Kasi Chiuta Zina Lake Ni Njani? Chiuta mweneko wakuti: “Ine ndine Yehova. Ili ndilo zina lane.” (Yesaya 42:8) Zina leneko la Chiuta likusangika mu malo 7,000 mu Baibolo. Ndipouli mu ma Baibolo ghanyake, ŵali kuwuskamo zina la Chiuta ndipo ŵali kuŵikamo mazina gha vithokozo nga lakuti “Fumu.” Chiuta wakukhumba kuti muŵe nayo paubwezi, ndipo wakumupemphani kuti ‘muchemenge pa zina lake.’—Salimo 105:1.

Mazina gha Vithokozo gha Yehova. Mu Baibolo muliso mazina gha Chiuta gha vithokozo nga “Chiuta,” “Fumu yikuru,” “Mlengi,” “Dada,” “Fumu” kweniso “Wankhongonozose.” Mu malurombo ghanandi agho ghali mu Baibolo mukuzunulika zina leneko la Yehova,  kweniso mazina ghanyake gha ntchindi.—Daniyeli 9:4.

Umo Waliri. Chiuta ni mzimu ndipo tingamuwona yayi. (Yohane 4:24) Baibolo likutisimikizgira kuti “palije munthu wali kuwonapo Chiuta.” (Yohane 1:18) Kweni Baibolo likulongosora umo Chiuta wakujipulikira na ivyo tikuchita. ‘Tingamukondweska’ Chiuta panji kumuchitiska chitima.—Zintharika 11:20; Salimo 78:40, 41.

Mikhaliro Yapadera ya Chiuta. Chiuta wakutemwa ŵanthu ŵamitundu yose. (Milimo 10:34, 35) Kweniso Chiuta ngwalusungu na wachiwuravi, “wakukalipa luŵiro chara, wakuzara na chitemwa, na unenesko.” (Ekisodo 34:6, 7) Ndipouli Chiuta wali na mikhaliro yinyake yinayi iyo njapadera chomene.

Nkhongono. Chifukwa chakuti iyo ni “Chiuta Wankhongonozose,” wakwaniskenge kuchita vyose ivyo walayizga.—Genizesi 17:1.

Vinjeru. Chiuta wali na vinjeru kuluska munthu waliyose. Lekani Baibolo likuti ni “Chiuta yekha wavinjeru.”—Ŵaroma 16:27.

Urunji. Nyengo zose Chiuta wakuchita viwemi. Milimo yake yose ‘njakufikapo’ ndipo ‘ngwambura ubendezi.’—Dotoronome 32:4.

Chitemwa. Baibolo likuti “Chiuta ntchitemwa.” (1 Yohane 4:8) Chiuta wakulongora waka chitemwa yayi kweni iyo ntchitemwa. Vyose ivyo wakuchita, wakuchita chifukwa cha chitemwa ndipo chitemwa chake chikutovwira munthowa zinandi.

Tingaŵa Paubwezi na Chiuta. Chiuta ni Dada withu wakuchanya uyo ngwachitemwa. (Mateyu 6:9) Usange tili na chipulikano mwa iyo, tiŵenge ŵabwezi ŵake. (Salimo 25:14) Nakuti Chiuta wakumupemphani kuti mulombenge kwa iyo na kumuthulira “vyose ivyo mukwenjerwa navyo, chifukwa wakumupwelelerani.”—1 Petrosi 5:7; Yakobe 4:8.

Yesu ni Chiuta Yayi. Yesu ngwapadera chomene chifukwa ndiyo yekha uyo Chiuta wakamulenga mwakudunjika. Lekani Baibolo likuti ni Mwana wa Chiuta. (Yohane 1:14) Pamanyuma pakuti wamulenga Yesu, Yehova wakamugwiliskira ntchito mwana wake wakwamba uyu, kuŵa “misiri” pakulenga vinthu vyose kweniso waliyose wa ise.—Zintharika 8:30, 31; Ŵakolose 1:15, 16.

 Yesu wandayowoyepo kuti iyo ni Chiuta. Yesu wakayowoya kuti: “Ndine mwimiliri wakufuma kwa [Chiuta], ndipo ndiyo wakanituma.” (Yohane 7:29) Apo wakayowoyanga na yumoza wa ŵasambiri ŵake Yesu wakachema Yehova kuti “Adada na Awiskemwe ndiposo kwa Chiuta wane na Chiuta winu.” (Yohane 20:17) Yesu wati wafwa, Yehova wakamuwuska ndipo pamanyuma wakakwera kuchanya. Ndipo wakamupa mazaza ghose apo wakaŵa ku woko lake lamalyero.—Mateyu 28:18; Milimo 2:32, 33.

Yesu Khristu Wangamovwirani Kuti Muŵe Paubwezi na Chiuta

Yesu wakiza pa charu chapasi kuti watisambizge za Adada ŵake. Yehova iyo mwene wakati pakuyowoya za Yesu: “Uyu ni Mwana wane, wakutemweka. Mupulikirani.” (Mariko 9:7) Yesu wakumumanya makora Chiuta kuluska waliyose. Iyo wakati: “Palije uyo wakumanya Adada, kweni Mwana na waliyose uyo Mwana wakukhumba kumuvumbulira za iwo.”—Luka 10:22.

Yesu wali na mikhaliro ya Adada ŵake. Yesu wakalondezga mikhaliro ya Adada ŵake ndendende ndipo wakayowoyanga kuti: “Uyo wawona ine wawona na Adada wuwo.” (Yohane 14:9) Yesu wakawovwira ŵanthu ŵanandi kuŵa paubwezi na Chiuta chifukwa chakuti wakayezganga Adada ŵake mu ivyo wakayowoyanga na kuchita. Iyo wakati: “Ine ndine nthowa, unenesko, na umoyo. Palije uyo wakwiza kwa Adada kwambura kwizira mwa ine.” (Yohane 14:6) Wakayowoyaso kuti: “Awo ŵakusopa mwaunenesko ŵazamusopa Adada mu mzimu na mu unenesko, pakuti nadi, Adada ŵakupenja ŵanthu ŵanthena kuti ŵaŵasopenge.” (Yohane 4:23) Ghanaghanirani fundo iyi, Yehova wakupenja ŵanthu ŵa mitima yiwemi nga ndimwe, imwe mukukhumba kumumanya makora.