Enya. Chiuta wakuzgora para mwapempha mwakuyana na khumbo lake. Mu Baibolo muli nkhani za ŵanthu awo ŵakalombanga kwa Yehova. Nkhani izi zingamovwirani usange mundalombepo kwa Chiuta. Mwachiyelezgero, ŵanyake ŵakalomba kuti:

•   ‘Novwirani, mwe Yehova Chiuta wane. Niponoskani kwakulingana na lusungu lwinu.’—Salimo 109:26.

•   “Ine nili wakusokwa na mukavu: Mphanyi Yehova wazgokera kwa ine.”—Salimo 40:17.

 Uyo wakalemba mazgu agha wakagomezganga nadi Yehova. Chiuta wakupulika malurombo gha wose awo ŵakulomba mwakwenelera. Mwachiyelezgero, wakupulika awo ‘mbakusweka mu mtima’ panji awo “mzimu wawo wateketeka.”—Salimo 34:18.

 Lekani kughanaghana kuti Chiuta wali kutali chomene, kweniso kuti vikumukhwaska yayi para tikusuzgika. Imwe kopa yayi chifukwa Baibolo likuyowoya kuti: “Yehova ngwapachanya, kweni wakuwona ŵakujiyuyura; kweni ŵakujikuzga wakuŵamanyira patali.” (Salimo 138:6) Kweniso Yesu wakaphalira ŵasambiri ŵake kuti: “Nanga ni masisi gha ku mutu kwinu ghose ghali kupendeka.” (Mateyu 10:30) Chiuta wakumanya chilichose chakukhwaskana na imwe kuluska mwaŵene. Kasi wangatondeka kupulika para mwamuthulira vyose ivyo mukwenjerwa navyo?—1 Petrosi 5:7.