzi 12:9.

   •   Babuloni Mukuru—nga ni msumba wakale Babuloni (Babel), Babuloni Mukuru ni mulwani wa Yehova Chiuta na ŵanthu ŵake, kweniso ni mama wa chisopa chautesi.—Genizesi 11:2-9; Yesaya 13:1, 11; Chivumbuzi 17:4-6; 18:4, 20.

   •   “Nyanja”—ŵanthu ŵaheni awo ŵakususka Chiuta.—Yesaya 57:20; Chivumbuzi 13:1; 21:1.

   •   Vinthu ivyo vikagwiranga ntchito pakusopa Chiuta pa chihema—nga likasa la phangano, Nyanja ya gilasi (chiŵiya cha kugezeramo), nyali, vyakununkhira, na jotchero.—Ekisodo 25:10, 17, 18; 40:24-32; Chivumbuzi 4:5, 6; 5:8; 8:3; 11:19.

   •   Vikoko—vikwimira maboma gha ŵanthu.—Daniyeli 7:1-8, 17-26; Chivumbuzi 13:2, 11; 17:3.

   •   Manambara ghakuyelezgera waka.—Chivumbuzi 1:20; 8:13; 13:18; 21:16.

4.   Mboniwoni izi zikuyowoya za “zuŵa la Fumu,” ilo likamba mu 1914 apo Ufumu wa Chiuta ukakhazikika kuchanya ndipo Yesu wakamba kulamulira nga Fumu. (Chivumbuzi 1:10) Ntheura mauchimi ghanandi gha mu buku la Chivumbuzi ghafiskikenge mu nyengo yithu.

5.   Kuti tipulikiske makora buku la Chivumbuzi, tikukhumbikwira vinjeru vya Chiuta na wovwiri wa awo ŵakupulikiska kale buku ili. Vinthu ivi ndivyo vikutovwiraso kupulikiska mabuku ghanyake ghose gha mu Baibolo.—Milimo 8:26-39; Yakobe 1:5.