Mudumbu wambura kutengwa wa vyaka vya m’ma 30, zina lake Angela, a wali na wofi. Wakulindilira ŵalara awo ŵizenge ku nyumba yake. Kasi ŵazamuyowoya vici? Mbunenesko kuti wakhalapo ku maungano ghacoko waka, kweni wavuka cifukwa ca kovwira ŵacekuru. Padera pa masuzgo ghake gha zuŵa na zuŵa, wakufipa mtima comene na matenda gha amama ŵake.

Usange imwe ndimwe mulutenge kwa Angela, kasi mwate mucitenge wuli kuti mukhwimiske “mzimu wakuvuka” uwu? (Yer. 31:25) Ndipouli, cinthu cakwamba nchakuti, kasi munganozgekera wuli ulendo wakusamphuska wa uliska?

Nyengo zinyake tose tikuvuka cifukwa ca nchito panji milimo yithu yauzimu. Mwaciyelezgero nchimi Daniyeli ‘yikamara lusoko’ apo yikatondeka kupulikiska mboniwoni iyo yikapokera. (Dan. 8:27) Mungelo Gabriyeli wakayiwovwira wakati wawoneka kwa iyo. Thenga la Ciuta ili likawovwira kuti Daniyeli wapulikiske. Likamusimikizgira kuti Yehova wakapulika malurombo ghake, kweniso likamuphalira kuti wakaŵa “wakutemweka comene.” (Dan. 9:21-23) Pa nyengo yinyake ivi vikati vyajumphapo, mazgu ghawemi agho ghakayowoyeka na mungelo munyake ghakakhozga nchimi yakuvuka iyi.—Dan. 10:19.

Mwakuyana waka, pambere mundalute kwa Mkhristu munyinu uyo wavuka, ghanaghanirani dankha masuzgo ghake. Kasi ni masuzgo wuli agho wakukumana nagho? Kasi masuzgo agha ghangaŵa kuti ghamugulura wuli nkhongono? Kasi ni mikhaliro wuli yiwemi iyo wali nayo? Richard, uyo waŵa mulara  kwa vyaka vyakujumpha 20, wakati: “Nkhuŵika maghanoghano pa vinthu viwemi ivyo ŵabali ŵane ŵakucita makora.” Wakasazgirapo kuti: “Para naghanaghanirapo comene pa masuzgo ghawo pambere nindaŵendere, cikuŵa cipusu kuti nisange nthowa zakuŵakhozgera pa suzgo lawo.” Usange muŵenge lumoza na mulara munyake, mwalekeraci kudumbiskana suzgo la mubali winu?

Mungazomerezga kuti nyengo zinyake cikuŵa cakukhozga soni kuyowoya ivyo vili mu mtima. Tiyelezgere kuti: Mubali winu wakuwona kuti nchakusuzga kuphalira ŵalara awo ŵiza masuzgo ghake. Kasi mungamovwira wuli kuti wafwatuke? Mungamovwira para mungamwemwetera na kuyowoya nayo mazgu ghakukhozga. Michael, mulara uyo wateŵetera kwa vyaka vyakujumpha 40, kanandi wakwamba cidumbirano na mazgu ghakuyana na agha: “Kasi mukumanya? Mwaŵi unyake uwemi comene uwo mulara wali nawo, nkhucezgera ŵabali mu nyumba zawo na kuŵamanya makora. Ntheura nalindiliranga mwakunweka zuŵa ili.”

Mungasankha kupeleka lurombo lwakufumira pasi pa mtima pakwamba cidumbirano. Mu malurombo ghake, mpositole Paulosi wakazunuranga cipulikano ca ŵabali ŵake, citemwa cawo, na kuzizipizga kwawo. (1 Tes. 1:2, 3) Para mukulongora umo mukujipulikira na mikhaliro yiwemi ya mubali winu, vikovwira kuti imwe na mubali winu muŵe ŵakunozgekera cidumbirano cakukhozga. Kweniso mazgu ghinu ghangaŵa ghakutuniska. Ray, mulara uyo wateŵetera kwa nyengo yitali, wakati: “Nyengo zinyake tose tikuluwa viwemi ivyo tikucita. Ntheura, para munyake watikumbuska, tikujipulika makora mu mtima.”

Nga ni Paulosi, namwe mungapeleka “cawanangwa cauzimu” para mungadumbiskana nawo fundo ya mu Malemba, nanga yingaŵa yakufuma pa vesi limoza. (Rom. 1:11) Mwaciyelezgero, mubali wakusuzgika maghanoghano wangajiwona kuti ngwambura kukhumbikwa,  nga ngwamasalimo uyo wakajiyaniska na thumba lakukwinyana la “cikumba mu josi.” (Sal. 119:83, 176) Para mwalongosora mwakudumura fundo iyi, mungayowoya kuti mukugomezga kuti mubali winu ‘wakuluwa cara’ malango gha Ciuta.

Ntharika ya dirakima lakuzgeŵa nayo yingacontha comene mtima wa mudumbu uyo waleka kuwungana panji walopwa. (Luka 15:8-10) Dirakima lakuzgeŵa ili likwenera kuti likaŵa ku nikilesi yakupangika na tuvisulo tunandi twa siliva. Para mungalongosora ntharika iyi, mudumbu wangawovwirika kuti wamanye kuti ngwakuzirwa comene mu mpingo. Para mwadumbiskana fundo izi, mungalongosora umo Yehova wakumupwelelelera pakuŵa yumoza wa mberere zake zicoko.

Kanandi Ŵakhristu ŵanyithu ŵakukondwa kuyowoya fundo za mu Baibolo. Ntheura mungayowoyanga mwekha pera yayi. Para mwaŵazga vesi ilo likukolerana na suzgo lawo, mungasankhapo lizgu panji mazgu agho ghali na fundo yikuru na kuŵapempha kuti ŵayowoyepo. Mwaciyelezgero, pamanyuma pa kuŵazga lemba la 2 Ŵakorinte 4:16, mulara wangafumba kuti, “Kasi imwe pamwekha muli kughanaghanirapo nthowa izo Yehova wakumuzgolerani ŵaphya?” Para mungacita nthena, pangaŵa nadi “kukhwimiskana” yumoza na munyake.—Rom. 1:12.

Kweniso mungasamphuska Mkhristu munyinu para mungadumbiskana nayo vya munthu munyake wa mu Baibolo uyo wakaŵa na suzgo lakuyana na lake. Munthu uyo wakusuzgika maghanoghano wangakhozgeka na nkhani ya Hana na ya Epafurodito, awo pa nyengo yinyake ŵakasuzgika maghanoghano kweni ŵakalutilira kuŵa ŵakuzirwa kwa Ciuta. (1 Sam. 1:9-11, 20; Fil. 2:25-30) Mwalekeraci kudumbiskana viyelezgero vinyake viwemi vya mu Baibolo para mukhaliro ukuzomerezga?

Mungalongora kuti mukuŵafipira mtima nadi ŵabali na ŵadumbu ŵinu para mukulutilira kulongora kuti mukuŵatemwa pamasinda pakuti mwaŵayendera. (Mil. 15:36) Paumaliro wa cidumbirano, mungawona kuti cingaŵa ciwemi kuti mupangane nawo kuti muzakendere lumoza mu upharazgi. Para Bernard, mulara uyo wateŵetera kwa nyengo yitali, wakumana na mubali panji mudumbu uyo wakamwendera sonosono, wakumufumba mwavinjeru fumbo lakukhwaskana na ulongozgi uwo wakapeleka. Nyengo zinyake wakufumba kuti: “Adumba, kasi vira vili wuli?” Para mukulongora kuti mukuŵatemwa nga umo wakucitira mubali uyu, mungamanya usange pakukhumbikwa wovwiri unyake.

Kuluska kumasinda kose, sono ndipo ŵabali na ŵadumbu ŵakukhumba comene kumanya kuti ŵakupwelelereka, mukuŵapulikiska kweniso mukuŵatemwa. (1 Tes. 5:11) Ntheura, pambere mundacite ulendo wa uliska, ghanaghaniranipo dankha pa umo vinthu viliri kwa mubali winu. Lombani pakughanaghanirapo. Sankhani malemba ghakwenelera. Para mwacita nthena musangenge mazgu ghakwenelera ghakusamphuskira “mzimu wakuvuka.”