1. Chifukwa wuli Yehova ndiyo ni mwenecho wa chilichose? (Wonani chithuzi chakwamba.)

CHILICHOSE ntcha Yehova. Ndiyo ni mwenecho wa “mtambo na mtambo wa kuchanya nkhanira . . . , charu chapasi nacho na vyose ivyo vilimo.” (Doto. 10:14; Chivu. 4:11) Ntheura ŵanthu wose mba Yehova chifukwa ndiyo wali kuŵalenga. (Sal. 100:3) Kweni kufuma apo wakalengera ŵanthu, Chiuta wasora ŵanthu ŵanyake kuŵa ŵanthu ŵake ŵapadera.

2. Kasi mbanjani awo ŵakuyowoyeka mu Baibolo kuti mbanthu ŵapadera ŵa Yehova?

² Mwachiyelezgero, Salimo 135 likuyowoya ŵanthu awo ŵakasopanga Yehova mwakugomezgeka mu nyengo ya Ŵaisrayeli kuŵa “chuma chake chapadera.” (Sal. 135, 4) Kweniso buku la Hoseya likayowoyerathu kuti ŵanthu ŵanyake awo Mbaisrayeli yayi ŵazamuŵa ŵanthu ŵa Yehova. (Hos. 2:23) Uchimi uwu ukafiskika apo Yehova wakamba kusora ŵanthu awo ŵakaŵa Ŵaisrayeli yayi kuti ŵakawuse na Khristu kuchanya. (Mil. 10:45; Rom. 9:23-26) “Mtundu utuŵa” uwu ni ŵanthu “ŵapadera” ŵa Yehova mu nthowa yapadera. Ŵali kuphakazgika na mzimu utuŵa ndipo ŵakuluta kuchanya. (1 Pet. 2:9, 10) Wuli pakuyowoya za Ŵakhristu ŵanandi ŵakugomezgeka awo ŵakulindilira  kuzakakhala pa charu chapasi? Aŵa nawo Yehova wakuŵachema kuti ni “ŵanthu” ŵake ndiposo “ŵakusoleka” ŵake.—Yes. 65:22.

3. (a) Mbanjani awo ŵali paubwezi na Yehova mazuŵa ghano? (b) Kasi tiwonenge vichi mu nkhani iyi?

³ Mazuŵa ghano “ŵakamskambo kachoko” awo ŵali na chilindizga cha kuluta kuchanya, na ŵa “mberere zinyake” awo ŵali na chilindizga cha kuzakakhala pa charu chapasi, ŵakupanga “mskambo umoza,” uwo Yehova wakuwuwona kuŵa ŵanthu ŵake. (Luka 12:32; Yoh. 10:16) Tikukhumba kulongora kuti tikumuwonga chomene Yehova pakutipa mwaŵi wapadera uwu wakuŵa nayo paubwezi. Mu nkhani iyi tiwonenge nthowa zakupambanapambana izo tingalongolera kuti tikumuwonga Yehova chifukwa cha mwaŵi wapadera uwu.

4. Kasi ni nthowa wuli yimoza iyo tingalongolera kuti tikuwonga Yehova chifukwa cha kutizomerezga kuŵa nayo paubwezi, ndipo Yesu wakachita wuli?

⁴ Tikulongora kuti tikumuwonga Yehova para tikujipeleka kwa iyo na mtima wose. Para tabatizika tikulongora pakweru kuti tili ŵa Yehova ndiposo kuti tikukhumbisiska kumupulikira. (Heb. 12:9) Yesu wakachita mwakuyana waka. Wakati wabatizika vikaŵa nga wakuti: “Nkhukhumba kuchita khumbo linu.” (Sal. 40:7, 8; mazgu ghamusi) Yesu wakajipeleka kuchita khumbo la Yehova nangauli mtundu uwo wakababikiramo ukaŵa wakujipatulira kale kwa Chiuta.

5, 6. (a) Kasi Yehova wakajipulika wuli Yesu wakati wabatizika? (b) Yowoyani chiyelezgero chakulongora chifukwa icho Yehova wakukondwera para tajipatulira kwa iyo nangauli chinthu chilichose ntchake kale.

⁵ Kasi Yehova wakajipulika wuli Yesu wakati wabatizika? Baibolo likuti: “Yesu wakati wabatizika, nyengo yeneyiyo wakazuwuka mu maji, ndipo wonani! kuchanya kukajulika, ndipo Yohane wakawona mzimu wa Chiuta ukakhiranga nga ni nkhunda kwiza pa Yesu. Kweniso, wonani! mazgu ghakapulikikwa kufuma kuchanya ghakati: ‘Uyu ni Mwana wane, wakutemweka, mweneuyo nkhukondwa nayo.’” (Mat. 3:16, 17) Nangauli Yesu wakaŵa wakujipatulira kale kwa Awiske ŵakuchanya, kweni Yehova wakakondwa kuwona kuti Mwana wake ngwakukhumbisiska kuchita khumbo la Yehova pera. Mwakuyana waka Yehova wakukondwa para tajipatulira kwa iyo, ndipo watitumbikenge.—Sal. 149:4.

⁶ Tiyelezgere kuti dada wali na munda wakutowa wa maluŵa. Zuŵa linyake mwana wake muchoko msungwana watorapo luŵa limoza na kupeleka kwa awiske nga ntchawanangwa. Dada wachitemwa wangaghanaghanapo yayi kuti mwana wachita uheni kumupa maluŵa agho ghanguŵa ghake kale. M’malo mwake wakondwenge na kuzomera chawanangwa ichi chifukwa ntchilongolero chakuti mwana wakumutemwa. Ndipo luŵa ilo mwana wake wamupa waliwonenge kuti ndakuzirwa chomene kuluska maluŵa ghose gha mu munda. Yehova nayo wakukondwa chomene para tajipatulira kwa iyo na mtima wose.—Eks. 34:14.

7. Kasi Malaki wakati Yehova wakujipulika wuli na ŵanthu awo ŵakumuteŵetera na mtima wose?

⁷ Ŵerengani Malaki 3:16. Para mundajipatulire kwa Chiuta na kubatizika, ghanaghanirani kuzirwa kwa kujipatulira na kubatizika. Kufuma waka apo mukaŵirako, mukaŵa ŵa Yehova pamoza na ŵanthu wose. Ntheura ghanaghanirani umo Yehova wangakondwera usange mungajipatulira na kuchita khumbo lake chifukwa cha kumanya kuti ndiyo ngwakwenelera kutiwusa. (Zinth. 23:15) Nakuti Yehova wakumanya awo ŵakumuteŵetera na mtima wose, ndipo wakulemba mazina ghawo mu “buku [lake] la chikumbusko.”

8, 9. Kasi Yehova wakukhumba vichi kwa awo mazina ghawo ghali kulembeka mu “buku [lake] la chikumbusko”?

 ⁸ Pakukhumbikwira kuchita vinthu vinyake kuti munthu zina lake lilembeke mu “buku la chikumbusko” la Yehova. Malaki wakati tikwenera ‘kopa Yehova na kughanaghanira zina lake.’ Para tingamba kusopa munthu munyake panji chinthu chinyake chilichose, mbwenu zina lithu lifumiskikengemo mu buku la Yehova.—Eks. 32:33; Sal. 69:28.

⁹ Ntheura, tikwenera kuchita vinandi kuluska kulayizga waka Yehova kuti tichitenge khumbo lake na kubatizika. Vinthu ivi tikuchita kamoza, kweni tikwenera kusopa Yehova mu umoyo withu wose. Zuŵa lililose chikuru tili na umoyo, mu vyakuchita vithu tikwenera kulongora kuti tikumupulikira Yehova.—1 Pet. 4:1, 2.

10. Kasi pakwenera kuŵa mphambano wuli pakati pa awo ŵakuteŵetera Yehova na awo ŵakuleka kumuteŵetera?

¹⁰ Mu nkhani yajumpha tikasambira za Kayini, Solomoni, na Ŵaisrayeli. Wose ŵakatenge ŵakusopa Yehova, kweni ivyo ŵakachitanga vikalongora kuti ŵakajipeleka zanadi yayi kwa Chiuta. Nkhani izi zikulongora kuti awo mba Yehova ŵakwenera kulutilira kuchita urunji na kukana vinthu viheni. (Rom. 12:9) Lekani Malaki wakati wayowoya za “buku la chikumbusko,” Yehova wakayowoya “mphambano pakati pa munthu murunji na munthu muheni, pakati pa uyo wakuteŵetera Chiuta na uyo wakuleka kumuteŵetera.”—Mal. 3:18.

11. Chifukwa wuli ŵanji ŵakwenera kumanya kuti tikuteŵetera Yehova pera?

¹¹ Paliso nthowa yinyake iyo tingalongolera kuti tikumuwonga Yehova chifukwa cha kutisankha kuŵa ŵanthu ŵake. “Ŵanthu wose” ŵakwenera kuwona kuti tikukura mwauzimu. (1 Tim. 4:15; Mat. 5:16) Jifumbani kuti: ‘Kasi ŵanji ŵakuwona kuti nili wakugomezgeka kwa Yehova? Kasi nkhupenja mipata ya kumanyiska ŵanji kuti ndine Kaboni wa Yehova?’ Yehova wangaŵa na chitima chomene usange tingatondeka kumanyiska ŵanji kuti tili ŵake pamanyuma pakuti watisankha kuŵa ŵanthu ŵake.—Sal. 119:46; ŵerengani Mariko 8:38.

12, 13. Chifukwa wuli ŵanji ŵakumanyikwa yayi kuti Mbakaboni ŵa Yehova?

 ¹² Ntchachitima kuti ŵanji ŵakumanyikwa yayi usange ‘ŵakuteŵetera Chiuta panji ŵakuleka kumuteŵetera’ chifukwa cha kulondezga “mzimu wa charu.” (1 Kor. 2:12) Mzimu uwu ukuchitiska kuti munthu wachitenge “makhumbiro gha thupi” lake. (Efe. 2:3) Mwachiyelezgero, nangauli tapokera ulongozgi kanandi waka pa nkhani ya kavwaliro na kujitozga, kweni ŵanji ŵachali kuvwara na kujitozga mwambura kwenelera. Ŵakuvwara malaya ghakufyenya na ghakuwoneska mukati, nanga pangaŵa pa maungano. Panji ŵakusankha masitayelo ghambura kwenelera gha kametero na katozgero ka sisi. (1 Tim. 2:9, 10) Ntheura para ŵali pa wumba, chikuŵa chakusuzga kumanya uyo ngwa Yehova na uyo ni “mubwezi wa charu.”—Yak. 4:4.

¹³ Ŵakaboni ŵanyake ŵandalekerethu nkharo ya charu. Kaviniro kawo na vyakuchita vyawo para ŵali ku viphikiro vikuŵa vyambura kwenelera kwa uyo ni Mkhristu. Ŵakuŵika vithuzi vyawo pa malo ghakuchezgerapo gha pa Intaneti na kulembapo mazgu ghambura kwenelera kwa Mkhristu. Nangauli ŵangaŵa kuti ŵandachenyeke mu mpingo chifukwa cha kuchita zakwananga zikuru, kweni ŵangananga Ŵakhristu ŵanyawo awo ŵakuyezgayezga kulutilira kuŵa na nkharo yiwemi.—Ŵerengani 1 Petrosi 2:11, 12.

14. Kasi tikwenera kuchita vichi usange tikukhumba kuti tivikilire ubwezi withu wapadera na Yehova?

¹⁴ Charu chikulutilira kukhuŵilizga “makhumbiro gha thupi, makhumbiro gha maso na kujilongora chifukwa cha ivyo uli navyo.” (1 Yoh. 2:16) Kweni chifukwa chakuti tili ŵa Yehova, tikuchenjezgeka kuti “tikane nkharo iyo yikususkana na khumbo la Chiuta kweniso kukana makhumbiro ghacharu, kuti tiŵenge ŵamahara, ŵarunji na ŵakujipeleka pakusopa Chiuta mu nyengo iyi.” (Tito 2:12) Chili chose icho tikuchita kwali nkhayowoyero kithu, kalyero na kamwero kithu, kavwaliro na umo tikujitozgera ndiposo umo tikugwilira ntchito, vikwenera kulongora kuti tili kujipatulira kwa Yehova.—Ŵerengani 1 Ŵakorinte 10:31, 32.

15. Chifukwa wuli ŵasopi ŵanyithu tikwenera kuŵalongora lusungu na chitemwa?

¹⁵ Ivyo tikuchitira ŵasopi ŵanyithu ndivyo vikulongora usange tikuwonga kuti tili paubwezi wapadera na Yehova. Nawo mbanthu ŵa Yehova. Para nyengo zose tikumbukenge fundo iyi, ŵabali na ŵadumbu ŵithu tiŵalongorenge lusungu na chitemwa. (1 Tes. 5:15) Yesu wakaphalira ŵasambiri ŵake kuti: “Usange mukutemwana, wose ŵamanyenge kuti ndimwe ŵasambiri ŵane.”—Yoh. 13:35.

16. Kasi ni fundo wuli ya mu Dango la Mozesi iyo yikulongora umo Yehova wakuwonera ŵateŵeti ŵake?

¹⁶ Kuti tilongosore umo tikwenera kuchitira na ŵanyithu mu mpingo, wonani fundo iyi. Vinthu ivyo ŵakagwiliskiranga ntchito pa tempile la Yehova vikaŵa vyakupatulika, ndipo vikagwiranga ntchito pa kusopa kutuŵa pera. Dango la Mozesi likalongosora mwakupulikikwa makora umo ŵangapwelelera vinthu ivi, ndipo uyo waswa dango wakakomekanga. (Maŵa. 1:50, 51) Usange Yehova wakavikiliranga vinthu vyambura umoyo ivi ivyo ŵakagwiliskiranga ntchito pakumusopa, kuli wuli ŵateŵeti ŵake ŵakugomezgeka awo waŵasankha kuŵa ŵanthu ŵake? Pakuyowoya na ŵanthu ŵake, Yehova wakati: “Waliyose uyo wakukhwaska imwe, wakukhwaska mboni ya jiso lane.”—Zek. 2:8.

17. Kasi Yehova ‘wakuŵikako khutu lake na kutegherezga’ ku vichi?

¹⁷ Malaki wakayowoya kuti Yehova “wakaŵikangako khutu lake na kutegherezga” apo ŵanthu ŵake ŵakayowoyeskananga. (Mal. 3:16) Nadi Yehova “wakuŵamanya awo mbake.” (2 Tim. 2:19) Wakumanya chilichose icho tikuyowoya na kuchita. (Heb. 4:13) Para ŵasopi ŵanyithu tikuŵalongora lusungu yayi, Yehova ‘wakuŵikako khutu lake na kutegherezga.’ Para tikupokelera ŵalendo, tikuŵa ŵakupa, tikugowokera, na kuŵa ŵalusungu ku ŵanyithu, tingaŵa na chigomezgo chose kuti Yehova wakuwona ivyo tikuchita.—Heb. 13:16; 1 Pet. 4:8, 9.

18. Kasi tingalongora wuli kuti tikuwonga kuti ndise ŵanthu ŵa Yehova?

¹⁸ Nadi tikukhumba chomene kulongora kuti tikuwonga Yehova chifukwa cha kuŵa ŵanthu ŵake. Tikuwona kuti tili kuchita chinthu chamahara chomene kujipatulira kwa iyo. Nangauli tikukhala “pakati pa muwiro uwu wakubendera na wakunyongoloka,” kweni tikukhumba kuti ŵanthu ŵawone kuti tili ‘ŵambura kafukwa na ŵambura mulandu, . . tikuŵala nga ni miliko mu charu.’ (Fil. 2:15) Tikukanirathu vinthu viheni. (Yak. 4:7) Ndipo tikutemwa na kuchindika ŵasopi ŵanyithu, pakumanya kuti nawo mbanthu ŵa Yehova.—Rom. 12:10.

19. Kasi Yehova wakuŵatumbika wuli ŵanthu awo ŵali kwa iyo?

¹⁹ Baibolo likulayizga kuti: “Yehova watayenge chara ŵanthu ŵake.” (Sal. 94:14) Layizgo ili ndanadi nanga tingakumana na masuzgo wuli. Nanga yingaŵa nyifwa yingatipatura yayi ku chitemwa cha Yehova. (Rom. 8:38, 39) “Usange tili ŵamoyo, tili ŵamoyo kuti tichindike Yehova, ndipo usange tikufwa, tikufwira kuchindika Yehova. Ntheura usange tili ŵamoyo ndiposo usange tafwa, tili ŵa Yehova.” (Rom. 14:8) Nadi, tikulindilira zuŵa ilo Yehova wazamuwuska ŵateŵeti ŵake wose ŵakugomezgeka awo ŵali kufwa. (Mat. 22:32) Nanga ni sono tikusangwa na vitumbiko vinandi. Nga umo Baibolo likuyowoyera kuti, “ngwakukondwa mtundu uwo Chiuta wake ni Yehova, ŵanthu awo waŵasora kuŵa chiharo chake.”—Sal. 33:12.