•  Ivyo Baibolo likuyowoya

•  Kasi vingachitika kuti munthu uyo wandagonanepo na mwanalume wababe mwana?

•  Chifukwa wuli Chiuta wakasankha kuti Yesu wababike na munthu uyo wandagonanepo na mwanalume?

•  Kasi Mariya wakalutilira kuŵa mwali wakati wababa Yesu?

•  Kasi Mariya wakaŵa wambura zakwananga?

•  Kasi tikwenera kupeleka ntchindi zapadera kwa Mariya?

 Baibolo likuti Mariya wakapika mwaŵi wapadera chomene wakuti wababe Yesu pambere wandagonanepo na mwanalume. Baibolo likayowoyerathu mu buku la Yesaya vya munthondwe uwu, ndipo mwakuyana na buku la Mateyu na Luka munthondwe uwu ukachitika nadi.

 Yesaya wakayowoyerathu vyakubabika kwa Mesiya ndipo wakati: “Wona, mwali waŵenge na nthumbo, wababenge mwana mwanalume.” (Yesaya 7:14) Mzimu utuŵa ukawovwira Mateyu kuti walembe umo uchimi wa Yesaya wakuyowoya vya Yesu uzamufiskikira. Wati wayowoya kuti Mariya wazamuŵa na nthumbo mwamunthondwe, Mateyu wakayowoyaso kuti: “Vyose ivi vikachitika kuti ghafiskike mazgu agho Yehova wakayowoya kwizira mu ntchimi yake, kuti: “Wona! Mwali a waŵenge na nthumbo ndipo wababenge mwana mwanalume, ndipo zina lake ŵamuthyenge Emanuwelu,” ilo likung’anamura kuti, ‘Chiuta Wali Nase.’”—Mateyu 1:22, 23.

 Luka nayo wakayowoya kuti Mariya wakaŵa na nthumbo ya munthondwe. Iyo wakati Chiuta wakatuma mungelo Gabriyeli “kwa mwali uyo wakalayizgika nthengwa na mwanalume zina lake Yosefe wa nyumba ya Davide. Mwali uyu wakaŵa Mariya.” (Luka 1:26, 27) Mariya wakayowoya kuti wandagonanepo na mwanalume. Wakati wapulika kuti waŵenge mama wa Yesu, uyo ni Mesiya, Mariya wakafumba kuti: “Kasi ichi chichitikenge wuli apo nindagonanepo na mwanalume?”—Luka 1:34.

 Mariya wakaŵa na nthumbo mu nkhongono ya mzimu utuŵa. (Mateyu 1:18) Mariya wakaphalirika kuti: “Mzimu utuŵa wizenge pa iwe, ndipo nkhongono ya Wapachanya Nkhanira yikubenekelerenge. Ntheura uyo wababikenge wazamuchemeka mutuŵa, Mwana wa Chiuta.” b (Luka 1:35) Chiuta wakasamuskira umoyo wa Mwana wake mu nthumbo ya Mariya mwamunthondwe, ndipo wakaŵa na nthumbo.

 Chifukwa ntchakuti Chiuta wakakhumba kuti Yesu wababike kwambura zakwananga kuti wathaske ŵanthu kukwananga na nyifwa. (Yohane 3:16; Ŵahebere 10:5) Chiuta wakasamuskira umoyo wa Yesu mu nthumbo ya Mariya. Ntheura mzimu utuŵa wa Chiuta ukavikilira Yesu apo wakaŵa munthumbo kuti waleke kubabika na zakwananga.—Luka 1:35.

 Yesu wakababika wambura zakwananga nga umo wakaŵira Adamu pambere wandanange. Baibolo likuti Yesu “wakachitapo kwananga yayi.” (1 Petrosi 2:22) Yesu wakaŵa wakwenelera nadi kupeleka umoyo wake kuŵa sembe yakuwombora ŵanthu kukwananga na nyifwa chifukwa wakaŵavya zakwananga.—1 Ŵakorinte 15:21, 22; 1 Timote 2:5, 6.

 Baibolo lindayowoyepo kuti Mariya wakalutilira kuŵa mwali. Kweni likuti Mariya wakababaso ŵana ŵanyake.—Mateyu 12:46; Mariko 6:3; Luka 2:7; Yohane 7:5.

 Yayi. Buku linyake likuti: “Mariya virigo wakaŵavya zakwananga kufuma waka apo wakababikira. Ŵanthu wose ŵakuhara zakwananga . . . Kweni Mariya pera wakalongoreka lusungu lwapadera, ivyo vikapangiska kuti waleke kuhara kwananga nga umo ŵanthu wose ŵakuchitira.”—New Catholic Encyclopedia. c

 Kweni Baibolo lindayowoyepo kuti Mariya wakaŵavya zakwananga. (Salimo 51:5; Ŵaroma 5:12) Mariya wakalongora kuti wakaŵa wakwananga apo wakapeleka sembe ya kwananga iyo Dango la Mozesi likatenge mwanakazi uyo wababa wapelekenge. (Levitiko 12:2-8; Luka 2:21-24) Buku la New Catholic Encyclopedia likuti: “Baibolo likuyowoyapo yayi kuti Mariya wakaŵavya zakwananga . . . Tchalitchi ndilo likamba kusambizga ivi.”

 Mariya ntchiyelezgero chiwemi pa nkhani ya chipulikano, kupulikira, kujiyuyura, kweniso kutemwa chomene Chiuta. Njumoza mwaŵanthu ŵakugomezgeka awo tikwenera kuŵayezga.—Ŵahebere 6:12.

 Nangauli Mariya wakaŵa na mwaŵi wakuŵa mama wa Yesu, kweni Baibolo lindayowoyepo kuti tikwenera kumusopa panji kulomba kwa iyo. Palije zuŵa ilo Yesu wakachindikapo amama ŵake mwakujumphizga, panji kuphalira ŵasambiri ŵake kuti ndivyo ŵakwenera kuchita. Padera pa Mabuku gha Makani Ghawemi na buku la Milimo, palije panyake apo pakuyowoyeka za Mariya mu mabuku gha Tesitamenti Lasono.—Milimo 1:14.

 Palije mu Baibolo apo pali kulembeka kuti Ŵakhristu ŵakwambilira ŵakachindikanga chomene Mariya. Kweni Baibolo likuti Ŵakhristu ŵakwenera kusopa Chiuta pera.—Mateyu 4:10.