Yayi, Baibolo likuyowoyapo yayi kuti charu ntchafulati. a Baibolo ni buku la sayansi yayi, kweni likuneneska para likuyowoya vyasayansi. Ivyo Baibolo likuyowoya nyengo zose ni ‘vyakugomezgeka.’—Salimo 111:8.

•  Kasi Baibolo likung’anamurachi para likuti “vigaŵa vinayi vya charu chapasi”?

•  Kasi chiyezgo icho Dyabulosi wakayezga nacho Yesu chikulongora kuti charu ntchafulati?

 Mazgu ghakuti “vigaŵa vinayi vya charu chapasi” na ghakuti “vigoti vya charu chapasi” agho ghakuyowoyeka mu Baibolo, ngakuyelezgera waka, ndipo ghakung’anamura kuti charu chili na makona ghanayi panji vigoti yayi. (Yesaya 11:12; Yobu 37:3) Mazgu agha ghakwenera kuti ghakuyowoya za charu chose chapasi. Baibolo likuyowoyaso vya kumafumiro gha dazi, kumanjiliro gha dazi, kumpoto na kumwera kung’anamura charu chose chapasi.—Luka 13:29.

 Lizgu la Chihebere ilo lili kung’anamulika kuti “vigaŵa” panji “vigoti” likwenera kuti ndakuyelezgera waka ndipo lili kufuma ku lizgu lakuti “mapapindo.” Buku linyake likuti “viyuni vikutandawura mapapindo ghake kuti vivikilire ŵana ŵake. Mwakuyana waka, lizgu la Chihebere ilo lili kung’anamulika kuti “vigoti” lingang’anamura chilichose icho ŵachitandawura.” Buku ili likuyowoyaso kuti mazgu ghakuti “vigaŵa” panji “vigoti,” agho ghali pa Yobu 37:3 na Yesaya 11:12 “ghakung’anamura vigoti, mphaka, panji charu chose chapasi.” b—The International Standard Bible Encyclopedia

 Apo wakayezganga Yesu, “Dyabulosi wakamutoleraso ku phiri litali chomene, na kumulongora maufumu ghose gha pa charu na uchindami wawo.” (Mateyu 4:8) Ŵanthu ŵanyake ŵakuti lemba ili likulongora kuti charu ntchafulati ndipo munthu wangawona charu chose chapasi para wayimilira pa malo ghanyake. Ndipouli, “phiri litali chomene” ilo likuzunulika pa lemba ili ndakuyelezgera waka. Chifukwa wuli vili nthena?

•   Palije phiri pa charu chapasi ilo munthu wangimilirapo na kuwona maufumu ghose agho ghali pa charu.

•   Dyabulosi wakalongora Yesu maufumu ghose gha pa charu chapasi kweniso na “uchindami wawo.” Yesu wakate waviwonenge yayi vinthu ivi uku wayimilira pa malo ghamoza, ipo Dyabulosi wakwenera kuti wakamulongora vinthu ivi mu mboniwoni. Ivi vingayana waka na munthu uyo wakulongora munyake malo ghakupambanapambana gha vyaru vinyake pa sikirini.

•   Nkhani yakuyana waka iyo yili pa Luka 4:5 yikuyowoya kuti Dyabulosi wakalongora Yesu “maufumu ghose gha charu mu kanyengo kachoko waka.” Vingachitika yayi kuti munthu wawone vinthu ivi mu kanyengo kachoko nthena. Ichi chikulongora kuti Dyabulosi wakagwiliskira ntchito mboniwoni pakuyezga Yesu.