Kumwaposo Pacoko

APO Allen wakaŵa na vilimika 11 wakamba kumwa comene phere. * Iyo na ŵabwezi ŵake ŵakaseŵeranga mu makuni na kumwa phere, ŵakayezgeleranga ivyo ŵakawonanga mu mafilimu. Ivyo ŵakawonanga mu mafilimu vikaŵa vyakuyezgelera waka, kweni Allen na ŵabwezi ŵake ŵakamwanga phere lanadi.

Apo Tony wakaŵa na vilimika 40 wakasazgirako phere ilo wakamwanga. Kumanyuma wakamwanga tambulara yumoza panji ghaŵiri, kweni mwapacokopacoko wakamba kumwa matambulara 5 panji 6 usiku umoza. Mukuluta kwa nyengo, wakaleka na kupenda wuwo unandi wa matambulara agho wakamwanga pa zuŵa.

Allen wakapempha ŵanji kuti ŵamovwire kuti waleke uloŵevu. Tony wakakananga para ŵabwezi ŵake na ŵa mu mbumba yake ŵakukhumba kumovwira. Allen wacali wamoyo mpaka mwahuno kweni Tony wali kufwa pa ngozi ya galimoto cifukwa wakendeskanga uku waloŵera.

Nanga munthu wangamwa na kuloŵera payekha, kweni ŵanji ŵakukhwaskika na vinthu viheni ivyo wakucita. * Kanandi para munthu wamwa comene wakutuka na kutimba ŵanji, kuŵapweteka na kuŵakoma, ndiposo kupangiska ngozi pa msewu panji ku nchito. Kweniso muloŵevu wakuŵeta matenda ghanandi mu thupi. Vyaru vikunanga ndalama zinandi pa cilimika cifukwa ca uloŵevu. Kweniso, ŵaloŵevu iwoŵene, ŵana ŵawo, ndiposo ŵabali ŵawo ŵakusuzgika comene maghanoghano.

Wupu unyake wa ku United States ukati: “Pali ŵanthu ŵanyake awo ŵakumwa nyengo zose kweni mbaloŵevu yayi, ndipo paliso ŵanyake awo ŵakumwa zuŵa lililose yayi kweni ŵali na suzgo la uloŵevu.” (National Institute of Health) Ŵanandi awo mbaloŵevu yayi ŵakwamba kumwa comene kwambura kumanya. Ŵanji ŵakumwa nyengo zose yayi, kweni para ŵati ŵapapire, ŵakupapira zanadi.

Usange mwasankha kumwa phere, kasi mumanyenge wuli kuti mwamwa mwakujumphizga? Kasi mungamanya wuli nyengo iyo mukwenera yayi kumwaposo pacoko? (Zintharika 23:29, 30) Nkhani zakulondezgapo zitovwirenge pa nkhani ya phere.

[Mazgu ghamusi]