Kasi Kuŵa Munthu Wauzimu Chikung’anamurachi? Kasi Ningaŵa Wauzimu Kwambura Chisopa?
Ivyo Baibolo Likuyowoya
Umo lizgu ili lili kugwiliskirika ntchito mu Baibolo, kuŵa wauzimu chikung’anamura kukhumbisiska kukondweska Chiuta, ndiposo kusambira kughanaghana nga ndiyo. Munthu wauzimu wakuyezgayezga kulondezga fundo za Chiuta pa umoyo wake kweniso kulondezga ulongozgi wa mzimu utuŵa a wa Chiuta.—Ŵaroma 8:5; Ŵaefeso 5:1.
Baibolo likulongosora umo munthu wauzimu wakuchitira vinthu. Mwachiyelezgero, mwakupambana na munthu uyo ngwauzimu, “munthu uyo wakulongozgeka na makhumbiro gha thupi wakupokera vinthu vya mzimu wa Chiuta yayi,” panji kuti visambizgo vya Chiuta. (1 Ŵakorinte 2:14-16) Mwakupambana na munthu wauzimu, ŵanthu awo ŵakulongozgeka na makhumbiro gha thupi kanandi ‘ŵakuchitirana sanji na kutimbana’ ndipo ŵalije mtima wakupa na mtende. (1 Ŵakorinte 3:1-3) Kweniso awo ŵakutemwa kusesa na kugaŵaniska ŵabwezi ŵakuchemeka ŵanthu “ŵa mtima wauchinyama, ŵalije navyo ntchito vyauzimu.”—Yuda 19; Zintharika 16:28. b
Mu nkhani iyi
Kasi vikwenda wuli kuti munthu waŵe wauzimu?
Tili na mwaŵi wakuti tingaŵa ŵauzimu chifukwa chakuti tili kulengeka mu chikozgo cha Chiuta. (Genizesi 1:27) Lekani ntchakuzizika yayi kuwona ŵanthu ŵanandi ŵakuzirwiska kweniso ŵakukhumba kusambira vinthu ivyo ŵangaviwona yayi panji kuvikhwaska.
Mwakawiro tili kulengeka na mtima wakuti tilongorenge mikhaliro ya Yehova c Chiuta, nga ni mtende, lusungu, ndiposo kuleka kutemwera. (Yakobe 3:17) Kweniso Chiuta wakupeleka mzimu wake utuŵa ku awo ŵakuyezgayezga kupulikira malango ghake.—Milimo 5:32.
Chifukwa wuli ntchakuzirwa kuŵa wauzimu?
Kuŵa wauzimu kukulongozgera ku ‘umoyo na mtende.’ (Ŵaroma 8:6) Umoyo na mtende ni vyawanangwa vyapadera chomene vyakufuma kwa Chiuta.
Umoyo: Chiuta walayizga kuti wazamupeleka umoyo wamuyirayira ku ŵanthu awo mbauzimu.—Yohane 17:3; Ŵagalatiya 6:8.
Mtende: Kung’anamura kuŵa pa mtende na Chiuta. Ŵanthu awo ŵakuŵika waka mtima pa vinthu vyawo vyakuthupi mbalwani ŵa Chiuta. (Ŵaroma 8:7) Chiuta wakuŵapa ‘mtende wake uwo ukuluska maghanoghano ghose’ awo ŵakuyezgayezga kuti ŵaŵe ŵauzimu. (Ŵafilipi 4:6, 7) Mtende wa mu mtima uwu, ukuŵawovwira kuti ŵaŵe ŵakukondwa pa umoyo wawo.—Mateyu 5:3.
Kasi ningachita wuli kuti niŵe wauzimu?
Sambirani Baibolo na kupulikira malango gha Chiuta. Mungachita nthena para mukuŵerenga Baibolo ilo muli maghanoghano gha Chiuta ndipo likalembeka na ŵanalume awo ‘ŵakalongozgeka na mzimu utuŵa.’ (2 Petrosi 1:21) Ivyo musambirenge vimovwiraninge kuti musope Chiuta “mu mzimu na mu unenesko,” mwakulongozgeka na mzimu utuŵa kweniso mwakukolerana na khumbo la Chiuta.—Yohane 4:24.
Lombani wovwiri wa Chiuta. (Luka 11:13) Chiuta wamovwiraninge kuti mulongore mikhaliro iyo yikulongora kuti ndimwe wauzimu. (Ŵagalatiya 5:22, 23) Wangamupaniso vinjeru kuti mulimbane na masuzgo agho mukusangana nagho pa umoyo winu.—Yakobe 1:5.
Muchezgenge na ŵanthu awo mbauzimu. Ŵamovwiraninge kuti muŵe ŵakukhwima mwauzimu. (Ŵaroma 1:11, 12) Kweni para mukutemwa kuchezga na ŵanthu awo kaghanaghaniro kawo kakususkana na kaghanaghaniro ka Chiuta, ŵamulopweskaninge mwauzimu.—Yakobe 4:4.
Kasi nkhwenera kuŵa mu chisopa kuti niŵe wauzimu?
Unenesko ngwakuti kuŵa mu chisopa ndiko kungapangiska munthu kuti waŵe wauzimu yayi. Baibolo likuti: “Usange munthu wakujiwona kuti ni musopisopi kweni wakutondeka kukora lulimi lwake, wakupusika mtima wake, ndipo kusopa kwa munthu uyu nkhwawaka.”—Yakobe 1:26, mazgu ghamusi.
Kweniso Baibolo likulongora kuti ŵanthu ŵauzimu ŵakusopa Chiuta munthowa iyo wakuzomerezga. Ŵakumanya kuti pali “mzimu umoza” pera, uwo ni mzimu utuŵa wa Chiuta. Mzimu uwu ndiwo ukuŵachiska kuti ŵasope Chiuta nga ni “thupi limoza,” gulu lakukolerana ilo likusungilira “umoza wa mzimu mu chakukakira cha mtende.”—Ŵaefeso 4:1-4.
Vinthu vyautesi vyakukhwaskana na kuŵa munthu wauzimu
Utesi: Kuŵa wakukhwima mwauzimu vikusazgapo vinthu vyose ivyo munthu wakuchita paumoyo ivyo vikovwira munthu kuti waŵe wakukhorwa panji ivyo vingamovwira kuti waŵe munthu muwemi.
Unenesko: Baibolo likulongosora munthu wauzimu kuti ni uyo wakulongozgeka na maghanoghano gha Chiuta. Kuŵa wauzimu chikung’anamura kuleka kuthemba Chiuta na kwamba kujithemba yayi. Ŵanthu awo mbauzimu ŵakuŵa ŵakukhorwa pakumanya kuti Yehova ni Mlengi wawo ndipo ŵakuchita vinthu kuyana na khumbo lake.—Salimo 100:3.
Utesi: Munthu wangaŵa wakukhwima mwauzimu para wakuleka kuŵa na vinthu ivyo wakutemwa panji kujipangiska vyakuŵinya
Unenesko: Kusuzga thupi lako vili nga ‘nkhusopa umo wakhumbira’ kweniso kughanaghana mwathupi. (Ŵakolose 2:18, 23) Baibolo likuti ŵanthu awo mbauzimu ŵakujipangiskira dala kuti ŵaŵe na vyakuŵinya yayi m’malo mwake ŵakuŵa ŵakukondwa.—Zintharika 10:22.
Utesi: Kuti munthu waŵe wakukhwima mwauzimu wakwenera kukolerana na chilichose chakukhwaskana na vyamizimu.
Unenesko: Mtundu umoza wa vyamizimu, ntchigomezgo chakuti mizimu ya ŵakufwa yingayowoyeskana na ŵanthu ŵamoyo. Ndipouli Baibolo likusambizga kuti ŵakufwa ŵakumanya kalikose yayi. (Mupharazgi 9:5) Vyamizimu nkhuyowoyeskana na vilengiwa vyauzimu ivyo vikwimikana na Chiuta. Vyamizimu vikukwiyiska Chiuta ndipo vikutondeska munthu kuti waŵe wauzimu.—Levitiko 20:6; Dotoronome 18:11, 12.
Utesi: Mwakawiro vilengiwa vyose ni vyakukhwima mwauzimu.
Unenesko: Vyose ivyo Chiuta wali kulenga vikumuchindika. (Salimo 145:10; Ŵaroma 1:20) Ndipouli, vilengiwa vyekha ivyo vili na vinjeru ndivyo vingaŵa vyakukhwima mwauzimu. Ise tikuyana yayi na vinyama. Vinyama vikuchita waka vinthu mwakawiro kuyana na umo vili kulengekera ndipo vingaŵa yayi paubwezi na Chiuta. Vyakuchita vya vinyama vikulongolerathu kuti vikukhumba waka vinthu vyakuthupi. (2 Petrosi 2:12) Lekani Baibolo likuyelezgera munthu uyo ngwauzimu yayi na kaghanaghaniro kweniso nkharo ya uchinyama.—Yakobe 3:15; Yuda 19.
a Chiyowoyero chakwambilira cha mu Baibolo, mazgu agho ghali kung’anamulika kuti “mzimu” chomene ghakung’anamura vya “mvuchi.” Ghangang’anamuraso chinthu icho chikuwoneka yayi kweni chikupeleka ukaboni wakuti chiliko ndipo ntchankhongono. Baibolo likumulongosora Chiuta nga Ntchilengiwa Chauzimu Chapachanya chomene. Munthu wauzimu vyakuchita vyake vikukondweska Chiuta kweniso wakulongozgeka na mzimu utuŵa wa Chiuta.
b Mu Baibolo mazgu ghakuti “thupi” para ghakuyowoya za ŵanthu, kanandi ghakung’anamura ŵanthu awo kaghanaghaniro na vyakuchita vyawo, chomene vikujintha waka pa vinthu vyathupi, ndipo ŵakuŵikako mahara viŵi yayi ku fundo za Chiuta panji ŵakukanirathu kuzilondezga.
c Yehova ni zina la Chiuta nga umo Baibolo likuyowoyera.—Salimo 83:18.
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Mzimu Utuŵa Ni Vichi?
Pali vifukwa ivyo Baibolo likuyowoyera kuti mzimu utuŵa ni “mawoko” gha Chiuta
MAFUMBO AGHO BAIBOLO LIKUZGORA
Kasi Ningachisanga Wuli Chisopa Chaunenesko?
Kasi chisopa icho nasankha ntchaunenesko?
WUKANI!
Kuŵa na Umoyo Uwemi—Kuŵa Paubwezi na Chiuta
Wonani umo fundo za Chiuta izo zili mu Baibolo zingamovwilirani kuwona vinthu nga umo Chiuta wakuviwonera.
MAFUMBO AGHO BAIBOLO LIKUZGORA
Kasi Chiuta Wakukhumba Nichitengechi?
Kasi mukwenera kuwona dankha chimanyikwiro, panji munthondwe unyake kuti mumanye khumbo la Chiuta? Sangani mazgoro mu Baibolo.
WUKANI!
Kasi Baibolo Likuti Wuli pa Vyamasalamusi?
Ŵanthu ŵanyake ŵakukayika usange vyamasalamusi viliko nadi. Iwo ŵakuti nkhani ya vyamasalamusi ni vidokoni waka panji vinthu ivyo munthu wangawona mu mafilimu panji mabuku. Ndipouli, Baibolo likuyowoya vyakupambanako. Likutichenjezga mwankhongono pa nkhani ya vyamasalamusi.
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.