Tose tili na nyengo yichoko yakuchitira sambiro la taŵene. Kasi tingachita wuli kuti tiyigwiliskirenge makora ntchito nyengo iyi? Chakwamba, kuchimbilira yayi pakusambira. Manyani kuti mungapindura chomene para mukusambira mwakupwelelera vinthu vichoko kuluska kusambira vinthu vinandi kweni mwapatalipatali waka.

Kufuma apo, ŵikani vinthu vyakuzirwa pa malo ghakwamba. (Efe. 5:15, 16) Wonani masachizgo agha:

• Muŵazgenge Baibolo zuŵa lililose. (Sal. 1:2) Mungamba dankha na kulondezga ndondomeko ya kuŵazga Baibolo ya pa maungano gha mukati mwa sabata.

• Munozgekerenge Sambiro la Gongwe la Mulinda na maungano gha mukati mwa sabata. Munozgekerenge kuti namwe mukazgorepo.—Sal. 22:22.

• Para muli na nyengo, muyezgeyezgenge kuŵazgaso na kuwonelera vinthu vinyake ivyo gulu lithu likufumiska, nga ni magazini ghakupharazgira, mavidiyo, na vinthu vinyake ivyo vikuŵikika pa jw.org.

• Sambirani nkhani izo zikumukondweskani. Mungafufuza vyakukhwaskana na suzgo ilo mukusangana nalo, fumbo ilo muli nalo, panji nkhani yinyake ya mu Baibolo iyo mukukhumba kuyipulikiska makora. Kuti musange masachizgo gha ivyo mungatemwa kusambira, lutani pa chigaŵa chakuti “Vyakuchita Pakusambira Baibolo” icho chili pa jw.org.