KASI walipo mubali panji mudumbu uyo mukumanya kuti wakasamirapo ku charu chinyake uko kukukhumbikwa ŵapharazgi ŵanandi ŵa Ufumu? Kasi muli kujifumbapo kuti: ‘Chifukwa wuli ŵakujipeleka kuti ŵakateŵetere ku charu chinyake? Kasi ŵakunozgekera wuli? Kasi nane ningachitako uteŵeti uwu?’ Kuti tisange mazgoro gha mafumbo agha, tingachita makora kufumba ŵabali na ŵadumbu awo ŵali kuchitapo mulimo uwu. Pulikani ivyo ŵanyake awo ŵali kuchitapo mulimo uwu ŵakayowoya.

Kasi ntchivichi chikamupangiskani kuti mukateŵetere ku charu chinyake? Amy wa ku United States, pasono wali na vyaka vya m’ma 30, ndipo wakuteŵetera ku Ghana. Iyo wakati: “Kwa vyaka vinandi, nkhaghanaghaniranga kukateŵetera ku charu chinyake, kweni nkhawonanga kuti ningakwaniska yayi.” Kasi ntchivichi icho chikamovwira kuti wasinthe maghanoghano? Amy wakati: “Mu 2004, mbumba yinyake ku Belize yikanichema kuti nkhachezge na kuchita nawo upayiniya kwa mwezi umoza. Nkhazomera na kuluta, ndipo vikanozga chomene kuteŵetera nawo. Pakati pajumpha chaka chimoza, nkhasamukira ku Ghana kukateŵetera nga mupayiniya.”

Mudumbu Stephanie wa ku United States wali na vyaka vya m’ma 20. Mudumbu uyu wakasanda umoyo wake ndipo wakawona kuti wali na nkhongono ziwemi kweniso walije udindo wakupwelelera mbumba. Wakawonaso kuti wangachita vinandi pakuteŵetera Yehova. Ivi vikamovwira kuti wasame na kukateŵetera ku Ghana. Filip na muwoli wake Ida, kwawo nkhu Denmark. Nyengo zose mbumba iyi yikaghanaghaniranga vyakusama na kukateŵetera uko kukukhumbikwira ŵapharazgi ŵanandi. Filip na Ida nawo ŵakasanda ivyo ŵangachita kuti ŵafiske ivyo ŵakakhumbanga. Filip wakati: “Mwaŵi ukati wasangika wakuti tikateŵetere ku charu chinyake, vikaŵa nga kuti Yehova wakutiphalira kuti: ‘Lutaninge!’” Mu 2008 ŵakasamira ku Ghana uko ŵakateŵeterako vyaka vyakujumpha vitatu.

 Mubali Hans na muwoli wake Brook, ŵali na vyaka vya m’ma 30, ndipo ŵakuchita upayiniya ku United States. Mu 2005 ŵakaŵa mu gulu la ŵanthu awo ŵakawovwira ŵabali na ŵadumbu awo ŵakasangana na suzgo chifukwa cha chimphepo cha Hurricane Katrina. Pamasinda, ŵakapempha kuti ŵakawovwire pa mulimo wakuzenga mu vyaru vinyake, kweni ŵakachemeka yayi. Mubali Hans wakati: “Pamanyuma, tikakhozgeka chomene na nkhani iyo yikayowoyeka pa ungano wachigaŵa. Nkhani iyi yikati Themba Davide likazomerezga lati lakanizgika kuzenga tempile ndipo likasintha chilato chake. Fundo iyi yikatovwira chomene kumanya kuti ntchamachitiko kusintha vilato vinthu vyauzimu.” (1 Mid. 17:1-4, 11, 12; 22:5-11) Brook wakati: “Yehova wakakhumbanga kuti tichite uteŵeti unyake.”

Mubali Hans na muwoli wake Brook ŵakakhozgeka chomene ŵakati ŵapulika vinthu viwemi ivyo vikuchitikira ŵabali na ŵadumbu awo ŵakuteŵetera mu vyaru vinyake. Ntheura nawo ŵakamba kudokera kukachita upayiniya mu charu chinyake. Mu 2012, ŵakasamira ku Ghana uko ŵakateŵetera kwa myezi yinayi mu mpingo wa chiyowoyero chamawoko. Nangauli ŵakawelera ku United States, kweni ivyo vikaŵachitikira apo ŵakateŵeteranga ku Ghana, vikaŵakhozga chomene kuti ŵalutilire kuŵika vinthu vya Ufumu pa malo ghakwamba mu umoyo wawo. Pamanyuma, ŵakawovwirapo kuzenga ofesi ya munthavi ya Ŵakaboni ŵa Yehova ku Micronesia.

Kasi mukanozgekera wuli? Mudumbu Stephanie wakati: “Nkhapenjerezga nkhani mu Gongwe la Mulinda izo zikulongosora za ŵanthu awo ŵakuteŵetera uko kukukhumbikwira ŵapharazgi ŵanandi.” * Wakayowoyaso kuti: “Nkhadumbiskana na ŵalara, kweniso mulaŵiliri wa dera na muwoli wake kuti nkhukhumba kukateŵetera ku charu chinyake. Kweniso kanandi para nkhulomba, nkhaphaliranga Yehova vilato vyane.” Stephanie wakalutilira kuleka kugura vinthu vinandi kuti wasunge ndalama zakuti zikamovwire kuteŵetera ku charu chinyake.

Mubali Hans wakati: “Tikalomba kwa Yehova kuti watovwire kuluta kulikose uko iyo wangakhumba. Tikamuphalirangaso  mu lurombo deti ilo tikakhumbanga kwambira uteŵeti.” Hans na muwoli wake ŵakalemba makalata na kutumizga ku maofesi ghamunthavi ghanayi kupempha uteŵeti. Mulyango ukaŵajulikira ku Ghana. Pakwamba ŵakaluta ku Ghana kukachezgako dankha kwa myezi yiŵiri. Hans wakati: “Tikakondwa chomene kuteŵetera na ŵabali na ŵadumbu ku Ghana, ntheura tikakhalako kwa myezi yakujumpha yiŵiri.”

Mubali George na muwoli wake Adria mba ku Canada, ndipo ŵali na vyaka vya m’ma 30. Iwo ŵakamanyanga kuti Yehova wakutumbika awo ŵakukhumba waka kumuteŵetera yayi, kweni awo ŵakukhumba na kuchitapo kanthu. Ntheura George na Adria ŵakachitapo kanthu kuti ŵafiske chilato chawo. Ŵakafumba mudumbu munyake uyo wakateŵeteranga ku Ghana. Ŵakamufumba mafumbo ghanandi kuti ŵamanye ivyo vikukhumbikwa pambere ŵandasame. Kweniso ŵakalembera makalata ku ofesi ya munthavi ya ku Ghana na Canada. Adria wakati: “Pamanyuma tikalutilira kuchepeska vinthu vinyake pa umoyo withu ndipo tikaleka kukhumba vinandi.” Chifukwa chakuti ŵakachitapo kanthu, ŵakakwaniska kusamira ku Ghana mu 2004.

Kasi mukasangana na masuzgo wuli mukati mwasama, ndipo mukamarana nagho wuli? Pakwamba Amy wakasuzgikanga na phukwa. Iyo wakati: “Vinthu vyose vikaŵa vyachilendo.” Kasi ntchivichi icho chikamovwira? Amy wakati: “Ŵabali ŵane ŵakaniyimbiranga foni ndipo ŵakanikhozganga chomene. Iwo ŵakaniphaliranga kuti ŵakuwonga uteŵeti uwo nkhuchita. Ivi vikanovwira kuti nyengo zose nikumbukirenge chilato chane. Pamasinda nkhamba kuchezga na ŵabali ŵane pa kompyuta uku tikuwonana. Pakuti tikawonananga, nkhaleka kudandawura vyakuti ŵabali ŵane ŵali kutali.” Amy wakayowoyaso  kuti wakaŵa paubwezi na mudumbu munyake mu mpingo uyo wakamanyangako tunandi pa nkhani ya mitheto ya ku Ghana. Mudumbu uyu wakawovwira Amy kuti wamanye makora umo wangakhalira na ŵanthu ŵa ku Ghana. Amy wakati: “Usange nazizwa na umo ŵanthu ŵanyake ŵakuchitira vinthu, nyengo zose nkhalutanga na kufumba kwa mudumbu uyu. Iyo wakanovwira kuti nimanye vithu ivyo ningachita panji kugega kuti nilutilire kukondwa na uteŵeti wane.”

Ŵakati ŵasamira ku Ghana, George na muwoli wake Adria ŵakalongosora kuti pakwamba umoyo ukaŵa wakusuzga chomene. Mudumbu Adria wakati: “Tikaleka kuchapira mashini, m’malo mwake tikamba kuchapa na mawoko. Kweniso tikawonanga kuti chakurya chikachedwanga chomene kuti chiphye kuluska umo tikazgoŵelera. Ndipouli, tikazgoŵera pakati pajumpha nyengo.” Mudumbu Brook wakati: “Nangauli nyengo zinyake tikusangana na masuzgo apo tikuchita upayiniya, kweni tili na umoyo wakukhorweska. Para tikughanaghanira vinthu viwemi ivyo vyatichitikira, tikuwona kuti mbusambazi ukuru chomene.”

Chifukwa wuli mukuchiska ŵanji kukateŵetera ku charu chinyake? Mudumbu Stephanie wakati: “Nkhukondwa chomene kupharazga na kusambizga ŵanthu awo ŵakhumba nadi kumanya unenesko wa mu Baibolo. Nkhuwona kuti nkhachita makora chomene kusama na kuteŵetera uko kukukhumbikwira ŵapharazgi ŵanandi.” Mu 2014, Stephanie wakatengwa kwa Aaron, ndipo pasono ŵakuteŵetera lumoza pa Beteli.

Mudumbu Christine wa ku Germany, ni mupayiniya uyo wali na vyaka vya m’ma 30. Christine wakateŵeteranga ku Bolivia pambere wandasamukire ku Ghana. Iyo wakati: “Chifukwa chakuti nkhakhalanga kutali na ŵabali ŵane, vikanovwira kuti nyengo zose nigomezgenge chomene Yehova. Sono Yehova ni mubwezi wane wapamtima kuluska kale. Nawonaso kuti ŵanthu ŵa Yehova ŵakukolerana chomene. Nakuti Yehova wanitumbika chomene chifukwa chakumuteŵetera.” Pasono Christine wali kutengwa kwa Mubali Gideon, ndipo ŵakulutilira kuteŵetera ku Ghana.

Filip na muwoli wake Ida ŵakayowoya ivyo ŵakachita kuti ŵawovwire awo ŵakusambira nawo Baibolo kukura mwauzimu. Iwo ŵakati: “Pakwamba tikasambizganga ŵanthu 15 panji kujumpha. Kweni tikasintha na kwamba kusambizga waka ŵanthu ŵambura kujumpha 10 kuti tiŵe na nyengo yakukwana yakuŵasambizga makora.” Kasi ivi vikawovwira wuli ŵasambiri ŵa Baibolo? Mubali Filip wakati: “Nkhasambiranga Baibolo na munyamata munyake zina lake Michael. Tikasambiranga zuŵa lililose ndipo wakanozgekeranga makora. Tikamalizga kusambira buku la Baibolo Likusambizgachi? mu mwezi umoza pera. Pamanyuma, Michael wakaŵa mupharazgi wambura kubatizika. Apo nkhalutanga nayo kakwamba kukapharazga, Michael wakanipempha kuti: ‘Kasi mungakanovwirako kusambizga ŵasambiri ŵane ŵa Baibolo?’ Nkhazizwa chomene ndipo nkhamulaŵiska kumaso. Michael wakaniphalira kuti wakusambizga ŵanthu ŵatatu Baibolo ndipo wakukhumba kuti nimovwire kuti waŵasambizgenge makora.”

Mudumbu Amy wakalongosora ivyo vikamovwira kumanya kuti ku Ghana kukukhumbikwira nadi wovwiri. Iyo wakati: “Pamanyuma pa nyengo yichoko waka kufuma apo nkhafikira ku Ghana, tikapharazga mu muzi unyake ndipo tikapenjanga chomene ŵanthu awo ŵali na suzgo la kupulika panji kuti ŵakumangwa. Mu muzi umoza pera, tikasanga ŵanthu 8!” Amy wali kutorana na Mubali Eric ndipo wose mbapayiniya ŵapadera. Ku Ghana kuli ŵapharazgi ŵakumangwa ŵakujumpha 300. Amy na mfumu wake Eric ŵakovwira mpingo wachiyowoyero cha mawoko. Kweniso ŵakovwira ŵanthu ŵanyake ŵakumangwa awo ŵakunweka na makani ghawemi. Apo Mubali George na muwoli wake Adria ŵakateŵeteranga ku Ghana, ŵakawona kuti ŵangakwaniska kuchita umishonale. Ntheura ŵakakondwa chomene kupokera kalata yakuŵachema kuti ŵakanjire kilasi la nambara 126 la Sukulu ya Giliyadi. Pasono ŵakuchita umishonale ku Mozambique.

Ntchakunotheska chomene kuti ŵabali na ŵadumbu ŵanandi ŵakujipeleka kukateŵetera mu vyaru vinyake. Iwo ŵakovwirana na ŵabali na ŵadumbu ŵa mu vyaru ivyo ŵakuteŵeterako ndipo ŵakuŵikapo mtima pa mulimo wakuvuna. (Yoh. 4:35) Pa avereji, ŵanthu 120 ŵakubatizika sabata yiliyose ku Ghana. Padera pa ŵabali na ŵadumbu 17 awo ŵali kusamira ku Ghana, paliso ŵanandi pa charu chose awo ŵajipeleka “na mtima wose” kuteŵetera Yehova chifukwa ŵakumutemwa. Ŵakuteŵetera uko kukukhumbikwira ŵapharazgi ŵanandi ŵa Ufumu. Yehova wakukondwa chomene chifukwa cha mzimu wakujipeleka wa ŵabali na ŵadumbu aŵa.—Sal. 110:3; Zinth. 27:11.