Pa Charu Chose Ŵanthu Ŵanandi Ŵakusuzgika Maghanoghano
“Nyengo zose nkhuŵa wakwenjerwa nanga ni para nili nekha mu chipinda.”
“Para nkhujipulika kuti nili makora mbwe nkhwamba kwenjerwa. Ndipo nkhumanya kuti para ‘nakondwa chomene’ mbwe umaliro wake nkhuŵa na ‘chitima.’”
“Nkhuyezgayezga kuti nichitenge waka vinthu vya zuŵa limoza, kweni nyengo zinyake mbwe nkhwamba kwenjerwa na vinthu vya mazuŵa ghanyake.”
Kasi vinthu ivyo ŵanthu aŵa ŵayowoya vili kumuchitikiranipo? Kasi imwe panji wachibali winu wali kusuzgikapo maghanoghano?
Para ni nthena, manyani kuti muli mwekha yayi. Ŵanthu ŵanandi mazuŵa ghano ŵakusuzgika maghanoghano. Ŵangaŵa kuti ŵakusuzgika ndiwo panji ŵachibali ŵawo.
Tikukayika yayi kuti tikukhala mu “nyengo zinonono na zakusuzga” izo zikupangiska ŵanthu kuti ŵasuzgikenge maghanoghano munthowa zinandi. (2 Timote 3:1) Kafukufuku munyake uyo wakachitika pa charu chose wakalongora kuti pa ŵanthu 8 ŵaliwose, yumoza wakusuzgika maghanoghano. Chifukwa cha muliri wa COVID-19, mu 2020, chiŵelengero cha ŵanthu ŵakwenjerwa chikasazgikira na 26 peresenti ndipo cha awo ŵakusuzgika maghanoghano chikasazgikira na 28 peresenti.
Apa nkhani njakuti timanye waka chiŵelengero cha ŵanthu awo ŵakusuzgika maghanoghano yayi, kweni kumanya umo imwe na ŵachibali ŵinu mukujipulikira kweniso umo mukukhalira.
Umo vikuŵira para munthu wakusuzgika maghanoghano yayi
Para munthu wakusuzgika maghanoghano yayi wakujipulika makora waka ndipo wakuchita makora vinthu. Wakulutilira kuchita makora vinthu nanga ni para wakwenjerwa, ndipo wakugwira makora ntchito kweniso wakukhorwa na umoyo.
Nthenda yakusuzgika maghanoghano. . .
-
Yikwamba chifukwa chakuti munthu ngwakutondeka yayi.
-
Nthenda iyi yikupangiska munthu kusuzgika maghanoghano, kutimbanizga kaghanaghaniro kake, kusinthasintha kachitiro ka vinthu na nkharo yake.
-
Yingapangiska kuti chiŵe chakusuzga kuti munthu wakoleranenge na ŵanji kweniso umo wangachitira na masuzgo agho wakusangana nagho pa umoyo.
-
Suzgo ili lingakhwaska ŵanthu ŵamisinkhu yose, mitheto, mitundu, visopa, ŵakusambira panji yayi, ŵasambazi panji ŵakavu.
Wovwiri ku awo ŵakusuzgika maghanoghano
Usange imwe panji wachibali winu wamba kusintha umo wakuchitira vinthu, wakusuzgika kugona panji vikumusuzga kurya, wakuŵa na chitima kwa nyengo yitali, panji wakwenjerwa, ndikuti wangakhumbikwira wovwiri wakwenelera kuti mumanye icho chikwambiska suzgo na kumanya wovwiri uwo wangapokera. Kweni kasi wovwiri mungawusanga nkhu?
Yesu Khristu, uyo wakaŵa munthu wavinjeru chomene, wakayowoya kuti: “Ŵanthu awo ŵali makora ŵakukhumbikwira dokotala chara, kweni ŵalwari ndiwo.” (Mateyu 9:12) Ŵanthu awo ŵakulutilira kusuzgika maghanoghano para ŵapokera wovwiri wakwenelera ŵangachita vinandi kuti ŵachepeske suzgo ilo ŵali nalo, ndipo ŵangawovwirika kuti ŵakondwenge na umoyo. Ntchiwemi yayi kuti ŵanthu ŵanthena ŵachedwenge kupokera wovwiri usange suzgo lawo ndikuru panji lakhaliska. a
Nangauli Baibolo ni buku la chipatala yayi, kweni lili na ulongozgi wakovwira kuti tileke kusuzgika maghanoghano. Tikumuchiskani kuti muŵerenge nkhani zakulondezgapo izo zikulongosora umo Baibolo lingatovwilira para tikusuzgika maghanoghano.
a Gongwe la Mulinda likuphalira munthu chakuchita yayi pa nkhani ya munkhwala. Waliyose wakwenera kusanda nthowa zakuchizgira pambere wandasankhe chakuchita.
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Baibolo Linganovwira Para Nkhufipa Mtima?
Chiuta wakutipa vinthu vitatu kuti vitovwire para tikufipa mtima.
VISAMBIZGO VYAKUZIRWA VYA MU BAIBOLO
Chifukwa Wuli Chiuta Walekelera Uheni na Suzgo?
Ŵanthu ŵanandi ŵakufumba kuti ‘chifukwa wuli ŵanthu ŵakusuzgika?’ Baibolo lili na zgoro la fumbo ili.
MUŴENGE MASO!
Suzgo la Kusuzgika Maghanoghano kwa Ŵachinyamata Lafika Paheni Chomene—Kasi Baibolo Likuti Wuli?
Baibolo likupeleka ulongozgi uwemi ku ŵachinyamata awo ŵakusuzgika maghanoghano.
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.
