Enya! Baibolo lili kufuma kwa “Chiuta uyo wakusanguluska ŵakusokwa.” (2 Ŵakorinte 7:6) Baibolo ni buku lavyachipatala yayi, kweni lawovwirapo ŵanthu ŵanandi awo ŵakakhumbanga kujikoma. Namwe lingamovwirani.

•  Kasi Baibolo lili na ulongozgi wuli wakovwira?

•  Kasi Baibolo likuyowoyapo za ŵanthu awo ŵakakhumbanga kujikoma?

•  Kasi ni mavesi wuli agho ghangamovwirani para mukukhumba kujikoma?

•  Kasi mungachita wuli para mubwezi winu wakuti, “Ntchiwemi nifwe waka”?

•  Kasi mungachita wuli para nyengo yinyake mukakhumbanga kujikoma?

• ● Phaliraniko ŵanyinu ivyo mukughanaghana.

   Ivyo Baibolo likuyowoya: “Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.”—Zintharika 17:17.

   Kung’anamura kuti: Ŵanyinu ŵangamovwirani para mukusuzgika maghanoghano.

   Para mukuleka kuphalirako ŵanyinu ivyo mukughanaghana, mukuŵa nga mwathwika katundu muzito. Kweni para mukuphalirako ŵanyinu, vikuŵa nga mwathura katundu ndipo mukujipulikako makora.

   Ivyo mungachita: Mwahuno, phaliraniko mubali winu panji mubwezi wakugomezgeka. a Nyengo yinyake mungalemba ivyo vili mu mtima winu.

• ● Lutani ku chipatala.

   Ivyo Baibolo likuyowoya: “Ŵanthu awo ŵali makora ŵakukhumbikwira dokotala chara, kweni ŵalwari ndiwo.”—Mateyu 9:12.

   Kung’anamura kuti: Tikwenera kuluta ku chipatala para talwara.

   Para munthu wakukhumba kujikoma ndikuti panji wakusuzgika maghanoghano. Nga umo vikuŵira na nthenda zinyake, para mwamanya kuti muli na suzgo ili, kuchita soni yayi. Ŵachipatala ŵangamovwirani kuti muleke kusuzgika maghanoghano.

   Ivyo mungachita: Lutani ku chipatala mwaluŵiro.

• ● Manyani kuti Chiuta wakumupwelelerani.

   Ivyo Baibolo likuyowoya: “Asi mpheta zinkhondi zikuguliskika tumanjawala tuŵiri twakuzirwa pachoko? Kweni palije nanga njimoza iyo Chiuta wakuyiluwa. . . . Kopa chara, imwe muli ŵakuzirwa kuluska mpheta zinandi.”—Luka 12:6, 7.

   Kung’anamura kuti: Chiuta wakumuwonani kuti ndimwe wakuzirwa chomene.

   Mungajipulika nga kuti ŵanthu ŵalije namwe ntchito, kweni Chiuta wakumanya suzgo linu. Nangauli mukuwona kuti ntchiwemi kufwa waka, kweni Chiuta wakumupwelelerani. Salimo 51:17 likuti: “Mtima wakuphyoka na kuteketeka, A Chiuta, muwukanenge chara.” Chiuta wakumutemwani ndipo wakukhumba yayi kuti mufwe.

   Ivyo mungachita: Fufuzani maukaboni mu Baibolo agho ghakulongora kuti Chiuta wakumutemwani. Mwachiyelezgero, wonani mutu 24 mu buku la Sendelerani kwa Yehova.

• ● Lombani kwa Chiuta.

   Ivyo Baibolo likuyowoya: “Muthulirani [Chiuta] vyose ivyo mukwenjerwa navyo, chifukwa wakumupwelelerani.”—1 Petrosi 5:7.

   Kung’anamura kuti: Chiuta wakukhumba kuti mumuphalirenge vyose ivyo mukwenjerwa navyo.

   Chiuta wamupaninge mtende wa mumtima na nkhongono za kuzizipizgira. (Ŵafilipi 4:6, 7, 13) Iyo wakovwira wose awo ŵakumulomba na mtima wose.—Salimo 55:22.

   Ivyo mungachita: Mwahuno lombani kwa Chiuta. Zunurani zina lake, lakuti Yehova, ndipo mumuphalire vyakusingo. (Salimo 83:18) Mulombani kuti wamupani nkhongono.

• ● Ghanaghanira viwemi vya munthazi ivyo Baibolo likuyowoya.

   Ivyo Baibolo likuyowoya: “Chigomezgo icho tili nacho chili nga ni nyanguru wa umoyo withu, ntchanadi na chakukhora.”—Ŵahebere 6:19.

   Kung’anamura kuti: Nyengo zinyake umo mukujipulikira vingaŵa nga ni sitima iyo yikulegha chifukwa cha chimphepo chikuru pa nyanja, kweni ivyo Baibolo likulayizga vingazikiska mtima winu.

   Ivyo Baibolo likutiphalira ni maghanoghano waka yayi. Kweni ni ivyo Chiuta wakalayizga kuti wazamuwuskapo vyakuŵinya.—Chivumbuzi 21:4.

   Ivyo mungachita: Kuti mumanye vinandi ivyo Chiuta wali kulayizga, ŵerengani sambiro 5 mu kabuku ka Chiuta Wakutiphalira Uthenga Uwemi!

• ● Muchitenge ivyo mukukondwa navyo.

   Ivyo Baibolo likuyowoya: “Mtima wachimwemwe ni munkhwala uwemi.”—Zintharika 17:22.

   Kung’anamura kuti: Para mungachita vinthu ivyo mukukondwa navyo, vimovwiraninge kuti muleke kusuzgika maghanoghano.

   Ivyo mungachita: Chitani vinthu ivyo mukukondwa navyo. Mwachiyelezgero, mungategherezga tusumu tuwemi, kuŵerenga nkhani zakukhozga, panji mungachita maseŵero ghanyake. Mungaŵaso ŵakukondwa para mukovwira ŵanyinu, nanga tungaŵa tunthu tuchoko.—Milimo 20:35.

• ● Jipwelelerani.

   Ivyo Baibolo likuyowoya: “Maseŵero ghakukhozga thupi ghali na chandulo.”—1 Timote 4:8.

   Kung’anamura kuti: Tikuŵa na umoyo uwemi para tikuchita maseŵero ghakukhozga thupi, kugona mwakukwana, na kurya chakurya chiwemi.

   Ivyo mungachita: Munganyolorako malundi, nanga mungaphinda maminiti 15.

• ● Manyani kuti vinthu vingasintha pa umoyo winu.

   Ivyo Baibolo likuyowoya: “Mukumanya yayi umo umoyo winu uŵirenge machero.”—Yakobe 4:14.

   Kung’anamura kuti: Suzgo ilo mukughanaghana kuti lingamara yayi, lingachepa panji kumara.

   Suzgo ilo mukuwonga nga mwahuno lingamara yayi, lingamara machero. So manyani ivyo mungachita kuti muzizipizge. (2 Ŵakorinte 4:8) Suzgo lingamara nyengo yiliyose, kweni para mwajikoma mbwenu palije icho mwapindurapo.

   Ivyo mungachita: Ŵerengani mu Baibolo nkhani za ŵanthu awo nyengo yinyake ŵakawona kuti ntchiwemi kufwa waka, na kuwona umo vinthu vikasinthira pa moyo wawo. Wonani viyelezgero ivi.

 Enya. Baibolo likuyowoyapo vya ŵanthu awo nyengo yinyake ŵakawona kuti ntchiwemi kufwa waka. Chiuta wakaŵanena yayi, m’malo mwake wakaŵawovwira. Ndivyo wangachitaso kwa imwe.

Eliya

•  ● Kasi wakaŵa njani? Eliya wakaŵa ntchimi yachikanga. Kweni nayo nyengo zinyake wakagongowanga. Pa Yakobe 5:17 pakuti: “Eliya wakaŵa munthu nga ndise.”

•  ● Chifukwa wuli wakakhumbanga kufwa? Nyengo yinyake Eliya wakajipulika nga wali yekha, wakawopa, ndipo wakajiwona wawakawaka. So wakapempha Yehova kuti: “Uwuskanimo sono umoyo wane.”—1 Mathemba 19:4.

•  ● Kasi wakachita wuli? Eliya wakaphalira Yehova vyose ivyo vikaŵa mu mtima wake. Kasi Chiuta wakamukhozga wuli? Chiuta wakamupembuzga na kumulongora nkhongono zake. Yehova wakamusimikizgira Eliya kuti wakaŵa wakuzirwa chomene ndipo wakamupwelelera na kumovwira.

•  ▸ Ŵerengani vya Eliya pa 1 Mathemba 19:2-18.

Yobu

•  ● Kasi wakaŵa njani? Yobu wakaŵa musambazi ndipo wakasopanga Chiuta waunenesko mwakugomezgeka. Iyo wakaŵa na mwanakazi na ŵana.

•  ● Chifukwa wuli wakakhumbanga kufwa? Vinthu viheni vikachitikira Yobu mwamabuchi. Wakataya vyose ivyo wakaŵa navyo. Ŵana ŵake wose ŵakafwa chifukwa cha ngozi. Wakalwara nthenda yakofya chomene. Ŵabwezi ŵake nawo ŵakamupusikizgira kuti ndiyo wakajichemera masuzgo. Yobu wakati: “Nkhutinkha umoyo wane, nkhukhumba yayi kukhalilira wamoyo.”—Yobu 7:16.

•  ● Kasi wakachita wuli? Yobu wakalomba kwa Chiuta na kuphalirako ŵabwezi ŵake umo wakajipulikiranga. (Yobu 10:1-3) Mubwezi wake walusungu, zina lake Elihu, ndiyo wakamovwira kuti wawone mwakwenelera masuzgo agho wakakumananga nagho. Yobu wakapulikira ulongozgi wakufuma kwa Chiuta.

•  ▸ Ŵerengani vya Yobu pa Yobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mozesi

•  ● Kasi wakaŵa njani? Mozesi wakaŵa mulongozgi wa Ŵaisrayeli. Iyo wakaŵa ntchimi yakugomezgeka.

•  ● Chifukwa wuli wakakhumbanga kufwa? Mozesi wakaŵa na udindo ukuru chomene, ŵanthu ŵakamunenanga, ndipo wakavukanga. Iyo wakalilira Chiuta kuti: “Mbwenu nikomani waka sono nthe.”—Maŵazgo 11:11, 15.

•  ● Kasi wakachita wuli? Mozesi wakaphalira Chiuta umo wakajipulikiranga. Chiuta wakachepeskako udindo uwo Mozesi wakaŵa nawo ndipo ivi vikamovwira kuti waleke kusuzgika chomene maghanoghano.

•  ▸ Ŵerengani vya Mozesi pa Maŵazgo 11:4-6, 10-17.